چکوال کی خبریں 06.10.2013
Posted on October 7, 2013 By Tahir Webmaster سٹی نیوز
صدر مملکت ممنون حسین کی جانب سے چکوال سے تعلق رکھنے والے عظیم سماجی کارکن راجہ مجا ہد افسر کی سماجی خدمات کا اعتراف
چکوال (اعجاز بٹ سے) صدر مملکت ممنون حسین کی جانب سے چکوال سے تعلق رکھنے والے عظیم سماجی کارکن راجہ مجا ہد افسر کی سماجی خدمات کا اعتراف کرتے ہوئے صدارتی ایوارڈ سے نوازا گیا تفصیلات کیمطابق راجہ مجاہد افسر جن کا تعلق ضلع چکوال کے قصبہ ڈنڈوت سے ہے اور سماجی خدمات میں دن رات مصروف ہونے کے علاوہ چیف وارڈن سول ڈیفینس ضلع چکوال کے فرائض بھی انجام دے رہے ہیں ان کی خدمات سے متاثر ہو کر ایک نجی کمپنی نے باقاعدہ تقریب کا اہتمام کیا جس میں راجہ مجاہد افسر کو صدر مملکت اسلامی جمہوریہ پاکستا ن ممنون حسین نے ان کو اپنے ہاتھوں سے صدارتی ایوارڈ سے نوازا اس طرح راجہ مجاہد افسر ضلع چکوال کے پہلے سماجی کارکن بنے جنہیں صدارتی ایوارڈ سے نوازا گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
برکت میموریل ہائی سکول لنگاہ میں سالانہ تقریب تقسیم انعامات منعقد ہوئی
چکوال(ڈسٹرکٹ رپورٹر) برکت میموریل ہائی سکول لنگاہ میں سالانہ تقریب تقسیم انعامات منعقد ہوئی جس کے مہمان خصوصی ڈپٹی میڈیکل سپرنٹنڈنٹ ڈسٹرکٹ ہیڈ کوارٹر ہسپتال چکوال ڈاکٹر منیر احمد لنگاہ تھے۔ اس موقع پر سکول کے بچوں نے حمد ونعت کے علاوہ ڈرون حملوں ،خود کش دھماکوں،پاکستان سے محبت، سچے پاکستانی بنو، تعلیم کی اہمیت، اور دیگر سبق آموز پروگراموں پر ٹیبلوز پیش کیے۔ جنہیں حاضرین نے سراہا۔ اس موقع پر اردو اور انگلش تقریری مقابلے منعقد ہوئے اور پہلی پوزیشنیں حاصل کرنیوالی طالبات کو انعامات دئیے گیے۔اس موقع پر خطاب کرتے ہوئے ڈاکٹر منیر احمدلنگاہ نے کہا کہ بیس سال پہلے اور آج کے دور میں بڑا فرق ہے آج دیہاتوں میں اعلیٰ تعلیم کے مواقع موجود ہیں جو بیس برس پہلے نہ تھے انہوں نے کہا کہ اگرہمیں بیس سال پہلے آج والا ماحول ملتا تو ہم کبھی اعلیٰ تعلیم کے لیے دیہات چھوڑ کر نہ جاتے۔ اس موقع پر انہوںنے برکت میموریل سکول کے سٹاف کے لیے چیئرز عطیہ کرنے کا اعلان کیا۔مسز ڈاکٹر منیر احمد لنگاہ نے اپنے خطاب میں برکت میموریل سکول کو اعلیٰ تعلیمی ادارہ قرار دیا انہوںنے طلباء و طالبات سے اپیل کی کہ وہ دل لگا کر تعلیم حاصل کریں اور اپنا اور اپنے ملک کا نام روشن کریں۔انہوںنے کہا کہ آج کی نوجوان نسل نے کل ملک کی باگ دوڑ سنبھالنی ہے اور ملکی تعمیر و ترقی میں اپنا کردار ادا کرنا ہے۔ قبل ازیں خطبہ استقبالیہ پرنسپل بابر سعید نے پیش کیا۔ اور بتایا کہ سکول انتہائی کم عرصے میں بڑے تعلیمی اداروں کے برابر کھڑا ہوا ہے اور انہیں فخرہے کہ وہ اپنے ادارے میں وہ تعلیم فراہم کررہے ہیںجو شہروں میں بڑے تعلیمی ادارے فراہم کرتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ ن کے مرکزی رہنما میاں حمزہ شہباز شریف نے کہا ہے کہ الیکشن مہم کے دوران کئے گئے تمام وعدے ضرور پورے ہونگے
چکوال(ڈسٹرکٹ رپورٹر) مسلم لیگ ن کے مرکزی رہنما میاں حمزہ شہباز شریف نے کہا ہے کہ الیکشن مہم کے دوران کئے گئے تمام وعدے ضرور پورے ہونگے۔اور میاں نواز شریف اور میاں شہباز شریف نے ضلع چکوال کے انتخابی دوروں کے دوران جو اعلانات کیے تھے ان کو ضروری عملی جامہ پہنایا جائیگا۔رکن قومی اسمبلی میجر(ر) طاہر اقبال سے بات چیت کرتے ہوئے حمزہ شہباز شریف نے کہا کہ چکوال میں یونیورسٹی میڈیکل کالج ،دانش سکول ،ہسپتال کی اپ گریڈیشن سمیت تمام ترقیاتی منصوبے مکمل کیے جائیں گے۔علاوہ ازیں حمزہ شہباز شریف نے میجر(ر) طاہر اقبال کویقین دہانی کرائی کہ مندرہ چکوال روڈ اور چکوال سوہاوہ روڈ پر بھی کام جلد شروع کر دیا جائیگا۔دریں اثناء یونین کونسل ایک چکوال شہر سے ایک وفد جس میں سابق کونسلر عابد حسین منہاس، ارشد بٹ سابق نائب ناظم، اورنگزیب دھرنٹ سابق کونسلر، ملک نذر سابق
کونسلر، ملک محمد حسین، حافظ ظہیر، جاوید نیازی، دانی شاہ، ملک ارشد، نصیر خورشید ایڈووکیٹ، حاجی خالق ،چاچا کرم دین شامل تھے نے میجر(ر) طاہر اقبال سے ملاقات کی اور یونین کونسل نمبر ایک کے دیرینہ مسائل کے علاوہ شہر کے بڑے مسائل بھی زیر بحث لائے گئے۔اس موقع پر جنرل(ر) عبدالمجید ملک بھی موجود تھے، میجر(ر) طاہر اقبال نے یونین کونسل ایک کے وفد سے بات چیت کرتے ہوئے کہا کہ حمزہ شہباز شریف سے ان کی ملاقات سود مند رہی ہے اور انہوں نے یقین دہانی کرائی ہے کہ الیکشن مہم کے دوران کیے گئے وعدے ضرور وفا ہونگے۔جن علاقوں میں سوئی گیس نہیں وہاں پر سوئی گیس فراہم کی جائیگی۔ میجر(ر) طاہر اقبال نے اس موقع پر یونین کونسل ایک کی عوام کو درپیش دیرینہ مسائل کی فہرست تیار کر کے فراہم کرنے کو کہا۔ جنرل(ر) عبدالمجید ملک نے وفد سے بات چیت کرتے ہوئے کہا کہ آنیوالے بلدیاتی الیکشن انتہائی اہم ہیں اور انہیں ہر صورت کامیابی حاصل کرنی ہے لہذا وہ الیکشن کی تیاری شروع کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکوال کے ملحقہ گاؤں چک ملوک میں دو گروپوں میں تصادم باپ بیٹا شدید زخمی
چکوال(ڈسٹرکٹ رپورٹر) چکوال کے ملحقہ گاؤں چک ملوک میں دو گروپوں میں تصادم باپ بیٹا شدید زخمی تفصیلات کیمطابق مذکورہ گروپوںکے درمیان ایک کنال زمین کا تنازعہ کئی ماہ سے جاری ہے معلوم ہوا کہ آج دونوں باپ بیٹاثقلین رضا شاہ اور حسن رضا شاہ چارہ کاٹنے کی نیت سے اپنے کھیتوں میں گئے تو دوسری پارٹی نے حملہ کردیا اور کلہاڑیوں کے سر پر وار کئے اور ٹانگ میں گولی مار کر شدید زخمی کر دیا زخمیوں کو فوری طبی امداد دینے کیلئے ہسپتال پہنچا دیا گیا لیکن تاحال پولیس کی طرف سے کوئی کاروائی نہ کی گئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محلہ سرور آباد سے ملحقہ آبادی کا بجلی کا ٹرانسفارمر دو ماہ سے خراب ہونے کی وجہ سے مکین شدید مشکلات سے دوچار
چکوال(ڈسٹرکٹ رپورٹر) محلہ سرور آباد سے ملحقہ آبادی کا بجلی کا ٹرانسفارمر دو ماہ سے خراب ہونے کی وجہ سے مکین شدید مشکلات سے دوچار ہیں تفصیل کے مطابق نیو بوچھال کلاں محلہ سرور آباد سے ملحقہ آبادی کے مکینوں نے شدید احتجاج کرتے ہوئے بتایا کہ ہمارے علاقے کا بجلی کا ٹرانسفارمر دو ماہ قبل خراب ہو گیا جو محکمہ نے ٹھیک کرنے کی غرض سے اتارا اور ہماری آبادی کو غیر قانونی طور پر واٹر سپلائی کے ٹرانسفارمر سے منسلک کر دیا اور ہمارے محلہ کا ٹرانسفارمر غائب کر دیا ہماری بابا شکایت کے باوجود یہاں ٹرانسفارمر نہیں لگایا جا رہا انہوں نے ارباب اختیار سے نوٹس لینے کی اپیل کی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آئی جی پنجاب خان بیگ اعوان کی ہدایات کے مطابق ضلع پولیس کو سنگین قسم کے مقدمات کی تفتیش کیلئے پنجاب فرائزک سائنس ایجنسی PFAسے منسلک کردیا گیا
چکوال(ڈسٹرکٹ رپورٹر)آئی جی پنجاب خان بیگ اعوان کی ہدایات کے مطابق ضلع پولیس کو سنگین قسم کے مقدمات کی تفتیش کیلئے پنجاب فرائزک سائنس ایجنسی PFAسے منسلک کردیا گیا جہاں پر جدید سائنسی بنیادوں پر مقدمات کی تفتیش ہوگی اور کرپشن کے خاتمے کے ساتھ ساتھ مجرم کو سزا دلوانے اور بے گناہوں کو انصاف دلوانے میں مدد ملے گی SSPچکوال ڈاکٹر معین مسعود نے میڈیا نمائندگان کی موجودگی میں SDPOاور SHOاور تفتیشی افسران کو پنجاب فرائزک سائنس ایجنسی کے کردار سے آگاہ کیا اس موقع پر انہوںنے پولیس افسران میں کتابچے تقسیم کیے تاکہ وہ جدید تفتیش کے طریقوں سے آگاہی حاصل کی ڈی پی او نے تفتیشی افسران کو اپنا قبلہ درست کرتے ہوئے انتباہ کیا کہ وہ انگریزی میں مہارت حاصل کریں اور اردوں میں اپنی خوش خطی بہتر بنائیں کسی بھی جرم کی صورت میں فوری جائے وقوعہ پر پہنچنا پولیس کی ذمہ داری ہے ڈی پی او کا کہنا تھا کہ ان اقدامات سے سو فیصد درست نتائج کے ساتھ ساتھ کرپشن کا خاتمہ اور انصاف کی فراہمی ممکن بنائی جاسکے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میاں مائر کے مشہور مقدمہ قتل جس میں مدعی عباس خان اور ملزم نصیر ہے کی تفتیش میرٹ پر ہورہی ہے
چکوال(ڈسٹرکٹ رپورٹر)میاں مائر کی معروف شخصیت چوہدری کامران حسین نے اپنے ایک بیان میں کہا ہے کہ میاں مائر کے مشہور مقدمہ قتل جس میں مدعی عباس خان اور ملزم نصیر ہے کی تفتیش میرٹ پر ہورہی ہے اور اراکین اسمبلی میجر(ر)طاہر اقبال، چوہدری لیاقت علی خان اور چوہدری حیدر سلطان مقدمے میں کوئی سیاسی مداخلت نہیں کر رہے، انہوںنے کہا کہ ایم این اے اور ایم پی اے کے خلاف جو پروپیگنڈہ کیا جارہا ہے اس کی ہم پرزور مذمت کرتے ہیں اور جھوٹی بیان بازی کی تردید کرتے ہیں، اس ضمن میں لگوائی جانیوالی خبروں سے ہمارا کوئی تعلق نہیں، چوہدری کامران حسین نے کہا کہ حیدر سلطان مظلوم کا ساتھی اور سچ کا ساتھ دینے والا ہے ہم نوجوان قیادت کو سلام کرتے ہیں۔
شرقپور شریف کے سجادہ نشین میاں جمیل احمد کے ختم چھلم سے امیر عالی تنظیم اھلسنت پیر محمد افضل قادری خطاب کر رھے ہیں، ھزاروں عقیدت مند شریک ہیں
