کراچی (جیوڈیسک) کراچی کے علاقے نیلم کالونی میں ایک کباڑی کے گھر میں دھماکہ، دو بچے سمیت تین افراد جاں بحق، آٹھ زخمی ہو گئے۔ شہر قائد کے علاقے نیلم کالونی میں ایک کباڑی کے گھر زور دار دھماکہ ہوا جس کے نتیجے میں گھر کا مالک غلام حیدر اور دو بچے چاہت اور ساگر جاں بحق ہو گئے جبکہ مکان میں موجود دیگر آٹھ افراد زخمی ہوئے۔ دھماکے سے مکان کو جزوی نقصان پہنچا ہے۔
واقعہ کے بعد پولیس موقع پر پہنچ گئی اور بم ڈسپوزل سکواڈ کو بھی طلب کیا گیا۔ بم ڈسپوزل سکواڈ کے مطابق جائے وقوعہ سے دھماکہ خیز مواد اور چھرے بھی ملے ہیں اور خدشہ ہے کہ گھر میں کوئی ایسی چیز پگھلائی جا رہی تھی جس سے دھماکہ ہوا۔اس گھر کی رہائشی خاتون دھماکے کے وقت موجود نہیں تھی وہ گھروں پر کام کرنے گئی ہوئی تھی۔خاتون کا کہنا ہے کہ اس کے گھر پنجاب سے کچھ مہمان آئے ہوئے تھے۔ پولیس واقعہ کی مختلف پہلوں سے تفتیش کر رہی ہے۔
