دھیرکوٹ (جیوڈیسک) وفاقی وزیر اطلاعات سینیٹر پرویز رشید کا کہنا ہے کہ عمران خان اورطاہر القادری بار بار ملک سےغداری کے مرتکب ہورہے ہیں جب کہ ان کا ترقی روکنے کا خواب کبھی پورا نہیں ہوگا۔
آزاد کشمیر کے علاقے دھیر کورٹ میں مسلم لیگ (ن) کے ورکرز کنونشن کی تقریب سے خطاب کرتے ہوئے وزیراطلاعات پرویز رشید نے کہا کہ عمران خان اور طاہر قادری 2018 تک دھرنے دیتے رہیں لیکن ان کا ترقی کا سفر روکنے کا خواب پورا نہیں ہوگا جب کہ عمران خان اورطاہر القادری بار بار ملک سےغداری کے مرتکب ہورہے ہیں۔ انہوں نے کہا کہ پاکستان دنیا کے بہترین معیشت والے ممالک میں شامل ہورہا ہے جب کہ ملک دشمن عناصر قادری اورعمران کے ذریعے ملکی ترقی پرحملہ آور ہوتے ہیں۔
پرویز رشید کا کہنا تھا کہ عوام کی خدمت مسلم لیگ (ن) کے منشور کا حصہ ہے اور اپنے منشور پرعمل کرکے کشمیر کو حقیقی معنوں میں جنت نظیر بنائیں گے۔ انہوں نے مسلم لیگ (ن) میں شامل ہونے والوں کو خوش آمدید کہتے ہوئے کہا کہ ماضی میں مسلم کانفرنس اور پیپلز پارٹی کی حکومتیں رہیں لیکن دونوں پارٹیوں کی قیادت نہیں بتاسکتی کہ آزاد کشمیر کےعوام کی زندگی میں کیا تبدیلی آئی جب کہ مسلم لیگ (ن) کی حکومتوں نے عوامی فلاح کے اقدامات کئے۔
افغان طالبان کی جانب سے پنجاب میں بڑی کارروائی کا خدشہ
لاہور: ڈاکوؤں نے شہری کو گن پوائنٹ پر لوٹ لیا
