گجرات کی خبریں 23.7.2013
Posted on July 24, 2013 By Geo Urdu گجرات
فنانس سیکرٹری محمد پرویز بٹ نے ممتاز سیاسی و سماجی شخصیت سید آصف رضا نقوی کی خوشدامن محترمہ کی وفات پر پیس ٹریولز پر جا کر انہوں نے تعزیت کی اور مرحومہ کے ایصال ثواب کیلئے فاتحہ خوانی کی
گجرات (جی پی آئی) ٹریول ایجنٹ ایسوسی ایشن گجرات کے صدر عبدالطیف بٹ ، جنرل سیکرٹری مرزا عبدالقیوم ، نائب صدر مرزا مبشر، فنانس سیکرٹری محمد پرویز بٹ نے ممتاز سیاسی و سماجی شخصیت سید آصف رضا نقوی کی خوشدامن محترمہ کی وفات پر پیس ٹریولز پر جا کر انہوں نے تعزیت کی اور مرحومہ کے ایصال ثواب کیلئے فاتحہ خوانی کی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
توانائی بحران کا خاتمہ حکومت کی اولین ترجیح ہے :راجہ اشفاق سرور
گجرات(جی پی آئی)صوبائی وزیر محنت و افراد ی قوت راجہ اشفاق سرور نے کہا ہے کہ توانائی بحران کا خاتمہ حکومت کی اولین ترجیح ہے اس کے بغیر معیشت میں بہتری اور ملک کی ترقی ممکن نہیں۔ ان خیالات کا اظہارا نہوں نے ایوان صنعت و تجارت گجرات کے ارکان سے خطاب کرتے ہوئے کیا۔ صدر چیمبر عدنان اقبال مکی نے اجلاس کی صدارت کی جبکہ سیکرٹری سوشل ویلفیئر کیپٹن (ر) محمد یوسف، ڈی سی او آصف بلا ل لودھی، ایم این اے چوہدری عابد رضا، ایم پی اے حاجی عمران ظفر، سابق ایم پی اے حاجی ناصر محمود، چوہدری مبشر حسین، ڈی او سی شجاع قطب بھٹی، ڈائریکٹر میڈیکل سوشل سکیورٹی گجرات ڈاکٹر اعجاز کاظمی، ڈائریکٹر لیبر ضیغم اے مظہر اور گجرات چیمبر کے ممبران ایگزیکٹو اور کاروباری شخصیات بھی موجود تھیں۔ راجہ اشفاق سرور نے کہا کہ بزنس کمیونٹی خراج تحسین کی مستحق ہے جس نے گذشتہ پانچ سال بدترین حالات میں کاروبار جاری رکھا، نقصان برداشت کیا لیکن غریب کا چولہا جلائے رکھا اور انٹر نیشنل سطح پر بھی ملک کا امیج بحال رکھا۔ انہوں نے کہا کہ اس عرصہ میںپنجاب کے ساتھ لوڈ شیڈنگ کے معاملے میں سوتیلی ماں کا سلوک روا رکھا گیا جبکہ دوسرے علاقوںمیں لوڈ شیڈنگ نہ ہو نے کے برابر تھی جس کی وجہ سے کلائنٹ بھی شفٹ ہو گیا۔ صوبائی وزیر محنت نے کہا کہ افسران ریکوری بڑھانے کے لئے چھوٹے تاجروں کو تنگ نہ کریں، گجرات کی کاروباری برادری میں اس حوالے سے تشویش ختم کرکے ایک ہفتے میں رپورٹ پیش کی جائے۔انہوں نے بتایا کہ سابق حکومت نے ائمپلائز اولڈ ایج بینفٹ انسٹی ٹیوشن کی فنانشل ڈیولوشن Devolotion نہیں کی تاہم انکی حکومت اس سلسلے میں وفاقی حکومت سے رابطہ کرے گی ۔ صوبائی وزیر نے کاروباری برادری کے موقف کو درست تسلیم کیا کہ تمام شہروں میںیکساں لوڈ شیڈنگ ہونی چاہیے اور یقین دلایا کہ وہ اس حوالے سے انکے تحفظات سے وزیر اعلی سمیت اعلی قیادت کو آگاہ کریںگے۔ صوبائی وزیر نے ممبران چیمبر کی نشاندہی پر مدینہ لیبر کالونی کے معاملات کا بھی فوری نوٹس لے لیا اور ڈی سی او گجرات کی سربراہی میں اعلی سطحی کمیٹی کو انکوائری کرکے دو ہفتوں میں رپورٹ پیش کرنے کی ہدایت کی۔ اس سے قبل گجرات چیمبر کے صدر نے خطبہ استقبالیہ پیش کیا اور صوبائی وزیر کو کاروباری برادری کے مسائل سے آگاہ کیا۔ قبل ازیں میڈیا سے بات چیت کرتے ہوئے راجہ اشفاق سرور نے کہا کہ لیبر ڈیپارٹمنٹ کے زیر اہتمام کالونیوں کی حالت زار بہتر بنائی جائے گی اور سکولوں کی اپ گریڈیشن بھی زیر غور ہے۔ انہوں نے بتایا کہ اس وقت مزدورں کے 18ہزار بچے سکالر شپ پر اعلی تعلیمی اداروں میں زیر تعلیم ہیں ۔ انہوںنے کہا کہ مزدروں کی فلاح و بہبود یقینی بنانے کے لئے لیبر انسپکٹر ز کو دوبارہ فیکٹریوں کے معائنہ کی اجازت دے دی گئی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
راجہ اشفاق سرور نے ناقص انتظامات پرمدینہ لیبر کالونی کے سب انجینئر کو فوری طور پر معطل کرکے ٹرانسفر کرنے کا حکم دے دیا
گجرات(جی پی آئی)صوبائی وزیر محنت و افرادی قوت راجہ اشفاق سرور نے ناقص انتظامات پرمدینہ لیبر کالونی کے سب انجینیر کو فوری طور پر معطل کرکے ٹرانسفر کرنے کا حکم دے دیا ہے۔ انہوں نے ایم ایس سوشل سکیورٹی ہسپتال کو اظہار وجوہ کا نوٹس جاری کرنے اور ہسپتال کے سنٹرل میڈیکل سٹور میں ادویات پر ادارے کی مہریں نہ لگانے پر سنٹرل سٹور کے آڈٹ کا بھی حکم دے دیا اور ایڈوائز میڈیکل کو ہدایت کی کہ ایک ہفتے میں اس حوالے سے رپورٹ کریں۔ صوبائی وزیر و افرادی قوت اپنے دورہ گجرات کے دوران سیکرٹری شوشل ویلفیئر کیپٹن (ر) محمد یوسف اور دیگر افسران کے ہمراہ سب سے پہلے سوشل سکیورٹی ہسپتال پہنچے جہاں انہوں نے ایمرجنسی، او پی ڈی، لیب، سنٹر ل میڈیکل سٹو ر اور دیگر حصوں کا معائنہ کیا۔ سنٹرل میڈیکل سٹو ر میں صوبائی وزیر نے ادویات کے پیکٹ چیک کئے جن پر سوشل سکیورٹی کی مہر نہیں تھی جبکہ استسفار پر عملہ اور ایم ایس بھی تسلی بخش جواب نہ دے سکے۔ بعد ازاں صوبائی وزیر مریضوں کو ادویات ڈلیور کرنے والے سٹور پہنچے جہاں سٹاف نے بتایا کہ انہوں نے آج کی تاریخ میں متعدد ادویات حاصل کی ہیںتاہم اسکا کہیں اندراج نہیں تھا۔ راجہ اشفاق سرور نے صورتحال کا سخت نوٹس لیا اور ایڈوائز میڈیکل ثقلین حیدر کو سٹور کا آڈٹ اور مکمل تحقیقات کر کے ایک ہفتے میںرپورٹ پیش کرنے کی ہدایت کی۔ صوبائی وزیر بعدازاں وارڈز کا جائزہ لینے کے لئے پہنچے تو وہاں کوئی بھی ڈاکٹر موجود نہ تھا۔ انہوں نے ہسپتال کی انتظامی صورتحال پر سخت مایوسی کا اظہار کرتے ہوئے ایم ایس ڈاکٹر عطاالرحمان کو اظہار وجوہ کا نوٹس جاری کرنے کا حکم دیا۔ صوبائی وزیر بعد ازاں مدینہ لیبر کالونی پہنچے جہاں صفائی کی صورت حال نہایت ناقص تھی جبکہ مکینوں نے بتایا کہ سب انجنئیر محمد شہزاد کی آشیرباد سے یہاں 36کوارٹرز میں ایسے افراد مقیم ہیں جو الاٹی نہیں۔ صوبائی وزیر نے ڈی او لیبر کو ہدایت کی کہ تما م کوارٹر ز جن میں غیر متعلقہ افراد مقیم ہیں فی الفور خالی رکرائے جائیں۔ انہوں نے کمیونٹی سنٹر کی فوری بحالی، اور ورکرز ویلیفئر سکولوں میں سبزہ زار خوبصورت بنانے کے لئے احکامات جاری کئے ۔ قبل ازیں چیمبر آف کامر س میں خطاب کرتے ہوئے انہوں نے ڈی سی او کی زیر نگرانی ڈائریکٹر سوشل سکیورٹی اور نمائندہ چیمبر پر مشتمل کمیٹی تشکیل دینے کا اعلان کیا جو تما م الاٹمنٹس کو جائزہ لے گی ۔ قبل ازیں ہسپتال کے معائنہ کے بعد میڈیا سے بات چیت کرتے ہوئے صوبائی وزیر راجہ اشفاق سرور نے کہا کہ لیبر ڈیپارٹمنٹ کے زیر اہتمام کالونیوں کی حالت زار بہتر بنائی جائے گی اور سکولوںکی اپ گریڈیشن بھی زیر غور ہے۔ انہوں نے بتایا کہ اس وقت مزدورں کے 18ہزار بچے سکالر شپ پر اعلی تعلیمی اداروں میں زیر تعلیم ہیں ۔ انہوںنے کہا کہ مزدروں کی فلاح و بہبود یقینی بنانے کے لئے لیبر انسپکٹر ز کو دوبارہ فیکٹریوں کے معائنہ کی اجازت دے دی گئی ہے۔ انہوںنے کہا کہ سوشل سکیورٹی ہسپتال گجرات 100بیڈ کا ہسپتال ہے تاہم یہاں مریضوں کی شرح نہایت کم ہے اور فراہم کردہ سہولیا ت سے درست طریقے سے استفادہ نہیںکیا جا رہا تاہم اسکو مزید بہتر بنایا جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات چناب لائنز کلب اور ڈاکٹر اکرم مرزا لائنز کلب کا سالانہ اجلاس آج 24جولائی ساڑھے پانچ بجے گجرات کالج آف کامرس بھمبر روڈ گجرات میں منعقد ہو رہا ہے
گجرات (جی پی آئی ) گجرات چناب لائنز کلب اور ڈاکٹر اکرم مرزا لائنز کلب کا سالانہ اجلاس آج 24جولائی ساڑھے پانچ بجے گجرات کالج آف کامرس بھمبر روڈ گجرات میں منعقد ہو رہا ہے، جس کے مہمان خصوصی ڈسٹرکٹ گورنر لائنز کلب ڈسٹرکٹ 305 N2 عامر نعمان کرینگے، اجلاس کے دوران اہم امور پر تبادلہ خیال کیا جائیگا ، اور آئندہ کیلئے لائحہ عمل طے کیا جائیگا، لائن کاشف ارشد گوپانے دعوت نامے جاری کر دیے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آستانہ عالیہ مہمدہ شریف و آوان شریف میں ماہانہ محفل گیارہویں شریف و میلاد مصطفی ۖ منعقد ہوئی
گجرات (جی پی آئی ) آستانہ عالیہ مہمدہ شریف و آوان شریف میں ماہانہ محفل گیارہویں شریف و میلاد مصطفی ۖ منعقد ہوئی، جس کی صدارت صاحبزادہ رضوان منصور آوانی نے کی، ممتاز عالم دین علامہ محمد شاہد چشتی نے خصوصی خطاب کیا، نقابت کے فرائض خاور بشیربٹ گولڑوی نے سرانجام دئیے، ممتاز ثناء خوانِ رسول عارف شاہد گوندل ، سید دلدار شاہ و دیگر نے ہدیہ نعت پیش کیا، ملک کی ترقی و سلامتی کیلئے خصوصی دعائیں کیں گئیں، اور افطار ڈنر دیا گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پورے ملک کی طرح گجرات میں بھی 2اگست 2013کویوم القدس عقیدت و احترام کے ساتھ منایا جائیگا
گجرات (جی پی آئی ) پورے ملک کی طرح گجرات میں بھی 2اگست 2013کویوم القدس عقیدت و احترام کے ساتھ منایا جائیگا، اور بیت المقدس کی آزادی اور اسرائیلیوں کے ظلم و ستم کے خلاف احتجاج کیا جائیگا، گجرات میں علامہ ساجد نقوی کی خصوصی کال پر احتجاجی مظاہرہ بعد از نماز جمعہ منعقد ہو گا ، جس کی قیادت صدر شیعہ علمائے کونسل سید الطاف عباس کاظمی کرینگے، جبکہ ممتاز شخصیات کی کثیر تعداد شرکت کرے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
15رمضان المبارک ولادت باسعادت حضرت حسن مجتبیٰ علیہ السلام کے سلسلہ میں جامع مجتبیٰ نزد سمال سٹیٹ انڈسٹری میں عظیم الشان تقریب منعقد ہو گی
گجرات (جی پی آئی ) 15رمضان المبارک ولادت باسعادت حضرت حسن مجتبیٰ علیہ السلام کے سلسلہ میں جامع مجتبیٰ نزد سمال سٹیٹ انڈسٹری میں عظیم الشان تقریب منعقد ہو گی ، جس میں خصوصی خطاب علامہ ساجد حسین نقوی قائد ملت جعفریہ کرینگے جبکہ ممتاز علمائے و ذاکرین خطاب کرینگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بسلسلہ شہادت حضرت علی علیہ السلام حسینیہ ٹرسٹ گجرات میں تین روزہ مجالس عزاء ، 19-20-21 رمضان کو منعقد ہونگی
گجرات (جی پی آئی ) بسلسلہ شہادت حضرت علی علیہ السلام حسینیہ ٹرسٹ گجرات میں تین روزہ مجالس عزاء، 19-20-21 رمضان کو منعقد ہونگی، ممتاز عالم دین علامہ مظہر حسین آف مکھنانوالی خصوصی خطاب کرینگے، 20اور21رمضان المبارک کو بعد نماز مجلس تقریباً 9:30 ماتمی جلوس شبیہ تابوت حضرت علی علیہ السلام برآمد ہو گا، مجالس عزاء بعد نماز مغربین منعقد ہو گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عظیم الشان بیداری امت کانفرنس و علم و عمل تربیت ورکشاپ 5اگست کو 9بجے رات منعقد ہو گی
گجرات (جی پی آئی ) عظیم الشان بیداری امت کانفرنس و علم و عمل تربیت ورکشاپ 5اگست کو 9بجے رات منعقد ہو گی ، خصوصی خطاب علامہ ساجد علی نقوی قائد ملت جعفریہ کرینگے اس سلسلہ میں تمام انتظامات مکمل کر لیے گئے ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نواسی رسول ۖ حضرت بی بی زینب کے روضہ مبارک کی بے حرمتی کے خلاف شیعہ ایکشن کمیٹی ضلع گجرات کے زیر اہتمام 16رمضان 26جولائی بعد از نماز جمعہ ڈیڑھ بجے احتجاجی ریلی منعقد ہو گی
گجرات (جی پی آئی ) نواسی رسول ۖ حضرت بی بی زینب کے روضہ مبارک کی بے حرمتی کے خلاف شیعہ ایکشن کمیٹی ضلع گجرات کے زیر اہتمام 16رمضان 26جولائی بعد از نماز جمعہ ڈیڑھ بجے احتجاجی ریلی منعقد ہو گی، جس میں تمام مکاتب فکر سے تعلق رکھنے والے علمائے کرام، معززین شرکت کرینگے جبکہ فقہ جعفریہ کی تمام تنظیمیں شریک ہونگی، جن کی قیادت چوہدری منظور وڑائچ، پروفیسر سرفراز جعفری، سید الطاف عباس کاظمی، اکرم طاہر، سید حیدر شاہ، سید ناصر عباس، آغا مبارک علی موسوی کرینگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
امام بارگاہ حسینیہ میں یکم رمضان المبارک سے افطاری کا سلسلہ جاری ہے
گجرات (جی پی آئی ) امام بارگاہ حسینیہ میں یکم رمضان المبارک سے افطاری کا سلسلہ جاری ہے، 300سے زائد روزہ دارانِ روزانہ افطار کرتے ہیں، اس سلسلہ میں معقول کھانے کا انتظام کیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم کرسچن فیڈریشن کے زیر اہتمام موضع ہیل میں آج 24 جولائی کو افطار ڈنر کا اہتمام کیا گیا
گجرات (جی پی آئی ) مسلم کرسچن فیڈریشن کے زیر اہتمام موضع ہیل میں آج 24 جولائی کو افطار ڈنر کا اہتمام کیا گیا ہے جس میں تمام مذاہب اور مکاتب فکر کے رہنما خصوصی شرکت کریں گے جبکہ ممتاز دانشور سکالر بین الاقوامی تربیت کار ڈاکٹر سید اظہر حسین خصوصی شرکت کریں گے افطار ڈنر میں چرچ آف پاکستان کے سربراہ بشپ عزرایا اسلامی نظریاتی کونسل کے ممبر سید پیر سید احمد شاہ گجراتی مسلم کرسچن فیڈریشن کے چیئرمین قاضی عبدالقدیر خاموش تحریک انصاف کے رہنما چوہدری بشیر احمد جمعیت اہل حدیث ضلع گجرات کے صدر حافظ طارق محمود یزدانی ممتاز مذہبی سکالر سید الطاف الرحمن و دیگر ہوں گے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرزا شفقت علی اور مرزاعلی انجم نے حضرت بی بی زینب کے مزار پر حملہ کی شدید مذمت کی
گجرات ( جی پی آئی) پیپلز پارٹی سٹی گجرات کے نائب صدر مرزا شفقت علی اور مرزا علی انجم چاند نے حضرت زینب بی بی کے مزار شریف پر حملہ کی شدید الفاظ میں مذمت کرتے ہوئے کہا ہے کہ حضرت زینب کے مزار پر حملہ وحشیانہ حرکت دشمنان اہل بیت کی گھنائونی سازش ہے یہ مسلم امہ کی غیرت پر حملہ ہے انہوں نے کہا کہ حکومت پاکستان شام کے ناظم الامور کو دفتر خارجہ طلب کر کے شدید الفاظ میں مذمت کریں اور باغی درندوں کو عبرتناک سزا دیں انہوں نے کہا کہ اگر حکومت پاکستان نے راست اقدام نہ اٹھایا تو پھر حکومت کے خلاف بھی بھرپور احتجاج کیا جائے گا انہوں نے عالم اسلام سے اپیل کی ہے کہ وہ متحد ہو کر صیہونی طاقتوں کے عزائم خاک میں ملا دیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کنجاہ کے نواحی گائوں میں دو کمسن بہنوں کو کرنٹ لگ گیا
گجرات ( جی پی آئی) کنجاہ کے نواحی گائوں میں دو کمسن بہنوں کو کرنٹ لگ گیا ایک جاں بحق دوسری جھلس کر شدید زخمی ہو گئی نواحی گائوں چکریاں میں جاوید کی کمسن بہنوں 13 سالہ عائشہ اور 3 ایسرا کو گھر میں اچانک کرنٹ لگ گیا جس سے ایسرا موقع پر ہی جاں بحق ہو گئی جبکہ عائشہ جھلس کر شدید زخمی ہو گئی جسے طبی امداد کیلئے ہسپتال داخل کرا دیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات میں بجلی کی طویل لوڈشیڈنگ سے روزہ داروں کو مشکلات کا سامنا ہے
گجرات ( جی پی آئی) گجرات میں بجلی کی طویل لوڈشیڈنگ سے روزہ داروں کو مشکلات کا سامنا ہے گجرات اور گردونواح کے علاقوں میں شدید گرمی اور حبس زدہ موسم میں بجلی کی طویل لوڈشیڈنگ کا سلسلہ جاری ہے جس سے روزہ دار شدید مشکلات کا شکار ہیں جبکہ طویل اور غیر اعلانیہ لوڈشیڈنگ سے کاروبار زندگی بھی معطل ہو چکے ہیں سحری افطاری اور نماز تراویح کے اوقات میں لوڈشیڈنگ معمول بن چکی ہے جبکہ ہریا والہ کا رہائشی 70 سالہ محمد ریاض گرمی اور حبس کی شدت سے دم توڑ گیا۔
