پیرمحل (میاں اسد حفیظ سے) تیر رفتار روڈ لائنربس کی موٹر سائیکل کو ٹکر 2 طالب علم سگے بھائی جاں بحق دو افراد شدید زخمی مشتعل لوگوں نے بس کو توڑ ڈالا تفصیلات کے مطابق سندھیلیانوالی روڈ پر واقع ناصر نگر کے قریب ملتان سے آنے والی تیز رفتار روڈ لائنر بس نمبری BSA-076 خورشید آباد لنک روڈ سے آنے والے موٹر سائیکل نمبری TSL-3448 سے ٹکرا گئی روڈ لائنر بس موٹر سائیکل سے ٹکرانے کے بعدبے قابو ہو کر سڑک کنارے کھڑی ٹریکٹر ٹرالی سے ٹکرا گئی جس کے نتیجہ میں موٹر سائیکل پر سوار 2طالب علم سگے بھائی مظہر عباس اور فخر عباس زخموں کی تاب نہ لاتے ہوئے موقع پرہی دم توڑ گئے۔
جبکہ موٹر سائیکل چلانے والا محمد صادق ولد محمد خاں سکنہ 759گ ب کے علاوہ دس سالہ طالب علم محمد بابر ولد محمد حیات شدید زخمی ہو گئے ۔زخمیوں کو سول ہسپتال پیرمحل سے ابتدائی طبی امداد کے بعد مخدوش حالت کے پیش نظر ڈسٹرکٹ ہسپتال ٹوبہ ٹیک سنگھ ریفر کر دیا گیا تھا جہاں پر تادم تحریر زخمیوں کی حالت انتہائی نازک بتائی گئی تھی۔
ورثاء نے حادثہ کے بعد نعشوں کو سڑک پر رکھ کر ملتان فیصل آباد روڈ کو بلاک کر دیا اور راڈ لائنر بس کی توڑ پھوڑ شروع کر دی ۔تھانہ اروتی پولیس جائے حادثہ پر ایک گھنٹے تاخیر سے پہنچی مگر بعدازاں اسسٹنٹ کمشنرتحصیل پیرمحل محمدنجیب نے مشتعل لوگوں کو یقین دلایا کہ حادثہ کی میرٹ پر تحقیقات کرتے ہوئے ذمہ داران کے خلاف سخت قانونی کاروائی عمل میں لائی جائے گی جس پر احتجاجی افراد منتشر ہو گئے۔ روڈ کو کھلوایا کرٹریفک کو بحال کروا دیا۔
