کراچی (جیوڈیسک) ہیڈ کوچ وقار یونس کے بعد چیف سلیکٹر ہارون رشید نے بھی عمر اکمل کے خلاف محاذ کھول دیا ہے اور ان کا کہنا ہے کہ ٹریننگ کیمپ میں رپورٹ نہ کرنے کی وجہ سے بیٹسمین کو سری لنکا کے خلاف سیریز سے ڈراپ کیا گیا۔
تفصیلات کے مطابق ورلڈ کپ کے بعد سے عمر اکمل کا ستارہ گردش میں ہے، پہلے انھیں ہیڈ کوچ وقار یونس کی رپورٹ کے باعث بنگلہ دیش کیخلاف سیریز سے باہر کیا گیا، زمبابوے سے میچز کیلیے واپسی ہوئی مگر سری لنکا سے ایک روزہ سیریز میں پھر ڈراپ کردیا گیا۔ چیف سلیکٹر ہارون رشید اس کی وجہ ان کے ٹریننگ کیمپ میں شریک نہ ہونے کو قرار دیتے ہیں۔
غیرملکی خبر رساں ایجنسی کو انٹرویو میں انھوں نے کہا کہ عمر اکمل سمیت ون ڈے ٹیم سے وابستہ کھلاڑیوں کو ہم نے فٹنس ٹیسٹ اور ٹرائلز کیلیے کرکٹ اکیڈمی طلب کیا مگر عمر وہاں نہیں آئے، انھوں نے اکیڈمی کوچ محمد اکرم سے بات کی اور انھیں بتایا کہ اگلی صبح آئیں گے مگر نہیں آئے، اب اگر کوئی خود ہی اپنے کیریئر کو نقصان پہنچانے پر تلا ہوا ہو تو پھر ہم کیا کرسکتے ہے۔
کیریبیئن پریمیئر لیگ میں گیانا ایمازون واریئرز کی نمائندگی کیلیے روانہ ہونے سے قبل عمر اکمل نے مختلف رمضان ٹورنامنٹس میں بھی حصہ لیا۔ انھوں نے سی پی ایل میں 2 میچز کھیلے اور اتنے ہی رنز بنا سکے۔
ہارون رشید کا کہنا ہے کہ ہم اپنا ٹیلنٹ ضائع نہیں کرنا چاہتے مگر عمر اکمل کو خود اپنے کیریئر کے حوالے سے فیصلہ کرنا ہوگا، مختار، انور، بلال اور عرفان سب ہی فیصل آباد میں رمضان ٹی 20 کھیل رہے تھے مگر جیسے ہی وہ ایونٹ ختم ہوا انھوں نے اکیڈمی میں رپورٹ کردی۔ دوسری جانب ذرائع کا کہنا ہے کہ عمر اکمل نے حکام کو بتا دیا تھا کہ ان کاکیریبیئن لیگ سے بھاری رقم کا معاوضہ ہے، اگر انھیں ون ڈے ٹیم میں شامل نہیں کیا جا رہا تو بتا دیا جائے، منفی جواب ملنے پر وہ ویسٹ انڈیز روانہ ہو گئے۔
رینجرزکرپشن آپریشن کا دائرہ ملک بھر میں پھیلایا جائے: ایم آر پی
یوم علی پر سیکورٹی کے نام پر عوام کو پریشان نہ کیا جائے : جی کیو ایم
