یونین کونسل سرہالی کلاں مسائل کا گڑھ بن گئی، منتخب نمائندوں نے منہ موڑ لیا

Posted on March 9, 2014 By Majid Khan سٹی نیوز

مصطفی آباد/للیانی: یونین کونسل سرہالی کلاں مسائل کا گڑھ بن گئی، منتخب نمائندوں نے منہ موڑ لیا، سٹرک ٹوٹ پھوٹ کا شکار، گندے پانی کی نکاسی کا نظام در ہم بر ہم، جوہڑوں کیلئے مختص جگہ پر با اثر افراد کا قبضہ، واٹر سپلائی کا منصوبہ ناکارہ، اہلیان علاقہ مضر صحت پانی پینے سے خطر ناک بیماریوں میں مبتلا، وزیر اعلی پنجاب ڈی سی او قصور سے فوری نوٹس لینے کا مطالبہ۔

تفصیلات کے مطابق ” یونین آف جرنلسٹ مصطفی آباد” کی طرف سے کئے گئے ایک سروے میں سرہالی کلاں کے رہائشیوں نے گفتگو کرتے ہوئے کہا کہ ہمارا گائوں حلقہ پی پی175کے پسماندہ ترین دیہات میں کیا جاتا ہے، سٹرک ٹوٹ پھوٹ کا شکار ہو چکی ہیں جس کی وجہ سے گاڑیاں کھٹکارہ اور دس منٹ کا سفر45منٹ میں با مشکل طے ہوتا ہے،جس کی وجہ سے مریضوں کو ہسپتال لیجانے میں شدید مشکلات کا سامنا کرنا پڑتا ہے اور ڈاکو بھی ٹوٹ پھوٹ کا شکار سٹرک کا فائدہ اٹھاتے ہوئے راہ گیروں کو لوٹنے میں مصروف نظر آتے ہیں۔

جوہڑوں کیلئے مختص کی گئی جگہ پر گائوں کے ہی چند با اثر افراد نے قبضہ جما رکھا ہے، جن کے خلاف انتظامیہ کوئی کاروائی نہیں کر رہی، گندے پانی کی نکاسی کا نظام بھی در ہم بر ہم ہو چکا ہے، جس کی وجہ سے گلیاں جوہڑوں کا نقشہ پیش کر رہی ہیں۔ واٹر سپلائی کا منصوبہ بھی ناکارہ ہو چکا ہے زیر زمین پانی انتہائی مضر صحت ہونے کی وجہ سے اہلیان سرہالی کلاں خطر ناک بیماریوں کا شکار ہو کر لقمہ اجل بن رہے ہیں، منتخب نمائندے ووٹ لیکر غائب ہو چکے ہیں، کوئی سننے والا نہیں۔ اہل دیہہ نے وزیر اعلی پنجاب، ڈی سی او قصور ایم این اے چوہدری سلمان حنیف خاں، ایم پی اے و چیئرمین سٹینڈنگ کمیٹی برائے انفارمیشن محمد یعقوب ندیم سیٹھی سے فوری نوٹس لیتے ہوئے مسائل کو حل کروانے کا مطالبہ کیا ہے۔

by Majid Khan

Nasir Mehmood - Chief Editor at GeoURDU.com