اڑیسہ (جیوڈیسک) بھارتی پولیس نے دعویٰ کیا ہے کہ انہوں نے پاکستان کی خفیہ ایجنسی آئی ایس آئی کو خفیہ عسکری معلومات فراہم کرنے کے الزام میں ایک شخص کو گرفتار کیا ہے۔
غیر ملکی خبر رساں ادارے کے مطابق بھارتی ریاست اڑیسہ کی پولیس کے آئی جی کا کہنا ہے کہ انہوں نے آئی ایس آئی کو خفیہ عسکری معلومات فراہم کرنے کے الزام میں ایک شخص ایشور چندرا بہیرا کو گرفتار کیا ہے۔ پولیس کا کہنا ہے کہ ایشور چندرا بھارت کی ڈیفنس ریسرچ اینڈ ڈویلپمنٹ آرگنائزیشن میں کیمرہ مین کی حیثیت سے کام کرتا ہے اور اس نے میزائل تجربات اور دیگر اہم عسکری معلومات آئی ایس آئی کے ایجنٹ کو فراہم کی ہیں۔
پولیس حکام کا کہنا ہے کہ ہمارے پاس ایشور چندرا کی مشکوک حرکات کے حوالے سے معلومات تھیں اور ہم اس پر گہری نظر رکھے ہوئے تھے۔ ایشور چندرا نے اس بات کا اعتراف بھی کیا ہے کہ وہ کلکتہ میں آئی ایس آئی کے ایجنٹ سے متعدد ملاقاتیں کر چکا ہے۔ واضح رہے کہ بھارتی پولیس نے آئی ایس آئی کے لئے مخبری کرنے کے الزام میں ایک شخص کو گرفتار کرنے کا دعویٰ اس وقت کیا ہے جب امریکی صدر بارک اوباما بھارت کے دورے پر آئے ہوئے ہیں۔
یوکرائن : باغیوں نے جنگ بندی کا مطالبہ مسترد کر دیا
مرکزی یورپی بنک کا مالی بحران سے نمٹنے کیلئے 11 سوارب یورو فراہم کرنیکا اعلان
