وہ سامنے تھا پھر بھی کہاں سامنا ہوا
Posted on May 8, 2012 By Adeel Webmaster شکیب جلالی
broken heart couple
وہ سامنے تھا پھر بھی کہاں سامنا ہوا
رہتا ہے اپنے نور میں سورج چھپا ہوا
اے روشنی کی لہر، کبھی تو پلٹ کے آ
تجھ کو بُلا رہا ہے دریچہ کھلا ہوا
سیراب کس طرح ہو زمیں دور دور کی
ساحل نے ہے ندی کو مقید کیا ہوا
اے دوست،چشمِ شوق نے دیکھا ہے بارہا
بجلی سے تیرا نام گھٹا پر لکھا ہوا
پہچانتے نہیں اسے محفل میں دوست بھی
چہرہ ہو جس کا گردِ الم سے اٹا ہوا
اس دور میں خلوص کا کیا کام اے شکیب
کیوں کر چلے بساط پہ مُہرہ پِٹا ہوا
شکیب جلالی
آگ کے درمیان سے نکلا
رعنائی نگاہ کو قالب میں ڈھالیے