کوہاٹ (اصل میڈیا ڈیسک) درہ آدم خیل کے مقام پر نامعلوم افراد نے وفاقی وزیر برائے سائنس و ٹیکنالوجی شبلی فراز کی گاڑی پر فائرنگ کردی تاہم خوش قمستی سے وہ حملے میں محفوظ رہے۔
وفاقی وزیر شبلی فراز آبائی علاقے کوہاٹ سے پشاور آرہے تھے کہ درہ آدم خیل کے مقام پرنامعلوم افراد نے گاڑی پر فائرنگ کر دی۔
حملے میں وفاقی وزیر محفوظ رہے تاہم ان کے گارڈ اور ڈرائیور زخمی ہوگئے جبکہ مقامی پولیس بھی جائے وقوعہ پر پہنچ گئی۔
نامعلوم افراد کی فائرنگ سے گاڑی کے شیشے ٹوٹ گئے۔
وفاقی وزیر شبلی فراز کا کہنا تھاکہ الحمداللہ محفوظ ہوں مگر ڈرائیور زخمی ہے، ڈرائیور کو علاج کیلئے پشاور منتقل کررہے ہیں۔
اُدھر وفاقی وزیر اطلاعات فواد چوہدری نے ٹوئٹ میں کہا کہ اطلاعات ہیں کہ وفاقی وزیر شبلی فراز پر کوہاٹ جاتے ہوئے درہ آدم خیل کے مقام پر فائرنگ کی گئی ہے۔
ان کا کہنا تھاکہ اللہ کا شکر ہے وہ حملے میں محفوظ رہے لیکن بدقسمتی سے ڈرائیور شدید زخمی ہے جن کو اسپتال منتقل کیا گیا ہے۔
دوسری جانب ڈپٹی انسپکٹر جنرل (ڈی آئی جی) کوہاٹ طاہر ایوب نے کہا ہے کہ وفاقی وزیر شبلی فراز کی گاڑی پر فائرنگ نہیں پتھراؤ ہوا ہے۔
ان کا کہنا تھاکہ شبلی فراز اپنے حلقے میں ووٹ ڈالنے کے بعد واپس پشاور جا رہے تھے۔
ڈی آئی جی کوہاٹ نے گفتگو کے دوران کہا کہ پتھراؤ کےباعث ایک پولیس اہلکار زخمی ہوا جس کی حالت خطرے سے باہر ہے۔
ان کا کہنا تھاکہ پتھراؤ سے شبلی فراز کی گاڑی کی فرنٹ ونڈ اسکرین ٹوٹی ہے، حملے کے وقت شبلی فراز کے ساتھ پولیس اسکواڈ تھا، شبلی فرازکوبحفاظت پشاور پہنچا دیا گیا۔
خیبرپختونخوا بلدیاتی انتخابات: خودکش دھماکے اور فائرنگ کے مختلف واقعات میں 4 افراد جاں بحق، متعدد زخمی
او آئی سی کا انسانی ٹرسٹ فنڈ کے قیام پر اتفاق؛ افغانوں کے لیے فوڈ سکیورٹی پروگرام کا آغاز
