لاہور (جیوڈیسک) اداکارہ ریما کی فلم انڈسٹری میں گراں قدرخدمات اور امریکا میں پاکستانی کمیونٹی کے لیے کام کرنے پر ’’امریکن ابروڈ میڈیا ایوارڈ‘‘ سے نوازا گیا ہے۔
اس سلسلہ میں امریکا کے شہر واشنگٹن میں رنگا رنگ تقریب کا انعقاد کیا گیا ہے۔ جس میں امریکی کمیونٹی کے ساتھ ساتھ پاکستانی کمیونٹی کی بڑی تعداد نے شرکت کی۔ واضح رہے کہ اس سے قبل گزشتہ سال بھارتی اداکار عامر خان کو ان کی کارکردگی پر یہ ایوارڈ دیا گیا تھا۔ ریما پاکستان کی پہلی خاتون اداکارہ اور ہدایتکارہ ہیں جن کو اس ایوارڈ سے نوازا گیا ہے۔
ریما خان نے کہا کہ پاکستان میں بڑا ٹیلنٹ ہے اور یہی ٹیلنٹ ہمسایہ ملک انڈیا کی فلموں میں بھی دیکھا جا سکتا ہے۔ یہاں پر رہ کر پاکستان اور پاکستانیوں کے لیے کچھ نہ کچھ کرتی رہتی ہوں اور میری اسی کارکردگی کو دیکھتے ہوئے جیوری نے مجھے اس ایوارڈ کا حق دار ٹھہرایا ہے۔ میں چاہوں گی کہ امریکا میں پاکستانی کمیونٹی کے لیے بہترکام کروں اور پاکستان کانام روشن کرتی رہوں۔
