لاہور (جیوڈیسک) سانحہ ماڈل ٹاؤن میں توڑ پھوڑ سے متعلق کیس کی سماعت کے دوران گواہان نے گلو بٹ کو واقعہ کا ذمہ دار قرار دے دیا جبکہ گلو بٹ کا کہنا ہے کہ اگر ان کی زبان کھل گئی تو بہت سے لوگ جیل جائیں گے اور کئیوں کی وردیاں بھی اتریں گی۔
لاہور میں انسداد دہشتگردی عدالت میں سانحہ ماڈل ٹاؤن کے دوران توڑ پھوڑ کرنے والے شاہد عزیز عرف گلو بٹ عدالت میں پیش ہوئے جبکہ 4 پولیس کانسٹیبل کو بطور سرکاری گواہ عدالت میں پیش ہونا تھا جس میں سے 3 پیش ہوسکے۔ عدالت میں تاخیر سے پہنچنے پر جج رائے ایوب نے گلو بٹ کے وکیل کی سرزنش کی جبکہ اس دوران گلو بٹ کمرہ عدالت میں گواہوں کو آنکھیں دکھاتے رہے۔ سماعت کے دوران تینوں گواہوں نے 17 جون کو پیش آنے والے واقعہ کا ذمہ دار گلو بٹ کو ٹھہرایا جبکہ سرکاری وکیل نے عدالت کے سامنے وہ ڈنڈا بھی پیش کیا جس کی مدد سے گلو بٹ نے ماڈل ٹاؤن میں گاڑیوں کا بھرکس نکالا تھا۔
گواہان کے بیانات قلمبند ہونے کے بعد عدالت نے مقدمے کی سماعت 16 اکتوبر تک ملتوی کی تو کمرہ عدالت کے باہر گلو بٹ گواہان سے الجھ گئے اور دونوں جانب سے تلخ کلامی کی گئی۔ میڈیا سے مختصر بات چیت کرتے ہوئے گلو بٹ کا کہنا تھا کہ اگر میری زبان کھل گئی تو بہت سے لوگ جیل جائیں گے، بہت سے لوگوں کی وردیاں اتریں گیں اور بہت سے لوگوں کے خلاف کارروائی ہوگی، میڈیا میرا سب سے بڑا گواہ ہے اور انصاف ملنے کی پوری امید ہے۔
واضح رہے کہ ماڈل ٹاؤن سانحہ میں توڑ پھوڑ سے متعلق کیس کی سماعت کے دوران پولیس کے 4 گواہان کو آج بیانات قلمبند کرانا تھا تاہم گلو بٹ کے وکیل کا تاخیرسے پہنچنے پر ایک گواہ عدالت سے چلا گیا جس کا بیان آئندہ سماعت پر قلمبند کیا جائے گا۔
سنٹرل جیل سازش، سرنگ دیکھ کر حیران رہ گیا، جیل شہر سے باہر منتقل کی جائیگی، منظور وسان
مصباح 2015ء تک کپتان رہیں گے، انٹرنیشنل کرکٹ جلد بحال ہو گی، شہریار خان
