اسلام آباد (جیوڈیسک) اپوزیشن جماعت پاکستان مسلم لیگ ن کے مرکزی رہنما احسن اقبال نے جنوبی پنجاب صوبہ قائم کرنے کیلئے آئینی ترمیم میں وفاقی حکومت کی مدد کی پیشکش کر دی۔
نارووال میں میڈیا سے گفتگو کرتے ہوئے احسن اقبال نے کہا کہ حکومت جنوبی پنجاب صوبے کے قیام کا وعدہ پورا کرے، اپوزیشن مکمل تعاون کرے گی۔
سابق وفاقی وزیر داخلہ نے مزید کہا ہے کہ حکومت جلد انتخابات کا رسک نہیں لے گی، جلد انتخابات ہوئے تو عوام ان کے نمائندوں کی ضمانتیں ضبط کرادے گی۔
انہوں نے کہا کہ ہماری پانچ سال کی محنت پر پانی پھیر دیا گیا ہے، روپے کی قدر میں کمی کی مثال نہیں ملتی، روپیہ فٹ بال کی طرح لڑھک رہا ہے۔
احسن اقبال نے کہا کہ اس وقت جو ملک میں احتساب کا عمل ہے،یہ مسلم لیگ ن کے خلاف ٹارگٹ ہے، پی ٹی آئی کے لوگوں پر مسلم لیگ ن سے زیادہ سنگین مقدمات نیب میں زیر التوا ہیں،دیکھیں گے کہ نیب پی ٹی آئی کے لوگوں کو گرفتار کرنے میں کیا اتنی ہی پھرتی دکھاتی ہے جتنی شہبازشریف کی گرفتاری میں دکھائی گئی۔
بھارت میں انتخابات قریب، مسجد کی جگہ مندر کا معاملہ پھر گرم
بھارت میں جعلی پولیس مقابلے میں تین کشمیری حریت پسند شہید
