واشنگٹن (جیوڈیسک) متحدہ امریکہ کے صدر ڈونلڈ ٹرمپ نے کہا ہے کہ وہ اپنے چینی ہم منصب شی جن پنگ سے شمالی کوریا کے بارے میں بات چیت کریں گے۔
انھوں نے شمالی کوریا کی طرف سے امریکہ کے لیے دھمکیوں یا خطرات سے متعلق اپنے انتباہ کو دہراتے ہوئے کہا کہ “اگر گوام میں کچھ بھی ہوتا ہے، تو شمالی کوریا میں بہت بڑی مشکل صورتحال پیدا ہو جائے گی۔”
پیانگ یانگ نے دھمکی دی تھی کہ وہ بحرالکاہل میں امریکی خطے گوام کی طرف میزائل داغے گا۔ اس خطے میں امریکی افواج کا ایک بڑا مرکز موجود ہے۔
نیو جرسی میں صحافیوں سے گفتگو کرتے ہوئے ٹرمپ کا یہ بھی کہنا تھا کہ امریکہ، شمالی کوریا کے خلاف “جتنا ممکن ہو اتنی سخت” اضافی تعزیرات عائد کرنے پر بھی غور کر رہا ہے۔
ٹرمپ کا مزید کہنا تھا کہ انھیں امید ہے کہ شمالی کوریا حالیہ دنوں میں امریکہ کے خلاف جنگ کی دھمکیوں کے انتباہ کو خوب سمجھتا ہو گا۔
“مجھے امید ہے کہ جو میں نے کہا وہ اس کی شدت کو پوری طرح سمجھ جائیں گے۔”
ٹرمپ کے اس انتباہ سے قبل چین نے کہا تھا کہ اگر شمالی کوریا امریکی خطے یا اس سے ملحقہ علاقوں کے لیے حملے میں پہل کرتا ہے تو وہ پیانگ یانگ کا ساتھ نہیں دے گا۔
مشن جی ٹی روڈ: نواز شریف کا قافلہ شاہدرہ موڑ سے داتا دربار کی جانب گامزن
کوئٹہ: پشین سٹاپ کے قریب دھماکہ، 8 فوجی جوانوں سمیت 15 افراد شہید
