ممبئی (جیوڈیسک) بالی ووڈ مسٹر پرفیکشنسٹ عامر خان اور انوشکا شرما کی نئی فلم پی کے دنیا بھر کے 6 ہزار سینما گھروں میں بیک وقت ریلیز ہونے جا رہی ہے۔
دنیا بھر میں اتنی بڑی تعداد میں سینما گھروں میں بیک وقت ریلیز سے فلم پی کے ایک نیا ریکارڈ بنانے جا رہی ہے۔ یہ فلم 19 دسمبر کو ریلیز کی جائے گی۔ اس فلم کی خاص بات یہ ہے کہ یہ فلم بھارت میں 19 دسمبر کو سولو ریلز ہے اس کے ساتھ کوئی دوسری نئی فلم ریلیز نہیں ہو رہی۔ بتایا جا رہا ہے کہ بھارت بھر میں 5200 سینما گھروں میں ریلیز ہوگی جب کہ اوور سیز 800 سینما گھروں میں دکھائے جانے کا اہتمام کیا گیا ہے۔
فلم پی کے کی ایڈوانس بکنگ بھی ابھی تک متاثر کن رہی ہے جس سے اندازہ ہوتا ہے کہ اس فلم کی ابتدا بہت اچھی ہوگی۔ دوسری طرف خود عامر خان ایک بہترین گلوبل اداکار ہے اور اس نے ہمیشہ ہی اپنی عمدہ پرفارمنس سے نا صرف بھارت بلکہ بیرون ملک کی مارکیٹ میں بھی نام کمایا ہے۔ اس فلم کی ریلیز سے متعلق بتایا جا رہا ہے کہ یہ فلم دھوم تھری کا ریکارڈ توڑے گی۔
