کراچی (جیوڈیسک) فائرنگ کے مختلف واقعات میں 2 افراد ہلاک جبکہ 2 زخمی ہوگئے۔ پاپوش نگرکے علاقے علامہ اقبال ٹاؤن میں فائرنگ سے 25 سالہ افضل خان ولد بختاور خان ہلاک ہوگیا۔
ایس ایچ اوپاپوش نگر سرفراز گوندل نے بتایا کہ افضل خان اپنے دوستوں کے ہمراہ بیٹھاہوا تھاکہ ان کے درمیان کسی بات پرتلخ کلامی ہوگئی۔ اس دوران ایک ملزم نے پستول نکال کرافضل خان پر فائرنگ کر دی جس سے وہ موقع پر ہی ہلاک ہوگیا۔ ایس ایچ اونے واقعے کو ذاتی دشمنی کا شاخسانہ قراردیا۔ ملزم محمودآباد کا رہائشی تھااور مال بردار سوزوکی چلاتا تھا۔
علاوہ ازیں منگھوپیر کنواری کالونی میں نامعلوم افراد کی فائرنگ سے 30سالہ نصراللہ زخمی ہوگیا جسے طبی امداد کے لیے عباسی شہیداسپتال پہنچایا گیا۔ شرافی گوٹھ کے علاقے باغ کورنگی سی این جی پمپ کے قریب موٹرسائیکل سواروں کی فائرنگ سے موٹرسائیکل سوار 38 سالہ شعیب ولد عبدالغفار ہلاک ہوگیا۔ واقعے کے بعدملزمان اسلحہ لہراتے ہوئے فرار ہوگئے۔ مقتول کی لاش جناح اسپتال لائی گئی۔
ایس ایچ اوشاہ شرافی گوٹھ سلیم مروت نے بتایا کہ مقتول شعیب کورنگی میں نجی فیکٹری کا ملازم اور لانڈھی کے علاقے چراغ ہوٹل کے علاقے کا رہائشی تھا۔ مقتول فیکٹری سے گھرجا رہاتھا کہ راستے میں ملزمان نے روکنے کی کوشش کی اور نہ رکنے پر فائرنگ کردی۔
پولیس نے قانونی کارروائی کے بعد لاش ورثا کے حوالے کر دی۔ سکھن کے علاقے بھینس کالونی میں نامعلوم ملزمان نے ڈکیتی کے دوران مزاحمت کرنے پربلال شاہ کو فائرنگ کر کے زخمی کردیا اور فرار ہوگئے۔ زخمی کوطبی امداد کے لیے جناح اسپتال پہنچادیا گیا۔
