خبر کیا ہے قیامت ہے ۔۔۔ اسے قیامت سے بھی بڑھ کرکہا جا سکتا ہے۔۔اتنی شرمناک۔۔۔دردر ناک اور اذیت ناک کہ جی چاہتاہے سب کچھ چھوڑ چھاڑ کر چپ چاپ ۔۔۔کسی کو بتائے بغیر اس معا شرے سے کہیں دور چلا جائوں جہاں اتنا ظلم نہ ہو۔۔۔ننکانہ صاحب میں سات ماہ کی بچی سے زیادتی۔۔ملزم گرفتار۔۔ سوچتاہوں ہم سب کس ماحول میں رہ اور جی رہے ہیں ایسا ظلم تو ان ممالک میں بھی روا نہیں جوغیر مسلم ہیں لیکن وہاں پاکستان سے بہتر سماجی رویہ، بنیادی حقوق اور انصاف میسر ہے۔۔ اف خدایا! یہ کیسی درندگی کی انتہا ہے کہ معصوم فرشتے اور ننھی پریاں بھی محفوظ نہیں۔۔ اگر ہم سب غور کریں دل سے محسوس کریں تو احساس ہوگا پاکستان میں دن بہ دن جنسی درندگی بڑھتی ہی چلی جارہی ہے اس میں میڈیا کا کردار بڑاکلیدی ہے
یہ سب مانتے اور جانتے ہیں کہ خصوصا الیکٹرانک میڈیا نے آگے نکلنے کی بھیڑ چال میں ہمارا قومی تشخص بھی دائو پر لگا دیاہے قریباًہر چینل پر بیشتر ایسے انڈین پروگرام بڑے دھوم دھرلے سے دکھائے جارہے ہیںجو ایک فیملی کے تمام فرد ایک ساتھ بیٹھ کر نہیں دیکھ سکتے بدقسمتی سے تمام پاکستانی چینل بھی انڈیا کی نقالی میں بازی لیتے جارہے ہیں ان کھلے ڈھلے میوزیکل پروگراموں،LoveStories پر مبنی ڈرامہ سیریل اور نیم عریاںبھارتی فلموں نے اچھے بھلے انسان کی جنسی بھوک میں اضافہ کردیا ہے ان عوامل کی وجہ سے والدین بھی اپنی اولادکے ہاتھوں بے بس ہوکر رہ گئے ہیں
چونکہ ہمارے معاشرتی، معاشی اوردیگر گھریلو حالات کے باعث معاشرہ میں کھٹن(فرسٹیشن) زیادہ ہے اس لئے یہ ماحول بھی اثرانداز ہوتاہے اوپر سے رہی سہی کثر غربت مہنگائی اور بیروزگاری نے گھمبیر کرکے رکھ دی ہے اسی بناء پر حلال و حرام کی تمیز ختم ہوتی جارہی ہے سب سے بڑی بات یہ ہے کہ ہمارے قانون میں اتنے سقم ہیں کہ کسی جنسی جنونی کو سزا نہیں ملتی ابھی چند ماہ قبل ایک جنسی جنونی معصوم بچی کو درندگی کا نشانہ بنا کر لاہور کے ایک ہسپتال چھوڑ کر فرار ہوگیا تھا ملزم کوابھی تک کوئی سزا نہیں ملی۔ کئی سال پہلے جاوید اقبال نامی سیریل کلر نے 100 بچے قتل کرکے ان کی لاشیں تیزاب میں ڈال کر ٹھکانے لگانے کا اعتراف کیا لیکن قانون اسے کوئی سزا نہ دے سکا اس کی مبینہ خودکشی سے جہاں بہت سے اس کے ساتھیوں نے سکھ کا سانس لیا وہاں یہ کیس بھی داخل دفتر کردیا گیا۔
Education
پاکستان میں کمسن اور چھوٹی عمر کے بچوں کے ساتھ جنسی تشدد کے رحجان میں مسلسل اضافہ دیکھنے میں آرہاہے اسی وجہ سے ہر بچی کے والدین ایک کرب اور انجانے خوف میں مبتلاہیں دن بہ دن جنسی بے راہروی میں مسلسل اضافہ ہوتا جارہاہے یہ رحجان ہماری حکومت، معاشرے اور ہم سب کیلئے خطرے کی گھنٹی ہے ایک اسلامی ریاست میں یہ سب خوفناک ہے اس ساری صورت ِ حال میں ہماری سٹیٹ اپنی ذمہ داریاں کما حقہ ‘ پوری نہیں کررہی تعلیمی نصاب میں اخلاقی اقدار پر مبنی مضامین کو نظر انداز کرکے جب جنسی تعلیم کے مضامین پڑھائے جائیں گے تو معاشرہ میں ان واقعات پر قابو نہیں پایا جا سکتا۔ یہ بات طے ہے کہ جنسی واقعات کی روک تھام جنسی تعلیم سے نہیں حدود اللہ کے نفاذ سے ہوگی حکومت کو چاہیے کہ فوری طورپر اخبارات، TV چینلز اور دیگر ذرائع ابلاغ پر مانع حمل معلو ماتی پروگرام ،گرین سٹار، ساتھی ،ہمدم کنڈوم ،آل ویز طرز کے پیڈ کے اشتہار بند کردے یہ ساری باتیں اور ضرورتیں صدیوں سے چلی آرہی ہیں
اس کی تشہیر ضروری نہیں جب ٹی وی اور اخبار نہیں تھے اس وقت بھی لوگ گذارا کرتے تھے تشہیر سے مسائل جنم لے رہے ہیں ٹی وی پر جب بچے بڑوں سے سوال کرتے ہیں کہ ساتھی کیا ہے ؟ اس وقت بڑوں کی حالت یقینا قابل ِ رحم ہوتی ہوگی ۔ ہم مشرقی لوگ ہیں ہماری اخلاقی اقدار ، روایات اور تہذیب و تمدن شتر بے مہار آ زادی کا ہر گز ہرگز متحمل نہیں ہو سکتا اس کے ساتھ والدین کو بھی چاہیے کہ وہ اپنے بچوںپر بھرپور توجہ دیں بالخصوص ٹین ایج کی ضرورتوں اور سرگرمیوں کا خیال رکھا جائے ان کے دوستوں اور ارد گرد کے ماحول کا بغوبی جائزہ لیں۔
ایک اور اہم بات یہ ہے کہ والدین کم وسائل ہونے کے باوجود بھی بچوںکو تعلیم دلانے کیلئے بھرپور جدوجہد کریں اس سے کئی فائدے ہو سکتے ہیں بچے تعلیم کیلئے مکتب جائیں گے تو وہ گھر کے ماحول سے باہر نکل کر مزیدکچھ سیکھنے کی جستجو کریں گے۔ تعلیم یافتہ لوگوںکو ترقی کے زیادہ چانسز ملتے ہیں، صحت مند سر گرمیاں بچوں کی صلاحیتوںمیں نکھار لاتی ہیں جس سے اچھے شہری بننے میں معاونت ہوتی ہے بچوںکی سرگرمیاں واچ کرنے اور ان پر توجہ دینے سے کئی مسائل خود بخود حل ہو جا تے ہیں ۔ حکومت ، فانون نافذ کرنے والے اداروں اور عدلیہ سے گذارش ہے کہ جنسی جرائم بالخصوص بچوں کو درندگی کا نشانہ بنانے والوں کے خلاف سخت سے سخت ایکشن لیا جائے تاکہ کسی بچے پر پھر کوئی قیامت نہ ٹوٹے ۔۔۔
جب تک ملک میں قانون کی حکمرانی کو یقینی نہیں بنایا جا نا بہتری کی امید عبث ہے ہر بچی کے والدین ایک کرب اور انجانے خوف میں مبتلاہیں دن بہ دن جنسی بے راہروی میں مسلسل اضافہ ہوتا جا رہا ہے کچھ اسلام دشمن قوتیں پاکستان میں بھی یورپین ماحول پیدا کرنا چاہتی ہیں ان کا اثرکافی حد تک ہمارے معاشرہ پرغالب آ چکاہے جوان بچیوں کا پینٹ، جینز اور شرٹ پہننا اب برا نہیں سمجھا جارہا بدقسمتی سے بہ سب کچھ فیشن کے نام پر کیا جارہاہے ہمارے دیکھتے ہی دیکھتے پاکستان کا ماحول اتنا مغرب زدہ ہو گیاہے کہ اب حیرت کا اظہار کرنے والوں کو تنگ نظر، دقیانوسی اور پرانے زمانے کا خیال کیا جاتا ہے عورت کوایک جنس کا درجہ دینے والوں کو خیال ہی نہیں کہ معاشرہ میں اتنی آزاد خیالی کا مطلب یقینی طورپر اخلاقی تباہی ہے
دن رات اغواء اور ریپ کی ہوشربا واقعات رونماہورہے ہیں جسم فروشی مخصوص علاقوں سے نکل کر پورے معاشرے میں پھیل گئی ہے ایک اسلامی معاشرے میں اس قدراخلاقیات کے منافی ہونے کا تصور بھی نہیں ۔۔۔جو لوگ جنسی تشدد کے بھینٹ چڑھ جاتے ہیں نفسیاتی طورپر ان میں سے بیشترکی شخصیت مجروح ہوکر رہ جاتی ہے جس کا بدلہ وہ معاشرہ سے لیتے ہیں جس سے جرائم کا لامتناہی سلسلہ شروع ہو جاتاہے خدا کرے ہمارے پیارے وطن میں قیامت سے پہلے قیامت کے واقعات ختم ہو جائیں اس سے اکثر لوگ سکھ کا سانس لے سکیں گے۔
