ممبئی (اصل میڈیا ڈیسک) بھارتی ریاست اترکھنڈ کے وزیراعلیٰ تیرتھ سنگھ راوت کے خواتین کی جینز سے متعلق متنازع بیان پر بھارتی اداکارہ اور راجیا سبھا کی ممبر جیا بچن نے انہیں آڑے ہاتھوں لیا ہے۔
بھارتی میڈیا کے مطابق چند روز قبل اتراکھنڈ کے وزیراعلیٰ نے خواتین سے متعلق متنازع بیان دیتے ہوئے کہا تھا کہ خواتین کا پھٹی ہوئی جینز پہننا سماجی تباہی کا باعث ہے اگر خواتین پھٹی ہوئی جینز پہنیں گی تو اس کا معاشرے پر اور بچوں پر کیا اثر پڑے گا یہ کوئی اچھی مثال نہیں۔
بھارتی وزیر کے اس بیان نے بھارت میں ہلچل مچادی ہے اور ان کے اس بیان کے خلاف متعدد آوازیں اٹھ رہی ہیں۔ حال ہی میں بھارتی اداکارہ اور سیاستدان جیا بچن نے اس متنازع بیان کی وجہ سے بھارتی وزیر کو آڑے ہاتھوں لیتے ہوئے کہا ہے ’’لوگوں کی یہی ذہنیت خواتین کے خلاف جرائم کو بڑھاوا دیتی ہے۔‘‘ اس طرح کے بیانات دینا کسی وزیراعلیٰ کو زیب نہیں دیتا۔ اعلیٰ عہدوں پر تعینات لوگوں کو عوامی بیانات دینے سے پہلے سوچنا چاہئے۔ آپ آج کے دور میں ایسی باتیں کررہے ہیں۔ کیا آپ کپڑوں کی بنیاد پر فیصلہ کریں گے کہ کون مہذب ہے اور کون نہیں؟
واضح رہے کہ گزشتہ روز جیا بچن کی نواسی نویا نے بھی وزیراعلیٰ اتراکھنڈ کے بیان پر غصے کا اظہار کرتے ہوئے کہا تھا ہمارے کپڑے بدلنے سے پہلے اپنی ذہنیت بدلو۔ نویا نے سوشل میڈیا پر پھٹی ہوئی جینز پہن کر تصویر بھی شیئر کی تھی اور کہا تھا کہ میں فخر کے ساتھ پھٹی ہوئی جینز پہنوں گی۔
عامر خان نے سوشل میڈیا کو اچانک خیرباد کہنے کی وجہ بتا دی
جان ابراہم نے ایوارڈ فنکشنز کو سرکس قرار دیدیا
