کراچی (اصل میڈیا ڈیسک) متحدہ قومی موومنٹ (ایم کیو ایم) بحالی کمیٹی کے سربراہ ڈاکٹر فاروق ستار نے یوم تاسیس کے جلسے میں پیش گوئی کی ہے کہ اگلے سال یوم تاسیس دو جگہوں پر نہیں بلکہ ایک جگہ پر ہوگا۔
ایم کیو ایم بحالی کمیٹی کے پی آئی بی میں یوم تاسیس کے موقع پر جلسہ عام سے خطاب میں فاروق ستار کا کہنا تھاکہ آج ہم نظریہ ایم کیوایم کا 37 واں یوم تاسیس منارہے ہیں، وعدہ کیا تھا کہ نظریاتی تحریک اورنظریےکو قائم کروں گا۔
انہوں نے مطالبہ کیا کہ بند دفاتر کھولے جائیں یا جہاں ہم چاہیں، وہاں ہمارے دفاتر کھلنے دیے جائیں۔
فاروق ستار نے پیش گوئی بھی کہ اگلے سال یوم تاسیس دو جگہوں پر نہیں ایک جگہ پر ہو گا۔
خیال رہے کہ متحدہ قومی موومنٹ (ایم کیو ایم) پاکستان نے گزشتہ روز یوم تاسیس منایا تھا اور یوم تاسیس کا جلسہ نشتر پارک میں ہوا تھا جس میں خالد مقبول صدیقی سمیت دیگر رہنماؤں نے خطاب کیا تھا۔
کراچی کے حوالے سے سربراہ بحالی کمیٹی کا کہنا تھاکہ تمام شہروں کے وسائل کے حساب سے پیکج ملنا چاہیے، جس دن درست مردم شماری ہوگی وڈیرہ شاہی کا خاتمہ ہو گا۔
فاروق ستار کا کہنا تھاکہ کراچی ڈوبا تو 11 سو ارب کا اعلان ہوا، 6 ماہ گزرگئے رقم نہیں مل سکی، گجرنالہ اور اورنگی نالےکےاطراف لوگوں کے گھرتوڑےجارہے ہیں، سندھ میں غیر آئینی کوٹہ سسٹم کو ختم کرائیں گے۔
بحالی کمیٹی کے سربراہ کا کہنا تھاکہ تیل کی قیمتوں کا بحران حکومت کی اپنی ٹیم نے کیا، ملک میں مہنگائی نےعوام کی کمرتوڑدی ہے، بیروزگاری اور مہنگائی نے عوام کو تباہ کردیا۔
انہوں نے کہا کہ پانی کی قلت نے عوام کوپریشان کیا ہوا ہے، کراچی کے ساتھ پورے سندھ کے شہری علاقے تباہ ہو چکے، ملک کے بلدیاتی ادارے مالی بحران کا شکار ہیں۔
فاروق ستار نے اعلان کیا کہ رمضان کے بعد کراچی کے مسائل پر تحریک چلائیں گے۔
پاکستان کا زمین سے زمین تک مار کرنیوالے بیلسٹک میزائل کا کامیاب تجربہ
پاکستان: 9 ماہ بعد ایک دن میں سب سے زیادہ کورونا کیسز رپورٹ، مزید 67 اموات
