اسلام آباد (جیوڈیسک) وزیراعظم نواز شریف نے سرحد پر کشیدگی اور مسلسل بھارتی جارحیت کے خلاف قومی سلامتی کونسل کا مشاورتی اجلاس جمعہ کو طلب کر لیا ہے۔
وزیراعظم نواز شریف نے کنٹرول لائن اور ورکنگ باؤنڈری پر مسلسل بھارتی جارحیت اور بڑھتی ہوئی سرحدی کشیدگی پر قومی سلامتی کونسل کا مشاورتی اجلاس جمعہ کی صبح 10 بجے طلب کر لیا ہے جس میں وفاقی وزرا اور دیگر اعلیٰ حکام شریک ہوں گے، اجلاس میں کنٹرول لائن اور ورکنگ باؤنڈری پر مسلسل بھارتی جارحیت پر غور ہوگا جبکہ اس دوران آپریشن ضرب عضب میں پیش رفت اور اس میں پاک فوج کامیابیوں پر بھی بریفنگ دی جائے گی۔
واضح رہے کہ گزشتہ ایک ہفتے سے ورکنگ باؤنڈری اور کنٹرول لائن پر بھارتی سکیورٹی فورسز کی جانب سے بلا اشتعال فائرنگ اور گولہ باری کا سلسلہ جاری ہے جس کے باعث اب تک 10 پاکستانی شہری شہید اور 42 زخمی ہو چکے ہیں اور سرحدی کشیدگی میں بھی اضافہ ہوا ہے جبکہ پاک فوج کی جانب سے بھی بھارتی فورسز کو بھرپور جواب دیا گیا ہے۔
پاکستانی قوم متحد ہے، بھارت غلط فہمی میں نہ رہے: سیاسی رہنماء
بھارتی جارحیت کا منہ توڑ جواب دیے بغیر خطے میں امن ممکن نہیں: ناصر عباس
