نیو سائوتھ ویلز (جیوڈیسک) آسٹریلیا کے آنجہانی کرکٹر فلپ ہیوز کی آخری رسومات انکے آبائی علاقے میں ادا کردی گئیں۔ قاتل باؤنسر کی وجہ سے زندگی کی بازی ہارنے والے آسڑیلوی کرکٹر فلپ ہیوز کی آخری رسومات نیو ساؤتھ ویلز کے قصبے میکسویلے میں ادا کی گئیں۔
انتظامیہ کے مطابق ہیوز کی آخری رسومات میں 5 ہزار سے زائد افراد نے شرکت کی۔ آنجہانی کرکٹر کے اہلخانہ نے ہیوز کو میموریل سروس میں خراج عقیدت پیش کیا۔ آسٹریلوی بلے باز کے بھائی جیسن نے ہیوز کے ساتھ گزارے لمحات کو شیئر کیا۔ فلپ ہیوز کی بہن میگن بھی اپنے بھائی کی یاد میں آبدیدہ ہوگئیں۔
ان کا کہنا تھا کہ ہیوز ہمیشہ ان کی یادوں میں زندہ رہیں گے۔ فل ہیوز کے بچھڑنے کا غم آسٹریلین کپتان بھی چھپا نہ سکے ، ٹیم اور آفیشلز کی جانب سے آنجہانی بلے باز کو خراج عقیدت پیش کرنے میڈیا کے سامنے آئے تو جذبات پر قابو نہ رکھ سکے۔
آسٹریلوی بلے باز کے لئے ہونے والی دعائیہ تقریب ٹیلی ویثرن پر براہ راست نشر کی گئی۔ 25 سالہ ہیوز ڈومیسٹک میچ کے دوران شان ایبٹ کی گیند سر پر لگنے سے انتقال کر گئے تھے۔
