جنوبی کوریا (اصل میڈیا ڈیسک) عالمگير وبا کے باوجود جنوبی کوريا ميں بدھ کو ہونے والے انتخابات میں ووٹ ڈالنے کے لیے لاکھوں لوگوں نے ماسک اور حفاظتی دستانے پہن کر پولنگ اسٹیشنوں کا رخ کیا۔
کورونا وائرس کی وبا سے نمٹنے میں جنوبی کوریا کی کوششوں کو سراہا گیا ہے، جہاں حکام نے بڑے پیمانے پر ٹیسٹ کرائے اور شہریوں نے سماجی دوری سے متعلق حکومتی ہدایات پر عمل کیا۔ بدھ کے عام انتخابات میں لوگوں کی بڑی تعداد نے پولنگ اسٹیشنوں کا رخ کیا اور ووٹرز کی لمبی قطاریں دیکھی گئیں۔ حکام کی طرف سے شہریوں کو ایک دوسرے سے کم از کم ایک میٹر کا فاصلہ رکھنے کی ہدایات دی گئی تھیں۔ لوگوں نے سرجیکل ماسک پہن رکھے تھے اور ڈسپوزبل دستانے چڑھا رکھے تھے۔
پولنگ اسٹاف کے لیے بھی تمام حفاظتی سامان لازمی قرار دیا گیا تھا۔ پولنگ اسٹیشن میں داخلے کے وقت ووٹرز کا درجہ حرارت چیک کیا گیا اور ایسے لوگ جو بغیر ماسک کے آئے یا جنہیں بخار تھا، انہیں الگ کر کے ان کا ووٹ کاسٹ کرایا گیا۔
پولنگ اسٹیشن میں داخلے کے وقت ووٹرز پر لازم تھا کہ وہ سینیٹائزر سے اپنے ہاتھ صاف کریں اور پلاسٹک کے ڈسپوزبل دستانے پہن کر اپنا ووٹ کاسٹ کریں۔
اس موقع پر خود کو احتیاطی طور پر قرنطینہ میں رکھنے والے تیرہ ہزار سے زائد شہریوں کے لیے خصوصی انتظامات کیے گئے ہيں۔ انہیں ووٹنگ کا وقت ختم ہونے کے بعد پولنگ اسٹیشن لا کر ووٹ ڈلوایا جائے گا۔ اسی طرح کورونا کے لگ بھگ اٹھائیس سو مریضوں کے لیے الگ پولنگ اسٹیشن قائم کیے گئے ہيں اور انہیں ڈاک کے ذریعے ووٹ ڈالنے کا آپشن بھی دیا گیا۔
جنوبی کوریا میں کورونا کے دس ہزار سے زائد کیسز سامنے آ چکے ہيں جبکہ دو سو پچیس اموات ہوئی ہيں۔
ملک میں کورونا سے ہلاکتیں 107 ہو گئیں، مجموعی کیسز 5996 تک جا پہنچے
اس وقت صرف عوام کی زندگیوں کا سوچیں، وزیراعلیٰ سندھ کی ہاتھ جوڑ کر اپیل
