چکوال کی خبریں 24.09.2013
Posted on September 24, 2013 By Geo Urdu سٹی نیوز
چکوال کے گرجا گھر میں مسیحی برادری کے ساتھ ضلعی حکومت کی جانب سے یکجہتی کا اظہار کیا
چکوال (ڈسٹرکٹ رپورٹر) حکومت پنجاب کی ہدایت پر ڈی سی او چکوال یاور حسین نے کرسچین کالونی چکوال کے گرجا گھر میں مسیحی برادری کے ساتھ ضلعی حکومت کی جانب سے یکجہتی کا اظہار کیا اور دعائیہ تقریب میں شرکت کی۔ ڈی سی او چکوال نے اس موقع پر میڈیا کو بتایا کہ سانحہ پشاور پاکستان کے خلاف گہری سازش ہے انہوں نے کہا کہ مسیحی برادری کی وطن عزیز کے لیے خدمات کسی سے ڈھکی چھپی نہیں اور عبادت گاہوں پر حملے اسلام اور پاکستان دشمنوں کی ناپاک سازش ہیں۔ جس کی جتنی مزمت کی جائے کم ہے انہوں نے کہا کہ مذہب اسلام اقلیتوں کے جان ومال کے تحفظ کی پوری ضمانت فراہم کرتا ہے۔اس شرمناک اور گھنائونے فعل میں ملوث دہشت گرد کسی رعایت کے مستحق نہیں۔ انہوں نے مسیحی برادری کو یقین دہانی کرائی کہ اس دکھ کی گھڑی میں پوری قوم اور حکومت ان کے ساتھ ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سانحہ پشاورکے خلاف ڈسٹرکٹ بار چکوال کے وکلاء نے منگل کے روز مکمل ہڑتال کی اور عدالتوں کا بائیکاٹ کیا
چکوال (ڈسٹرکٹ رپورٹر) سانحہ پشاورکے خلاف ڈسٹرکٹ بار چکوال کے وکلاء نے منگل کے روز مکمل ہڑتال کی اور عدالتوں کا بائیکاٹ کیا اس موقع پر مسیحی برادری کے ساتھ یکجہتی کا اظہار کیا گیا۔صدر ملک عبدالجلیل، جنرل سیکرٹری چوہدری زبیر ایڈووکیٹ اور ممبر پنجاب بار کونسل چوہدری اسد مسعود ایڈووکیٹ نے خود کش دھماکوں کی پرزور مذمت کی اور مطالبہ کیا کہ دہشت گردوں کی فوری گرفتاری یقینی بنائی جائے۔ اور انہیں قرار واقعی سزادی جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سماج دشمن عناصر کے خلاف چلائی جانیوالی مہم کے دوران مختلف تھانوں کی حدودمیں نو ملزمان کو گرفتار کر کے آٹھ بوتل شراب اور ناجائز اسلحہ برآمد کر لیا گیا
چکوال(ڈسٹرکٹ رپورٹر) سماج دشمن عناصر کے خلاف چلائی جانیوالی مہم کے دوران مختلف تھانوں کی حدودمیں نو ملزمان کو گرفتار کر کے آٹھ بوتل شراب اور ناجائز اسلحہ برآمد کر لیا گیا۔سٹی پولیس نے تحصیل چوک سے ارشد حسین ساکن چک ملوک کے قبضے سے دو بوتل شراب، پنڈی روڈ سے کوثر علی ساکن گاہی کے قبضے سے دو بوتل شراب، صدر پولیس نے چک بھون سے عبدالرحمن کے قبضے سے تیس بور پستول اور تین روند، کلرکہار پولیس نے منارہ سے عظمت علی کے قبضہ سے تیس بور پستول اورپانچ روند، ڈھڈیال پولیس نے ڈھڈیال سے طلعت نذیر کے قبضے سے کاربین اور دو روند سٹی تلہ گنگ پولیس نے بنگلہ نور شاہ سے وسیم عباس کے قبضے سے دو بوتل شراب، صدر تلہ گنگ نے اکوال سے نیازی شاہ ٹمن کے قبضے سے تیس بور پستول اور تین روند، ٹمن پولیس نے محمد بلال کے قبضہ سے تیس بور پستول اور دو روند، جبکہ لاوہ پولیس نے دندہ شاہ بلاول سے محمد نسیم ساکن کوئٹہ کے قبضے سے دو بوتل شراب برآمدکر کے مقدمات درج کیے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیز رفتار ہائی ایس کی ٹکر سے موٹر سائیکل سوار نوجوان جاں بحق جبکہ دوسرا شدید زخمی ہو گیا
چکوال(ڈسٹرکٹ رپورٹر) تیز رفتار ہائی ایس کی ٹکر سے موٹر سائیکل سوار نوجوان جاں بحق جبکہ دوسرا شدید زخمی ہو گیا۔ عنایت حسین سردھی کے قریب موٹر سائیکل پر جا رہا تھا کہ ہائی ایس نمبر 2363 نے ٹکر مار دی۔ جس کی وجہ سے عنایت حسین جاں بحق جبکہ اس کا ساتھی شدید زخمی ہو گیا پولیس نے مقدمہ درج کر لیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکوال کے رہائشی نواب شاہ نے سبزمرچیں کھانے کا انوکھا ریکارڈ قائم کردیا
چکوال(ڈسٹرکٹ رپورٹر) چکوال کے رہائشی نواب شاہ نے سبزمرچیں کھانے کا انوکھا ریکارڈ قائم کر دیا۔ میرا نام گینز بک آف ورلڈ ریکارڈ میں شامل کیا جائے نواب شاہ کا مطالبہ۔ تفصیلات کے مطابق چکوال کے رہائشی نواب شاہ المعروف مرچاں والی سرکار نے 22 سو مرچیں کھا کر انوکھا ریکارڈ قائم کردیا نواب شاہ کے مطابق وہ ایک منٹ میں 50 مرچیں کھا سکتا ہے۔ نواب شاہ کا کہنا ہے کہ میری مرچیں میٹھی ہوجاتی ہیں جبکہ انہیں مرچوں کو کوئی اور کھائے تو کڑوی محسوس ہوں گی، نواب شاہ نے مطالبہ کیا ہے کہ اس کا نام گینز بک آف ورلڈ ریکارڈ میں شامل کیا جائے اور اگر کوئی خواہشمند مقابلہ میں مرچیں کھانا چاہے تو کسی بھی وقت اس کا چیلنج قبول کرنے کیلئے تیار ہوں
