امریکا (اصل میڈیا ڈیسک) امریکا نے میانمار کی نوبیل انعام یافتہ برطرف سیاسی رہنما آنگ سان سوچی کی سزا کو انصاف کی توہین قرار دے دیا۔
ترجمان امریکی محکمہ خارجہ نیڈپرائس نے میانمار کی فوجی حکومت سے مطالبہ کیاہے کہ آنگ سان سوچی سمیت تمام منتخب رہ نماؤں اور غیر منصفانہ طور پر نظر بند تمام افراد کو رہا کیا جائے۔
اس کے علاوہ ناروے کی نوبیل کمیٹی نے بھی آنگ سان سوچی کی سزا کی مذمت کی اور خدشات کا اظہار کیا۔
واضح رہے کہ میانمار کی عدالت نے آنگ سان سوچی کو چار سال قید کی سزا سنائی تھی۔
برطانوی نشریاتی ادارے بی بی سی کے مطابق آنگ سان سوچی کوجن الزامات پر 4 سال قید کی سزا سنائی گئی ہے ان میں واکی ٹاکیز کا غیر قانونی استعمال، درآمد اورکورونا کے قوانین کو توڑنا شامل ہیں۔
واضح رہے کہ آنگ سان سوچی کو پہلی بار گزشتہ سال دسمبر میں کورونا وائرس سے متعلق قوانین کی خلاف ورزی پر مقامی عدالت نے 4 سال کی قید سنائی تھی جسے بعد میں دو سال کردیا گیا تھا۔
تاہم تازہ ترین سزا کے بعد معزول رہنما کی کل قید کی مدت 6 سال ہو گئی ہے۔
افغانستان کے صوبے ننگرہار میں اسکول کے قریب دھماکا، 9 طالبعلم جاں بحق
اقوام متحدہ کی سرپرستی میں سوڈان کے بحران کے حل کے لیے بات چیت شروع
