گجرات کی خبریں 20.08.2013
Posted on August 21, 2013 By Geo Urdu گجرات
پاکستان نقویہ کونسل کا ایک اہم ترین اجلاس گزشتہ روز منعقد ہوا
گجرات(جی پی آئی)پاکستان نقویہ کونسل کا ایک اہم ترین اجلاس گزشتہ روز منعقد ہوا، جس میں نقوی سادات کی فلاح و بہبود اور تنظیم سازی کے حوالے سے مختلف امور پر تبادلہ خیال کیا گیا، اور فیصلہ کیا گیا کہ توسیعی تنظیم کیلئے سادات برادری کی سرکردہ شخصیات اور مختلف علاقوں میں آباد نقوی سادات کو تنظیم میں شامل کرنے کیلئے اقدامات اور امام علی نقی علیہ اسلام کی شخصیت اور تعلیمات کو اجاگر کرنے کیلئے ایک سالانہ پروگرام پر غور کیا گیا، اجلاس میں نقوی سادات کی مذہبی اور وطن عزیز کیلئے گراں قدر خدمات کو زبردست خراج تحسین پیش کیا گیا اور تنظیم کی مفالیت اور کارکردگی کا جائزہ لینے کیلئے ریگولر اجلاس کرنے کا بھی فیصلہ کیا گیا اجلاس میں اراکین مجلس عاملہ سید اظہر نقوی، آصف رضا نقوی، عاطف نقوی، ذوالفقار نقوی و دیگر نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کاروان مالک اشتر کے حجاج 14ستمبر کو فریضہ حج کیلئے روانہ ہونگے
گجرات(جی پی آئی)کاروان مالک اشتر پرائیویٹ لمٹیڈ ہر سال کی طرح امسال بھی حجاج اکرام کی بہترین خدمت کیلئے تمام انتظامات مکمل کر لئے، کاروان کے حجاج 14ستمبر کو فریضہ حج کیلئے روانہ ہونگے، اس سلسلہ میں پیش ٹریولز ظہور الٰہی سٹیڈیم میں حجاج کی ابتدائی راہنمائی کیلئے خصوصی کوونٹر قیام کر دیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوازشریف کا قوم سے پہلا خطاب صرف نیک تمنائوں و خواہشات تک محدود تھا :جماعت اسلامی
گجرات(جی پی آئی)جماعت اسلامی زون پی پی 115کے امیر حاجی غضنفراقبال اور دیگر راہنمائوں چوہدری عمران انور،سید فیاض شبیر،میاں عابد محمود اورقاری انیس الرحمان نے مشترکہ بیان میں کہاہے کہ وزیراعظم نوازشریف کا قوم سے پہلا خطاب صرف نیک تمنائوں و خواہشات تک محدود تھا ملکی مسائل کے حل کے لیے کوئی واضح ڈائریکشن نہیں تھی۔ قوم کا پیٹ تقریروں سے نہیں بھرے گا۔ یہ وقت انتخابات اور انتخابی منشور پیش کرنے کا نہیں، قوم کو خوشحالی و ترقی کی راہ پر گامزن کرنے کے وعدوں کی تکمیل کاہے۔ انہوں نے کہاکہ وزیراعظم میاں نوازشریف نے مزید غیر ملکی قرضے لینے کا عندیہ دے کر قوم کو مایوس کیا ہے۔ بجلی، گیس، پٹرولیم، سی این جی گیس کی قیمتوں میں پہلے ہی بے تحاشا اضافہ کر دیا گیاہے۔ کشکول توڑنے کے دعوے داروں نے ملک و قوم کو آئی ایم ایف کے پاس گروی رکھ دیا ہے۔ انہوں نے کہاکہ موجودہ حکومت کے قوم سے کیے گئے وعدے ہوا میں تحلیل ہوتے نظر آرہے ہیں۔ انہوں نے کہاکہ نائن الیون کے واقعہ کے بعد دہشتگردی کی نام نہاد جنگ و امریکی ڈکٹیشن پر اپنائی گئی پالیسی جسے جنرل پرویز مشرف نے اپنایا، اسے صدر زرداری نے سینے سے لگایا اور موجودہ حکومت بھی اسی راہ پر گامزن ہے۔ دہشتگردی کے خاتمے کے لیے متفقہ قومی پالیسی اختیار کی جائے اور از سر نو داخلہ و خارجہ پالیسیاں قومی امنگوں کے مطابق ترتیب دی جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حلقہ این اے 105 گجرات کے سابق امیدوار ہیجڑے زاہد عرف ریشم کو اغواء کے مقدمہ میں ضمانت پررہا
گجرات (جی پی آئی ) حلقہ این اے 105 گجرات کے سابق امیدوار ہیجڑے زاہد عرف ریشم کو اغواء کے ایک مقدمہ میں ضمانت پر ڈسٹرکٹ جیل سے رہا کر دیا گیا زاہد عرف ریشم پر تھانہ سول لائن میں اغواء کا مقدمہ درج کیا گیا تھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اسسٹنٹ کمشنر گجرات عمر فاروق وڑائچ اور اسسٹنٹ کمشنر کھاریاں محمد حیات کو تبدیل کر دیا گیا
گجرات (جی پی آئی ) اسسٹنٹ کمشنر گجرات عمر فاروق وڑائچ اور اسسٹنٹ کمشنر کھاریاں محمد حیات کو تبدیل کر دیا گیا ان کی جگہ بھی کسی کی تعیناتی نہیں ہوئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ضلع بھر میں غیر قانونی ری فلنگ بند کی جائے ورنہ سخت قانونی کارروائی عمل میں لائی جائے گی :سید علی ناصر رضوی
گجرات ( جی پی آئی ) ڈی پی او گجرات سید علی ناصر رضوی نے کہا ہے کہ ضلع بھر میں غیر قانونی طور پر ایل پی جی کی ری فلنگ کرنے والے فوری طور پر اپنا کاروبار بند کر دیں ورنہ ان کے خلاف سخت قانونی کارروائی عمل میں لائی جائے گی انہوں نے کہا کہ منگووال سانحہ کے بعد ملک کی عدلیہ نے سخت ایکشن لینے کی ہدایات جاری کی ہیں اس سلسلہ میں کسی سے رعائیت نہیں برتی جائے گی سپریم کورٹ کے فیصلہ پر فوری عمل درآمد کروایا جائے گا انہوں نے کہا کہ غیر قانونی گیس کی ری فلنگ کرنے والوں کے خلاف سخت کارروائی کا عمل شروع کیا جا رہا ہے آئی جی پنجاب پولیس نے بھی ایل پی جی کی ری فلنگ کرنے والوں کے خلاف خصوصی طور پر ہدایات جاری کی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات میں بجلی کی لوڈشیڈنگ کا سلسلہ دوبارہ شروع ہو گیا
گجرات ( جی پی آئی ) گجرات میں بجلی کی لوڈشیڈنگ کا سلسلہ دوبارہ شروع ہو گیا گجرات اور گردونواح کے علاقوں میں دس روز کے بعد بجلی کی لوڈشیڈنگ کا سلسلہ دوبارہ شروع ہونے سے حبس اور گرمی کے موسم میں شہریوں کو شدید مشکلات کا سامنا کرنا پڑا گذشتہ روز 14 گھنٹے کی طویل لوڈشیڈنگ کی گئی جس سے شہریوں بچوں اور بوڑھوں کو شدید مشکلات کا سامنا کرنا پڑا شہریوں کا کہنا ہے کہ جب موسم خوشگوار تھا تو لوڈشیڈنگ ختم کر دی گئی تھی اب حبس اور گرمی کی شدت میں دوبارہ اضافہ ہونے سے بجلی کی لوڈشیڈنگ دوبارہ شروع کر دی گئی ہے شہریوں کا کہنا ہے کہ شیڈول کے مطابق لوڈشیڈنگ کی جائے غیر اعلانیہ لوڈشیڈنگ کا سلسلہ بند کیا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پولیس تھانہ رحمانیہ نے چھاپہ مار کر سلنڈروں میں غیر قانونی طور پر ری فلنگ کرنے پر سجاد اختر کو گرفتار کر کے مقدمہ درج کر لیا
گجرات (جی پی آئی) پولیس تھانہ رحمانیہ نے موضع رحمانیہ میں چھاپہ مار کر سلنڈروں میں غیر قانونی طور پر گیس کی ری فلنگ کرنے پر سجاد اختر کو گرفتار کر کے اس کے خلاف مقدمہ درج کر لیا ہے جبکہ پولیس نے 5 سلنڈر بھی برآمد کر کے قبضہ میں لے لئے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تھانہ صدر جلالپورجٹاں نے اشتہاری ملزم نصر اللہ کے بھائی نعیم کو پناہ دینے اور فرار کرانے پر مقدمہ درج کرلیا
گجرات (جی پی آئی) پولیس تھانہ صدر جلالپورجٹاں نے مختلف مقدمات میں مطلوب اشتہاری ملزم نصر اللہ کو گرفتار کرنے کیلئے اس کے گھر پر چھاپہ مارا تو ملزم کے بھائی نعیم نے اسے فرار کرا دیا جس پر پولیس نے نعیم کے خلاف اشتہاری بھائی نصر اللہ کو پناہ دینے اور اسے فرار کرانے پر مقدمہ درج کر لیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیس بک کا شاخسانہ، عاشق محبوبہ کے بھائیوں کے ہاتھوں پٹ گیا
گجرات (جی پی آئی ) فیس بک پر محبت عاشق پہلی ملاقات میں ہی محبوبہ کے بھائیوں سے پٹ گیا گذشتہ روز ساروکی نہر اپر جہلم پر محبوبہ سے ملاقات کیلئے آنے والا عاشق محبوبہ کے بھائیوں کے ہتھے چڑھ گیا تشدد سے عاشق زخمی ہو گیا جسے علاج کیلئے ہسپتال منتقل کر دیا گیا جلالپورجٹاں کے رہائشی جمشید کی فیس بک پر لڑکی سے دوستی ہوئی جو بعد میں محبت میں تبدیل ہو گئی جمشید اپنی محبوبہ کو ملنے ساروکی نہر اپرجہلم کے پل پر پہنچا تو محبوبہ کے بھائیوں نے اسے پکڑ کر تشدد کا نشانہ بنا کر شدید زخمی کر دیا اور فرار ہو گئے زخمی جمشید کو طبی امداد کیلئے ہسپتال داخل کرا دیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پولیس تھانہ کنجاہ نے خاتون کو اجتماعی زیادتی کا نشانہ بنانے پر 5 ملزمان کے خلاف مقدمہ درج کر لیا
گجرات ( جی پی آئی ) پولیس تھانہ کنجاہ نے لاہور کی رہائشی شگفتہ زوجہ امجد کو گائوں جاموں بولہ میں اجتماعی زیادتی کا نشانہ بنانے پر 5 ملزمان محمد احسن قمر زمان آصف ظہیر اور نوید کے خلاف مقدمہ درج کر کے انہیں گرفتار کر لیا ہے۔
