بدلی بدلی سی فضا لگتی ہے
Posted on May 18, 2012 By Adeel Webmaster فاخرہ بتول
badli badli si faza
بدلی بدلی سی فضا لگتی ہے
ساری دنیا ہی خفا لگتی ہے
دل کا دروازہ کھلا چھوڑ دیا
تیرے قدموں کی صدا لگتی ہے
سینکڑوں چھید ہیں اس میں لیکن
کتنی اچھی یہ ردا لگتی ہے
چاند ہو جیسے ستاروں سے الگ
ایسے نینوں میں حیا لگتی ہے
تیری قربت میں جھکی سی یہ نظر
ایک معصوم دعا لگتی ہے
مرحلہ موت کا مشکل ہے مگر
زندگی اس سے سوا لگتی ہے
اب کے روٹھے، نہ منایا تم نے
یہ بچھڑنے کی ادا لگتی ہے
کس کی آنکھوں کا اثر ہے یہ بتول
کالی کالی سی گھٹا لگتی ہے
فاخرہ بتول
بھول جانے کا تو بس ایک بہانہ ہو گا
برسات آ بھی چکی
