سوات (اصل میڈیا ڈیسک) خیبرپختونخواہ میں بلدیاتی انتخابات کے دوسرے مرحلے کے دوران ضابطہ اخلاق کی خلاف ورزی پر الیکشن کمیشن نے وزیراعظم عمران خان کو نوٹس جاری کردیا۔
الیکشن کمیشن آف پاکستان (ای سی پی) کی جانب سے خیبرپختونخواہ کے وزیراعلیٰ محمود خان، وزیر خارجہ شاہ محمود قریشی، وفاقی وزیر مراد سعید، صوبائی وزراء محب اللہ اور ڈاکٹر امجد علی کو بھی نوٹسسز جاری کیے گئے ہیں۔
اعلامیے کے مطابق ضابطہ اخلاق کی خلاف ورزی کا نوٹس ڈسٹرکٹ مانیٹرنگ آفیسر سوات کی جانب سے جاری کیا گیا ہے جبکہ وزیراعظم، وزیراعلیٰ، وفاقی وزراء اور صوبائی وزراء کو خود یا بذریعہ وکیل 18 مارچ کو پیش ہونے کی ہدایت کی گئی ہے۔
دوسری جانب الیکشن کمیشن نے کل وزیراعظم عمران خان کو سوات کا دورہ کرنے سے منع بھی کیا تھا لیکن انہوں نے دورہ بھی کیا اور عوامی اجتماع سے خطاب کیا تھا۔
اس سے قبل بھی الیکشن کمیشن نے وزیراعظم کو دیر میں جلسہ عام سے خطاب کرنے پر نوٹس جاری کیا تھا۔
یاد رہے کہ الیکشن کمیشن کے نئے ضابطہ اخلاق کے مطابق کوئی بھی پبلک آفس ہولڈر انتخابات والے اضلاع کا دورہ نہیں کرسکتا ہے، کے پی کے میں بلدیاتی انتخابات کا دوسرا مرحلہ 31 مارچ کو شیڈول ہے۔
حکومت کے لوگ ثواب سمجھ کر عمران نیازی کیخلاف ووٹ ڈالیں گے: رانا ثنااللہ
حکومت سندھ ہاؤس اسلام آباد پر حملے کی تیاری کر رہی ہے: پی پی کا الزام
