یہ زمینی بھی زمانی بھی
Posted on February 27, 2012 By Adeel Webmaster عدیل زیدی
past present
یہ زمینی بھی زمانی بھی
فطرتِ عشق آسمانی بھی
شرط ہے جاں سے جائے پہلے
ہے عجب عمرِ جاودانی بھی
تم نے جو داستان سنائی ہے
ہے وہی تو مری کہانی بھی
کتنے دلچسپ لگنے لگتے ہیں!
میرے قصّے تری زبانی بھی
ہیں ضروری بہت ہمارے لئے
یہ فضا، آگ اور پانی بھی
ہو گئی ختم اِک کرن کے ساتھ
”رات بھی، نیند بھی، کہانی بھی ”
مت اُنہیں جانیے در و دیوار
ہیں یہاں یادیں کچھ سُہانی بھی
ہاں اِنہی پر کہیں ہوئی تحریر
میرے ماں باپ کی جوانی بھی
ہم جنہیں چھوڑ کر چلے آئے
تھے وہ اجداد کی نشانی بھی
لامکاں ہی کا ذکرِ خیر عدیل
گو ہیں قصّے بہت مکانی بھی
عدیل زیدی
تو جو چاہے بھی تو صیّاد نہیں ہونے کے
گھر عطا کر مکاں سے کیا حاصل
