گجرات کی خبریں 26.06.2013
Posted on June 27, 2013 By Tahir Webmaster گجرات
رمضان المبارک کے دوران امن و امان قائم رکھنے کے لئے ضلعی انتظامیہ پوری طرح الرٹ ہے:ڈی سی او گجرات
گجرات (جی پی آئی )ڈی سی او آصف بلال لودھی نے کہا ہے کہ رمضان المبارک کے دوران امن و امان قائم رکھنے کے لئے ضلعی انتظامیہ پوری طرح الرٹ ہے، اس مقصد کے لئے تمام وسائل بروئے کار لائے جائیں گے۔ ان خیالات کااظہار انہوں نے ضلعی امن کمیٹی کے اجلاس سے خطاب کرتے ہوئے کیا۔ ایڈیشنل ڈسٹرکٹ کلکٹر سمیر احمد سید، ڈی او سی شجاع قطب بھٹی اسسٹنٹ کمشنرز چوہدری عمر فاروق وڑائچ، افضل حیات تارڑ ،ای ڈی اوزچوہدری محمد نواز، محمد نواز غازی ، سیاسی شخصیات چوہدری مبشر حسین، حاجی ناصر محمود، ملک جمیل اعوان، نوابزادہ طاہر الملک، صدر چیمبر آف کامرس عدنان مکی، صدر مرکزی انجمن تاجران جاوید بٹ، چوہدری منظور حسین، سید الطاف الرحمان، راجہ نصراللہ، سیف الرحمان بھٹی، منور کھوکھر، پولیس اور و دیگرمحکموں کے افسران، سیاسی سماجی شخصیات ، اور تاجر نمائندوں نے بھر پور شرکت کی۔ڈی سی او آصف بلا ل لودھی نے کہا کہ ماہ مقدس کے دوران لائوڈ سپیکر کے استعمال پر مکمل پابندی یقینی بنائی جائے گی ۔ انہوں نے ہدایت کی کہ اس نوعیت کی کسی بھی شکایت کی صورت میں اسسٹنٹ کمشنرز اورایس ڈی پی اوزموقع پر جاکر صورتحال کا جائزہ لے کر شکایت کا ازالہ کریں۔انہوںنے کہا کہ ماہ رمضان المبارک کے دوران ہر قسم کے مذہبی اجتماعات کی سکیورٹی یقینی بنائی جائے گی جبکہ علماء کرام کی بھی ذمہ داری ہے کہ وہ مذہبی ہم آہنگی اور بھائی چارے اور برداشت کو فروغ دیں اور اپنے پیروکاروںپر نظر رکھیں، ڈی سی او نے بتایا کہ ماہ رمضان کے دوران سحر، افطار اور تراویح کے اوقات میں پولیس سکیورٹی فراہم کرے گی جبکہ دیہی علاقوں میں ایس ایچ اوز متعلقہ نمبر دار یا عوامی نمائندوں سے ملکر سکیورٹی نظام تشکیل دیں گے۔ انہوں نے
بتایا کہ ماہ رمضان کے دوران ضلع میں سستے رمضان بازاروں کاانعقاد کیا جائے گا اس کے ساتھ ماڈل بازار کو فعال بنانے کے لئے بھی عملی کاوشیں کی جارہی ہیں۔ انہوں نے ای ڈی او ورکس کو ہدایت کی کہ جن سٹرکوں پر ضرورت ہو وہاں بلاتاخیر پیچ ورک شروع کیا جائے۔ڈی سی او آصف بلال لودھی نے اس امید کا اظہا ر کیا کہ ماہ رمضان المبارک کے دوان گیپکو غیر اعلانیہ لوڈ شیڈنگ پر کنٹرول کرے گا ۔ انہوں شہرویوں سے بھی اپیل کی کہ موجودہ صورتحال میں بجلی کی بچت کرکے ہم لوڈ شیڈنگ پر کنٹرول میں معاون ثابت ہوسکتے ہیں۔ اس موقع پر خطاب کرتے ہوئے شرکاء نے سکیورٹی، لوڈ شیڈنگ اور دیگر معاملات پر تجاویز دیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میری اولین ترجیح گجرات میں امن و اما ن کی صورت حال بہتر بناناہے،:علی ناصر رضوی
گجرات(جی پی آئی)ڈی پی او علی ناصر رضوی نے کہا ہے کہ میری اولین ترجیح گجرات میں امن و اما ن کی صورت حال بہتر بناناہے، سنگین جرائم میں ملوث عناصر کے خلاف بھر پور کریک ڈائون کیا جائے گا اور سنگین جرائم میں مطلوب اشتہاریوں کی گرفتاری کے لئے موثر حکمت عملی اپنانے کی ہدایت کی گئی ہے۔ ان خیالات کا اظہار انہوں نے کالم نگار ادیب جاودانی سے بات چیت کے دوران کیا۔علی ناصر رضوی نے کہا کہ عوام میں احساس تحفظ پید ا کرنے اور جرائم کی بیخ کنی کے لئے زیادہ سے زیادہ اشتہاریوں کی گرفتاری نہایت اہمیت کی حامل ہے اس مقصد کے لئے آپریشن، انوسٹی گیشن اور سی آئی اے کے افسران اور اہلکاروںپر مشتمل ٹیمیں تشکیل دے دی گئی ہیں۔ انہوں نے کہا کہ پولیس کو کرپشن سے پاک کرنے کے لئے ٹھوس اقدامات کئے جارہے ہیں تاکہ عوام کو فوری انصاف مہیا کیا جا سکے۔ڈی پی او نے کہا کہ قبضہ گروپوں، منشیات فروشوں، قحبہ خانوں، جوئے کے اڈوں کی از سر نو فہرستیں مرتب کی جارہی ہیں تاکہ ان جرائم میں ملوث عناصرکے خلاف وسیع پیمانے پر کریک ڈائون شروع کیا جا سکے۔انہوں نے واضع کیا کہ جرائم کی سرپرستی کرنے والے پولیس اہلکاروں کو ملازمت سے برطرف کردیا جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات پولیس کی منشیا ت فروشوں اور ناجائز اسلحہ کے خلاف کارروائی
گجرات (جی پی آئی)گجرات پولیس نے منشیا ت فروشوں اور ناجائز اسلحہ کے خلاف کارروائی کرتے ہو ئے 110گرام چرس ،1عدد پسٹل 30بور اور 1عدد رائفل 244 بور،2بوتل شراب اور 1کس شرابی گرفتار کرکے 6ملزمان کے خلاف مقدمات درج کرلیے۔تھانہ لاری اڈہ پولیس نے مخبر کی اطلا ع پر 2کس ملزمان سے شراب برآمد کرکے دونوں کے خلاف الگ الگ مقدمات درج کرلئے (١) واجد حسین ولد غلام دین قوم ماچھی سکنہ کالو پورہ سے 1 بوتل (٢) محمد ارشد ولد محمد شفیع قوم آرائیں سکنہ مقبول آباد سے 1 بوتل،تھانہ رحمانیہ پولیس نے دوران ناکہ بندی ملزم (١) محمد قاسم سے 110گرام چر س اور ملزم (٢) سکندر علی سکنہ ماڈل ٹائون کو نشہ شراب کی حالت میں گرفتار کرکے مقدمات درج کر لئے۔ تھانہ کنجاہ پولیس نے دوران گشت 2کس ملزمان سے ناجائز اسلحہ برآمد کرکے مقدمات درج کرلئے (١) سکندر عباس ولد محمد نذیر قوم وڑائچ سکنہ اچھراسے رائفل 244 بور (٢) خرم شہزاد ولد غلام علی قوم کشمیری سکنہ چکریاں سے پسٹل 30بور برآمد کر کے الگ الگ مقدمات درج کر لیے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات سنی تحریک کا اہم اجلاس ، علامہ ایاز نعیمی سٹی صد ر منتخب
گجرات (جی پی آئی)پاکستان سنی تحریک گجرات کا اہم اجلاس گزشتہ روز فاطمة الزہراء اکیڈمی چاہ بڈھے والا میں پیر سید مبشر شاہ ضلعی صدر پاکستان سنی تحریک کی زیر صدارت منعقد ہوا۔جس میں گجرات کے اہم معاملات پر سنجیدگی سے غوروفکر کیا گیا ۔راہنما سنی تحریک پیر سید وقار حسین شاہ کی المناک شہادت ، اور ان کے قاتلوں کی26روز گزرنے کے باوجود عدم گرفتاری کو بھی لمحہ فکریہ قرار دیا گیا۔ اس اجلاس میں سنی تحریک گجرات کی نئی باڈی بھی تشکیل دی گئی ۔جس میں علامہ ایاز اختر نعیمی اشرفی، فاضل جامعہ نعیمیہ لاہور ،کو سٹی گجرات کا صدر، علامہ عظیم قادری ، قاری محسن رضا قادری، اور محمد ناظم کھوکھر پر رابطہ کمیٹی تشکیل دی گئی۔ اس موقع پر سنی تحریک کے متعدد اہم عہدیداران اور کارکنان بھی موجود تھے ۔آخر میں ضلعی صدر سنی تحریک پیر سید مبشر حسین شاہ نے علامہ ایاز نعیمی کو سٹی صدر منتخب ہونے پر مبارکباد دی اورتمام کارکنان کی دین اسلام پر ثابت قدمی اور دین اسلام کی سربلندی کے لیے کوشاں رہنے کی خصوصی دعا فرمائی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان تحریک انصاف کے ضلعی عہدیداران کا اجلاس صدر چوہدری محمد الیاس کی صدارت میں ضلعی سیکرٹریٹ یوسف پلازہ میں ہوا
گجرات(جی پی آئی)پاکستان تحریک انصاف کے ضلعی عہدیداران کا اجلاس صدر چوہدری محمد الیاس کی صدارت میں ضلعی سیکرٹریٹ یوسف پلازہ میں ہوا۔ جس میں ضلع بھر سے عہدیداران نے شرکت کی ۔ اجلاس میں اہم فیصلے بھی کیے گئے ، اور عہد کیا گیا کہ مل کر ضلع گجرات میں پاکستان تحریک انصاف کو بھر پور انداز میں فعال کیا جائیگا۔ اجلاس میں نانگا پربت، گلگت بلتستان کے سانحہ، کوئٹہ، پشاور میں بم دھماکوں میں ہلاک ہونیوالے افراد کے لواحقین سے اظہار افسوس کیا گیا اور دعائے مغفرت کی گئی۔ ضلع گجرات میں غیر اعلانیہ لوڈ شیدنگ پر بھی گہری تشویش کا اظہار کیا گیا۔ اس موقع پر جنرل سیکرٹری چوہدری شرافت حسین نے میٹنگ کا ایجنڈا بھی پیش کیا ۔ اجلاس میں نائب صدر ضلع گجرات مرزا عثمان اقبال، سیکرٹری یوتھ ضلع گجرات فیضان خالد بٹ ، ISF صدر ضلع گجرات ثاقب ورک، ضلعی نائب صدر خواتین نورین اشفاق، ضلعی سیکرٹری سعدیہ، ضلعی جائنٹ سیکرٹری ربیعہ شاہین، لیبر ونگ کے صدر محمد رمضان ، سیکرٹری کلچر ونگ، محمد امین، سیکرٹری کسان ونگ ضلع گجرات چوہدری بہادر خان، ضلعی سیکرٹری اطلاعات ملک عبدالستار، ضلعی جائنٹ سیکرٹری کلیووال سیداں، ضلعی سیکرٹری ڈاکٹر خضر حیات، سیکرٹری پبلک سٹی لیبر ونگ عرفان یوسف و دیگر عہدیداران نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوکی گڑھی احمد آباد پولیس نے شراب فروخت کرنے اور پینے والے دو افراد ہزاروں روپے لیکر چھوڑ دیا
گجرات ( جی پی آئی ) چوکی گڑھی احمد آباد پولیس نے شراب فروخت کرنے اور پینے والے دو افراد ہزاروں روپے لیکر چھوڑ دیا علاقہ کے لوگوں کا چوکی انچارج اور پولیس عملہ کے خلاف احتجاج گذشتہ روز چوکی گڑھی احمد آباد کے انچارج اور عملہ نے شراب فروخت کرنے والے ارشد اور خریدار واجد حسین کو رنگے ہاتھوںح گرفتار کرنے کے بعد ساری رات چوکی میں بٹھا کر صبح سویرے ہزاروں روپے رشوت لیکر چھوڑ دیا یاد رہے کہ چوکی گڑھی احمد آباد میں منشیات فروشی کا دھندا عروج پر ہے مگر پولیس نذرانہ لیکر سب اچھے کی رپورٹ پیش کر رہی ہے علاقہ کے مکینوں چوکی انچارج اور عملہ کے خلاف فوری ایکشن لینے کا مطالبہ کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹی ایم او گجرات اور ایڈمنسٹریٹر سمیر احمد سید کی خصوصی ہدایت پر شہر بھر کے نالوں کا صفائی کا کام ہنگامی بنیادوں پر شروع کر دیا : نصر اللہ کنگ
گجرات ( جی پی آئی ) ٹی ایم اے گجرات کے چیف سینٹری انسپکٹر چوہدری نصر اللہ کنگ نے کہا ہے کہ ٹی ایم او گجرات اور ایڈمنسٹریٹر بلدیہ گجرات سمیر احمد سید کی خصوصی ہدایت پر شہر بھر کے نالوں کا صفائی کا کام ہنگامی بنیادوں پر شروع کر دیا ہے تاکہ آنے والے برسات کے دنوں میں مشکلات پیش نہ آ سکیں انہوں نے کہا کہ ٹی ایم اے گجرات کا عملہ دن رات نالوں کی صفائی اور سوریج کی صفائی کیلئے کام کر رہا ہے تاکہ نکاسی آب کا نظام بہتر ہو سکے انہوں نے مزید کہا کہ گجرات شہر میں نالوں کی صفائی کے سلسلہ میں تین زون میں تقسیم کیا گیا ہے تاکہ صفائی کے نظام کو بہتر بنایا جا سکے اس سلسلہ میں چیف آفیسر ٹی ایم اے چوہدری فیاض احمد کی نگرانی میں ٹی ایم اے گجرات کا عملہ نالوں کی صفائی میں مصروف عمل ہے۔
۔۔۔۔۔۔۔۔۔۔۔۔
ٹی ایم اے گجرات کے عملہ نے برسات سے نمٹنے کیلئے دوکانداروں کو تنگ کرنا شروع کر دیا
گجرات (جی پی آئی ) ٹی ایم اے گجرات کے عملہ نے برسات سے نمٹنے کیلئے دوکانداروں کو تنگ کرنا شروع کر دیا فوارہ چوک سے لیکر پرانا لاری اڈا کے دونوں اطراف کے ناموں کی صفائی کے دوران ٹی ایم اے کے سینٹری ورکروں نے گندے ناموں سے گند نکال کر سڑک پر بڑے بڑے ڈھیر لگا دئیے ہیں جس کی وجہ سے راہگیروں اور بالخصوص دوکانداروں کو سخت مشکلات کا سامنا کرنا پڑا دوسری طرف ٹی ایم اے کے عملہ نے دوکانوں کے باہر پڑی ہوئی پڑیاں اکھیڑ کر ہزاروں روپے کا نقصان کر دیا دوکانداورں کا کہنا ہے کہ ٹی ایم اے گجرات کا عملہ ایک دن قبل ہمیں نوٹس دیتا ہے ہم نے خود ہی نالے خالی کر دئیے تھے ٹی ایم اے کا عملہ ہمارا نقصان پورا کرے نالوں کی صفائی کے دوران گندگی کے بڑے ڈھیروں سے اٹھنے والی بدبو اور تعفن نے تاجروں کا جینا دوبھر کر دیا ہے فوری طور پر گندگی کے ڈھیر اٹھوائے جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈی پی او گجرات علی ناصر رضوی حقوق شہریاں کی طرف ہر ممکن تعاون کا یقین دلاتے ہیں : سید باقر رضوی
گجرات (جی پی آئی) انجمن حقوق شہریاں گجرات کے چیئرمین اور ممتاز سیاسی و سماجی شخصیت سید باقر رضوی نے گجرات میں تعینات ہونے والے نئے ڈی پی او ناصر علی رضوی کو خوش آمدید کہتے ہوئے کہا کہ ڈی پی او گجرات علی ناصر رضوی حقوق شہریاں کی طرف ہر ممکن تعاون کا یقین دلاتے ہیں اور امید کرتے ہیں کہ وہ اپنی فہم و فراست سے گجرات پولیس کے وقار کو بلند کرتے ہوئے ڈی پی او آفس میں ٹائوٹ سسٹم کا خاتمہ کرتے ہوئے شہریوں کو بھرپور ریلیف دیں گے سید باقر رضوی نے کہا کہ ڈی پی او صاحب ہم یہ بھی امید کرتے ہیں کہ آپ ضلع گجرات کو دشمنیوں اور اشتہاریوں سے پاک کر کے گجرات کو امن کا گہوارہ بنائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عنقریب پاک ایمپلائز یونین سی بی اے گجرات ٹی ایم اے کے کرپٹ افسران کے خلاف پریس کانفرنس کرے گی : فراست حسین ڈار
گجرات ( جی پی آئی ) پاک ایمپلائز یونین سی بی اے ٹی ایم اے گجرات کے صدر فراست حسین ڈار جنرل سیکرٹری مرزا شاہد اقبال نے بتایا ہے کہ عنقریب پاک ایمپلائز یونین سی بی اے گجرات ٹی ایم اے کے کرپٹ افسران کے خلاف پریس کانفرنس کرے گی جس میں ٹی ایم اے میں ہونے والی بے ضابطگیوں کو منظر عام پر لایا جائے گا اس سلسلہ میں ٹی ایم او گجرات ایڈمنسٹریٹر بلدیہ کو آگاہ کر دیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضرت کبیر الدین دریائی اور حضرت حاجی سید محمد نوشاہ گنج بخش المعروف نوشو پاک کا عرس مبارک آج سے شروع ہو گا
گجرات (جی پی آئی ) ممتاز روحانی شخصیت حضرت کبیر الدین دریائی المعروف شاہدولہ سرکار اور روحانی شخصیت حضرت حاجی سید محمد نوشاہ گنج بخش المعروف نوشو پاک کا تین روزہ سالانہ عرس مبارک آج بروز جمعرات شروع ہو گا اس میں ملک بھر سے عقیدت مند مریدین اور زائرین لاکھوں کی تعداد میں شرکت کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کنجاہ پولیس نے آتش بازی کے سامان کی آڑ میں شہری کے گھر دھاوا بول دیا خواتین اور بچوں پر تشدد
گجرات (جی پی آئی) کنجاہ پولیس نے آتش بازی کے سامان کی آڑ میں شہری کے گھر دھاوا بول دیا خواتین اور بچوں پر تشدد کی انتہاء کرتے ہوئے گھر کا سارا سامان باہر پھینک دیا کنجاہ کے شہری پولیس کے خلاف سراپہ احتجاج بن گئے بتایا گیا ہے کہ کنجاہ کے رہائشی ملک آفتاب کے گھر گذشتہ رات چوکی انچارج کنجاہ دلدار احمد نے اپنے ملازمین کے ہمراہ چادر اور چار دیواری کا تقدس پامال کرتے ہوئے دھاوا بول دیا گھر میں موجود خاتون فرزانہ کوثر اور اس کے کمسن بچوں کو تشدد کا نشانہ بنا کر زخمی کر دیا پولیس ملازمین نے سامان کی تلاشی کے دوران گھریلو سامان باہر پھینک دیا جبکہ پولیس کے مطابق ملک آفتاب احمد کے گھر سے آتش بازی کا سامان برآمد ہوا ہے جس کے لیے ہم نے چھاپہ مارا متاثرہ خاندان نے ڈی پی او گجرات تحریری درخواست دیتے ہوئے کہا کہ چوکی انچارج دلدار احمد نے چادر اور چاردیواری کا تقدس پامال کرتے ہوئے ہمیں تشدد کا نشانہ بنایا اور ہمارے ساتھ بدتمیزی کی ڈی پی او گجرات علی ناصر رضوی نے
ڈی ایس پی صدر کو انکوائری آفیسر مقرر کر دیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوازشریف پارک گجرات کا بجلی کا بل ادا نہ ہونے پر واپڈا نے کنکشن کاٹ دیا
گجرات ( جی پی آئی ) نوازشریف پارک گجرات کا بجلی کا بل ادا نہ ہونے پر واپڈا نے کنکشن کاٹ دیا جس سے شہریوں کو شدید مشکلات کا سامنا کرنا پڑ رہا ہے بتایا گیا ہے کہ نوازشریف پارک کا ہزاروں روپے کا بل واجب الادا تھا جس پر محکمہ واپڈا نے نوازشریف پارک میں لگا ہوا بجلی کا میٹر اتار لیا ہے دوسری طرف پارک میں دیکھ بھال نہ ہونے کی وجہ سے پارک کا حسن ماند پڑ گیا ہے اور پارک کی خوبصورتی میں اضافہ کی بجائے بدصورتی واضح ہو چکی ہے گجرات کے سماجی حلقوں نے وزیراعظم میاں نوازشریف سے پارک کی نئی تعمیر کا مطالبہ کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹی ایم اے گجرات کی جانب سے نالوں کی صفائی کے دوران متعدد افراد نالوں میں گر کر زخمی ہو گئے
گجرات (جی پی آئی ) ٹی ایم اے گجرات کی جانب سے نالوں کی صفائی کے دوران متعدد افراد نالوں میں گر کر زخمی ہو گئے گذشتہ روز نوجوان صحافی مرزا خرم حسنین ٹی ایم اے کی طرف سے نالوں کے اوپر سے اٹھائی گئی سلیبوں کی وجہ سے گندے نالے میں گرنے سے شدید زخمی ہو گئے جس سے ان کے پائوں پر شدید چوٹیں آئی شہریوں نے ٹی ایم اے کے آپریشن کے خلاف سخت احتجاج کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یو نیورسل ہیو من رائٹس آرگنا ئز یشن( انٹر نیشنل )کے مرکزی صد ر سید حفیظ سبز واری 30 جون کو جہلم اور ضلع گجرات کا دورہ کریں گے
گجرات (جی پی آئی )یو نیورسل ہیو من رائٹس آرگنا ئز یشن( انٹر نیشنل )کے مرکزی
صد ر سید حفیظ سبز واری 30 جون کو جہلم اور ضلع گجرات کا دورہ کریں گے۔تفصیلا ت کے مطا بق UHRO ضلع جہلم کے صد ر اورمرکزی ڈپٹی میڈیا ایڈوائز ر احمد ندیم نے بتا یا ہے کہ مرکزی صدر UHRO سید حفیظ سبزواری 30 جو ن بروز اتوار صبح 9بجے پنڈی سید پور پہنچیں گے۔ جہا ںوہ UHRO کے عہد ے داروں محمد نواز، ثاقب حبیب ملک، فہیم احمد بھٹی، محمد ریاض قادری اور دیگر کی جانب سے دیے گئے استقبا لیہ سے خطاب کریں گے۔ وہ 11بجے دن دینہ پہنچیں گے۔ جہاں پر وہ کا رکنوں کی ایک تقریب سے خطا ب کریں گے اور اہم اعلانات کریں گے ازاں بعد مرکزی صدر دینہ سے گجرات جائیں گے جہا ں پر پرنسپل آفس میں ایک اجلاس کی صدارت کریں گے۔ ان کے دورہ کو حتمی شکل دے دی گئی ہے۔
