چکوال کی خبریں 1.10.2013
Posted on October 2, 2013 By Geo Urdu سٹی نیوز
شادی میں شرکت کے لیے راولپنڈی سے چکوال آنیوالا خاندان ہائی ایس ڈرائیور اور اس کے ساتھیوں کے ہاتھوں لٹ گیا
چکوال (ڈسٹرکٹ رپورٹر) شادی میں شرکت کے لیے راولپنڈی سے چکوال آنیوالا خاندان ہائی ایس ڈرائیور اور اس کے ساتھیوں کے ہاتھوں لٹ گیا۔ ڈرائیور کے گرفتار ہوتے ہی سامان برآمد ہوگیا۔ عبید الرحمن اپنی اہلیہ اور بچوں کے ہمراہ چکوال میں شادی کی تقریب میں شرکت کے لیے راولپنڈی سے گاڑی نمبر کے بی 7898 پر سوار ہوا اور گاڑی ڈرائیور انعام الحق نے سامان والا بیگ جس میں طلائی زیورات، کپڑے، اور دیگر لاکھوں روپے مالیت کا قیمتی سامان موجود تھا چھت پر باندھ دیا راستے میں ڈرائیور کے ساتھی مدثر وغیرہ بھی گاڑی میں سوار ہو گئے ایک شخص گاڑی کے پیچھے لٹک گیا۔ راستے میں ڈرائیور نے اپنے ساتھیوں کی مدد سے چھت پر بندھا ہوا سامان والا بیگ غائب کروادیا۔ عبید الرحمن جب چکوال پہنچا تو وہ لٹ چکا تھا۔ فوری طور پر گاڑی ڈرائیور اور مدثر نامی ساتھی کو گھیر لیا گیا اور انہیں سٹی پولیس کے حوالے کر دیا گیا۔ بعد ازاں ڈرائیور کے گرفتار ہونے کے چند گھنٹوں بعد سامان برآمد ہو گیا۔ اور اسے مالک کے حوالے کر دیا گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سبزی منڈی چکوال کے قریب کالج دیوار اور گردونواح میں لگائے گئے
چکوال (ڈسٹرکٹ رپورٹر) سبزی منڈی چکوال کے قریب کالج دیوار اور گردونواح میں لگائے گئے غیر قانونی ٹھیے ہزاروں روپے ماہانہ کرایے پر دئیے جانے کا انکشاف ہوا ہے۔ قبضہ مافیا ٹی ایم اے کی آشیر باد سے لاکھوں روپے ماہانہ کرایہ کی صورت میں کما رہا ہے۔ معلوم ہوا ہے کہ سبزی منڈی کے قریب ہائی سکول گرائونڈ کی دیوار کے ساتھ لگائے گئے غیر قانونی ٹھیے جو کہ ناجائز تجاوزات کے زمرے میں بھی آتے ہیں قبضہ گروپ نے ہزاروں روپے کرایہ پر چڑھا رکھے ہیں۔ پانچ ہزار سے پندرہ ہزار روپے تک ماہانہ کرایہ وصول کیا جاتا ہے۔ معلوم ہوا ہے کہ ساجد پولٹری والا تمام ٹھیوں سے کرایہ اکٹھا کر کے قبضہ گروپ کے حوالے کرتا ہے جبکہ ٹی ایم اے کے افسران کو بھی باقاعدہ حصہ ملتا ہے۔ مذکورہ ٹھیے ختم کروانے کے لیے کئی مرتبہ ٹی ایم اے کے افسران کو درخواستیں دی گئیں مگر کوئی کاروائی نہیں کی جاتی۔ شہریوں نے ایک علاقے میں دو قوانین پر شدید حیرت کا اظہار کیاہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سردار گروپ نے بلدیاتی انتخابات کے اعلان کے ساتھ ہی مسلم لیگ ن کی طرف سے سیاسی انتقامی تبادلوں پر شدید تشویش کا اظہار کیا ہے
چکوال (ڈسٹرکٹ رپورٹر) سردار گروپ نے بلدیاتی انتخابات کے اعلان کے ساتھ ہی مسلم لیگ ن کی طرف سے سیاسی انتقامی تبادلوں پر شدید تشویش کا اظہار کیا ہے۔ اور مخالف سرکاری ملازمین کو انتقامی کاروائیوں کا نشانہ بنانے کی مذمت کی ہے۔ ڈسٹرکٹ ہیڈ کوارٹر ہسپتال چکوال کے مائیکرو سکوپ محمد اقبال کو ای ڈی او ہیلتھ آفس امیر پور منگن ڈسپنسری کے چوکیدار کے ڈوہمن تبادلے بھیں سے تبادلے رکھنے والے تین کلاس فوروں کے ٹمن تبادلے منگن سے تعلق رکھنے والے ایک کلاس فور کے کلرکہار تبادلے جبکہ ارشد نامی مالی کو امیرپور منگن سکول سے کلرکہار تبادلے پر شدید تشویش کا اظہار کیا گیا ہے۔ سردار گروپ کے ترجمان کے مطابق انتقامی کاروائیوں اور جھوٹے مقدمات کا سلسلہ مسلم لیگ ن کے خلاف شدید نفرت کو فروغ دے رہا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دالعلیم خان نے رائزنگ سن انسٹیٹوٹ برائے خصو صی اطفال ( عبدالرحیم خان ) کیمپس کا سنگ بنیاد رکھا
چکوال (ڈسٹرکٹ رپورٹر) عبدالعلیم خان نے رائزنگ سن انسٹیٹوٹ برائے خصو صی اطفال ( عبدالرحیم خان ) کیمپس کا سنگ بنیاد رکھا، سنگ بنیاد رکھنے کے موقع پر سابق گورنر پنجاب لیفنٹٹ جنرل ( ر) خالد مقبول، ڈاکٹر عبدالتواب( اعزازی صدر)، مسز عبدالتواب، کرنل ( ر) سلیم صاحب، محمود احمد اور فراز احمد چوہدری موجود
تھے، اس موقع عبدالعلیم خان نے پر کہا کہ خصو صی بچوں کو معاشرے میں برابر کا مقام دلانا ہم سب کا دینی اور قومی فریضہ ہے اور معاشرے کے ہر فرد کو اس ذمہ داری سے عہدہ برآں ہونا چاہیے اور بالخصوص ان خصوصی بچوں کو زیادہ سے زیادہ تعلیمی سہولیات ملنا چاہیے تاکہ وہ زندگی کے کسی بھی پہلو میں کمی کی پروا ہ کیے بغیر آگے بڑھ سکیں، انہوں نے کہا کہ فلاحی تنظیمیں خصو صی بچوں کی بحالی کے لئے گراں قدر خدمات سر انجام دے رہی ہیں، مخیر حضرات کو زیادہ سے زیادہ تعداد میں ایسے اداروں کی سر پرستی کرنا چاہیے، انہوں نے کہا کہ خصوصی بچے تھوڑی توجہ اور وسائل کی دستیابی سے معاشرے کا فعال حصہ بن سکتے ہیں حکومت کو اس اہم شعبہ کی طرف خصوصی توجہ کرنی چاہیے اور خصوصی بچوں کو زیادہ سے زیادہ سہولتیں فراہم کرنی چاہیے۔ عبدالعلیم خان نے پلاٹ اور اس پر چار منزلہ عمارت کی تعمیر اور سامان سن رائزنگ انسٹیٹوٹ کو دینے کا اعلان بھی کیا، اس موقع پر چئیرمین رائزنگ سن انسٹیٹوٹ اور سابق گورنر پنجاب خالد مقبول نے عبدالعلیم خان کا خصوصی شکریہ ادا کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ولیس آفیسر چکوال نے ایف آئی آر کے اندراج کی پاداش میں انسپکٹر تنویر جاوید وڑائچ کو معطل کر کے لائن حاضر کر دیا
چکوال (ڈسٹرکٹ رپورٹر) نشاط گروپ آف انڈسٹری و ایم سی بی کے چیف ایگزیکٹو میاں منشاء کے خلاف ایف آئی آر ایس ایچ او تھانہ کلرکہار کو مہنگی پڑی اور ڈسٹرکٹ پولیس آفیسر چکوال نے ایف آئی آر کے اندراج کی پاداش میں انسپکٹر تنویر جاوید وڑائچ کو معطل کر کے لائن حاضر کر دیا۔ تھانہ کلرکہار میں گزشتہ روز نشاط گروپ کے چیف ایگزیکٹو میاں منشاء اور ان کے بیٹے کے خلاف اقدام قتل کا مقدمہ درج کیا گیا تھا۔ ایف آئی آر درج ہوتے ہی اقتدار کے ایوانوں میں تھرتھلی مچ گئی ڈسٹرکٹ پولیس آفیسر کاشف مشتاق کانجو نے فوری طورپر ایکشن لیتے ہوئے انسپکٹر تنویر وڑائچ کو معطل کر کے لائن حاضر کر دیا ڈسٹرکٹ پولیس آفیسر کی طرف سے جاری کی جانے والی پریس ریلیز کے مطابق مقدمہ کے حالات و واقعات جھوٹے ہونے پر اسے خارج کر دیا گیا ہے اور واقعہ کی انکوائری کے لیے ایس ڈی پی او تلہ گنگ افتخار الحق خان کو انکوائری آفیسر مقرر کر دیا گیا ہے۔ دوسری جانب یہ بات بھی سامنے آئی ہے کہ میاں منشاء چونکہ میاں برادران کے قریبی ساتھیوں میں شمار ہوتے ہیں اس لیے ان کے خلاف ایف آئی آر درج ہوتے ہی حکومتی سطح پر کھلبلی مچ گئی اور اس سے پہلے کہ اعلیٰ حکومتی عہدیداران حرکت میں آتے ڈسٹرکٹ پولیس آفیسر نے مقدمہ خارج کرتے ہوئے ایس ایچ او تھانہ کو معطل کر کے اپنی کاروائی ڈال دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بھگوال میں چوری کی بڑھتی ہوئی وارداتوں کے خلاف پورا گائوں متحد ہوگیا
چکوال (ڈسٹرکٹ رپورٹر) بھگوال میں چوری کی بڑھتی ہوئی وارداتوں کے خلاف پورا گائوں متحد ہوگیا۔ علاقہ میں مقیم ہزاروں افغانیوں کو فوری طور پر علاقہ بدر کرنے کا مطالبہ۔ بھگوال اور گردونواح کے علاقے میں عرصہ دراز سے چوری اور ڈکیتی کی وارداتیں عام ہو رہی ہیں۔ اور کوئی دن ایسا نہیں گزرتا جب علاقے میں چوری یا ڈکیتی کی واردات نہ ہوتی ہو۔ علاقہ کی معروف سیاسی و سماجی شخصیت کپتان یار محمد کی صدارت میں عمائدین علاقہ کا ہنگامی اجتماع منعقد ہوا۔ جس میںپانچ سو سے زائد افرادنے شرکت کی۔ اجتماع کے شرکاء کا مطالبہ تھا علاقے میں ایک عرصے سے چوری اور ڈکیتی کی وارداتیں ہو رہی ہیں جبکہ پولیس وارداتوں پر قابو پانے میں ناکام ہو چکی ہے مکینوں کا کہنا تھا کہ جرائم میں افغانی ملوث ہیں اور اگر فوری طورپر افغانیوں کو علاقہ بدرکر کے ان کے کیمپوں تک محدود نہ کیا گیا تو پھر مجبوراً عوام کو خود ہتھیار اٹھانا پڑیں گے اور حالات کی تمام تر ذمہ داری انتظامیہ پر عائد ہوگی۔ اس موقع پر ایک قرارداد کے ذریعے مطالبہ کیا گیا کہ علاقہ کو افغانیوں کے چنگل سے فوری طور پر آزادی دلائی جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غیر قانونی طور پر ڈیزل لے کر جانیوالی دوگاڑیوں کو پکڑ کر مالکان کے خلاف مقدمات درج کر لیے گئے
چکوال (ڈسٹرکٹ رپورٹر) غیر قانونی طور پر ڈیزل لے کر جانیوالی دوگاڑیوں کو پکڑ کر مالکان کے خلاف مقدمات درج کر لیے گئے۔ محلہ عمر آباد کا محمد اصغر گاڑی نمبر 7092 جبکہ بڈھیال کا وقاص خان شہ زور نمبر ایل ای ڈی 4177 پر تیل والی ٹینکی میں تیل فروخت کرنے کے لیے لے جا رہا تھا ٹریفک پولیس کے انسپکٹر تنویر ثقلین نے پکڑ کر تھانہ سٹی کے حوالے کر دیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیز رفتار ٹریکٹر کی ٹکر سے موٹر سائیکل سوار شدید زخمی ہو گیا
چکوال (ڈسٹرکٹ رپورٹر) تیز رفتار ٹریکٹر کی ٹکر سے موٹر سائیکل سوار شدید زخمی ہو گیا۔ اسلام پورہ کا رہائشی عدنان حسین موٹر سائیکل پر اسلامیہ گرائونڈ کے قریب جا رہا تھا کہ مخالف سمت سے آنیوالا ٹریکٹر جسے ہسولہ کا مجید چلا رہا تھا نے ٹکر ماردی۔ جس سے وہ شدید زخمی ہو گیا۔ پولیس نے مقدمہ درج کرلیا۔
