اسلام آباد (جیوڈیسک) ذرائع کے مطابق اسلام آباد انتظامیہ نے تحریک انصاف کا جلسہ روکنے کے لئے کنٹینرز لگا کر ریڈ زون کو سیل کرنے کا فیصلہ کیا ہے۔ ذرائع کے مطابق اگر تحریک انصاف نے ریڈ زون میں جلسہ کرنے کا اپنا فیصلہ نہ بدلا تو 2 اکتوبر سے نادرا چوک، سرینا چوک اور مارگلہ روڈ کے ساتھ ساتھ ریڈ زون میں داخل ہونے کے تمام راستے سیل کر دیئے جائیں گے۔
ذرائع کے مطابق پی ٹی آئی کو ڈی چوک میں جلسہ نہیں کرنے دیا جائے گا۔ پی ٹی آئی اگر جلسہ کی جگہ بدلنا چاہتی ہے تو پھر اسے نیا این او سی لینا ہو گا۔ جلسہ سے قبل تمام شرائط پوری کرنا لازم ہوگا۔
دوسری جانب پی ٹی آئی نے بھی جلسہ ریڈ زون میں ہی کرنےکا فیصلہ کیا ہے۔ ذرائع کے مطابق عمران خان نے اہم اجلاس بنی گالہ میں طلب کر لیا ہے جس میں جلسے کے انتظامات کو حتمی شکل دی جائے گی۔ ذرائع کے مطابق تحریک انصاف نے جلسے میں ڈی جے کی خدمات حاصل کرنے کے لئے ملک کے نامور ڈی جیز سے ریٹ بھی مانگ لئے ہیں۔
اب تک 5 ڈی جیز نے جلسے کے سائونڈ سسٹم کا ٹھیکا لینے میں دلچسپی ظاہر کی ہے۔ ذرائع کے مطابق ڈی جے بٹ نے بھی ٹھیکے کے لئے پروپوزل جمع کرا دیا ہے تاہم تحریک انصاف کی جانب سے نیا ڈی جے متعارف کروانے کا امکان ہے۔
پاکستان سے برادرانہ تعلقات نہیں، دو ریاستوں کے ہیں: افغان صدر اشرف غنی
وزیراعظم اور نریندر مودی کے درمیان کوئی ملاقات نہیں ہوئی: اعزاز چوہدری
