ممبئی (جیوڈیسک) سابق ملکہ حسن اور بالی ووڈ اداکارہ ایشوریہ رائے بچن جو سونم کپور اور کترینہ کیف کے ساتھ اپنی فلم جذبہ کا ٹریلر رواں برس ہونے والے 68 ویں کینز فلم فیسٹیول کے موقع پر ریلیز کریں گی۔
اس موقع پر ایشوریہ رائے بچن، سلمیٰ ہائیک اور دیگر اداکارائیں صنفی امتیاز اور خواتین کے میڈیا میں کردار پر خطاب بھی کریں گی۔ اس سلسلہ میں فلم کے ہدایتکار سنجے گپتا نے سماجی رابطے کی ویب سائٹ ٹوئیٹر پر اپنے ایک پیغام میں کہا ہے کہ ان کی آنے والی فلم کا ٹریلر رواں برس ہونے والے کینز فلم فیسٹیول میں پیش کیا جائے گا اور اسے فلم کی ہیروئن ایشوریہ رائے بچن ریلیز کریں گی۔
ادھر ایشوریہ رائے بچن کا کہنا ہے کہ بچوں کی پرورش کے باعث فلموں میں کام سے وقفہ لیا تھا اور ایک طویل عرصہ بعد اداکاری کی طرف واپس آئی ہوں تو ایسا لگ رہا ہے کہ میرا کیریئر نئے سرے سے شروع ہورہا ہے اور مجھے خود کو ایک بڑی اداکارہ کی حیثیت سے منوانے کے لیے سخت محنت کرنا پڑے گی۔
موجودہ ہیروئنوں کے متعلق سوال پر ایشوریہ نے کہا دیپکا پڈوکون، پریانکا چوپڑا، ودیا بالن سمیت سبھی اچھا کام کررہی ہیں اور ان کی فلمیں بھی کافی کامیاب جارہی ہیں جب کہ بالی ووڈ میں اب ایسی فلمیں بھی بنائی جارہی ہیں جو خواتین کے متعلق ہیں اور ان میں خواتین کو ہی ہیرو دکھایا جاتا ہے جو بہت خوش آئند ہے۔ اس سے بالی ووڈ میں کام کرنے والی ہیروئنوں کو اپنی پرفارمنس دکھانے کا زیادہ موقع مل رہا ہے۔
اداکارہ کا کہنا تھا کہ میری فلم ’’جذبہ‘‘ بھی ایسی ہی فلم ہے اور اس میں میں بہت زیادہ اسٹنٹ کرتے دکھائی دوں گی جس کے لیے ماہر ٹرینر سے خصوصی طور پر تربیت بھی لی ہے۔ امید ہے شائقین کو ایک طویل عرصہ بعد سلور اسکرین پر واپسی پسند آئے گی۔واضح رہے کہ ایسل ویژن پروڈکشن کے بینرتلے بنائی جانے والی فلم میں ایشوریہ رائے کے ساتھ عرفان خان، شبانہ اعظمی اور انوپم کھیر بھی مرکزی کردار ادا کررہے ہیں اور اسے 9اکتوبر کو سینماگھروں کی زینت بنایا جائے گا۔
دنیا کا سب سے بڑا فلمی میلہ آج سے فرانس میں سجے گا
دا ویٹی کن ٹیپس کا ٹریلر ریلیز، 24 جولائی ہارر فلم
