ہم اُنہیں وہ ہمیں بُھلا بیٹھے
Posted on May 11, 2012 By Adeel Webmaster خمار بارہ بنکوی
sad couple
ہم اُنہیں وہ ہمیں بُھلا بیٹھے
دو گنہگار زہر کھا بیٹھے
حالِ غم کہہ کے غم بڑھا بیٹھے
تیر مارے تھے تیر کھا بیٹھے
آندھیو! جائو اب کرو آرام!
ہم خود اپنا دیا بجھا بیٹھے
جی تو ہلکا ہوا، مگر یارو
رو کے ہم لُطفِ غم گنوا بیٹھے
بے سہاروں کا حوصلہ ہی گیا
گھر میں گھبرائے در پہ آ بیٹھے
جب سے بچھڑے وہ مسکرائے نہ ہم
سب نے چھیڑا تو لب ہِلا بیٹھے
ہم رہے مبتلائے دیر و حرم
وہ دبے پائوں دل میں آ بیٹھے
اُٹھ کے اک بیوفا نے دیدی جان
رہ گئے سارے باوفا بیٹھے
حشر کا دن ابھی ہے دور خمار
آپ کیوں زاہدوں میں جا بیٹھے
خمار بارہ بنکوی
Khumar Barabankvi
جب کبھی مجھ کو غمِ دہر نے ناشاد کیا
