لاہور (اصل میڈیا ڈیسک) پاکستان نے انگلینڈ کو پہلے ٹی 20 میچ میں 31 رنز سے شکست دیکر تین میچوں کی سیریز میں ایک صفر کی برتری حاصل کر لی۔
ناٹنگھم میں کھیلے جارہے پہلے ٹی ٹوئنٹی میچ میں انگلش ٹیم کے کپتان نے ٹاس جیت کر پاکستان کو پہلے بیٹنگ کی دعوت دی جس پر قومی ٹیم کے بلے بازوں نے بہترین بلے بازی کرتے ہوئے مقررہ اوورز میں 6 وکٹوں کے نقصان پر 232 رنز بنائے۔
خیال رہےکہ یہ قومی ٹیم کا اب تک ٹی ٹوئنٹی انٹرنیشنل میچز میں کسی بھی ٹیم کے خلاف سب سے بڑا اسکور ہے، اس سے قبل قومی ٹیم کا سب سے بڑا اسکور 205 رنز تھا۔
جواب میں انگلینڈ کی ٹیم آخری اوور کی دوسری گیند پر 201 رنز بنا کر آؤٹ ہو گئی۔ انگلینڈ کی جانب سے لیام لیونگسٹن نے 9 چھکوں اور 6 چوکوں کی مدد سے شاندار سنچری اسکور کی مگر وہ اپنی ٹیم کو فتح نہ دلوا سکے۔
لیام لیونگسٹن نے 43 گیندوں پر 103 رنز بنائے جب کہ جیسن رائے 32 رنز بناکر آؤٹ ہوئے۔ انگلش کپتان این مورگن اور ڈیوڈ ویلی نے 16، 16 اسکور کیے بنائے۔
پاکستان کی جانب سے شاہین شاہ آفریدی اور شاداب خان نے تین تین کھلاڑیوں کو آؤٹ کیا جب کہ عماد وسیم ، محمد حسنین اور حارث رؤف نے ایک ایک وکٹ حاصل کی۔
کپتان بابر اعظم نے شاندار بلے بازی کی اور49 گیندوں پر 85 رنز کی اننگز کھیلی، ان کی اننگز میں 3 چھکے اور 8 چوکے شامل تھے۔ محمد رضوان نے بھی ان کا خوب ساتھ دیا اور انہوں نے 41 گیندوں پر 63 رنز اسکور کیے۔
ان کے علاوہ فخرزمان نے 26 ، محمد حفیظ نے24 اور صہیب مقصود نے 19 رنز بنائے۔
انگلینڈ کی جانب سے ٹام کرن نے 2 جب کہ ثاقب محمود، ڈیوڈ ویلی اور گریگوری نے ایک، ایک وکٹ حاصل کی۔
لاہور: دسویں جماعت کے امتحانات کی تاریخ کا اعلان ہو گیا
پنجاب میں مزید 24 شہریوں میں ڈیلٹا وائرس کی تصدیق
