جھنجھلائےہیں، لجائےہیں پھر مسکرائے ہیں
Posted on May 15, 2012 By Adeel Webmaster خمار بارہ بنکوی
uljhan
جھنجھلائےہیں، لجائےہیں پھر مسکرائے ہیں
کس اہتمام سے انہیں ہم یاد آئے ہیں
دیر و حرم کے حبس کدوں کے ستائے ہیں
ہم آج میکدے کی ہوا کھانے آئے ہیں
اب جا کے آہ کرنے کے آداب آئے ہیں
دنیا سمجھ رہی ہے کہ ہم مسکرائے ہیں
گزرے ہیں میکدے سے جو توبہ کے بعد ہم
کچھ دور عادتاً بھی قدم ڈگمگائے ہیں
اے جوشِ گریہ دیکھ نہ کرنا خجل مجھے
آنکھیں مری ضرور ہیں، آنسو پرائے ہیں
اے موت! اے بہشت سکوں! خوش آمدید
ہم زندگی میں پہلے پہل مسکرائے ہیں
جتنی بھی میکدے میں ہے ساقی پلا دے آج
ہم تشنہ کام زُہد کے صحرا سے آئے ہیں
انسان جیتے جی کریں توبہ خطائوں سے
مجبوریوں نے کتنے فرشتے بنائے ہیں
سمجھاتے قبلِ عشق تو ممکن تھا بنتی بات
ناصح غریب اب ہمیں سمجھانے آئے ہیں
کعبے میں خیریت تو ہے سب حضرتِ خمار
یہ دیر ہے جناب یہاں کیسے آئے ہیں
خمار بارہ بنکوی
عشق خدا کی دین ہے، عشق سے منہ نہ موڑیے
جبیں عشق میں آسرا دینے والے
