سڈنی (اصل میڈیا ڈیسک) آسٹریلیا کے شہروں سڈنی اور میلبورن میں کورونا لاک ڈاؤن میں مزید سختی اور توسیع کے سرکاری حکم کے خلاف سیکڑوں افراد سڑکوں پر نکل آئے اور شدید نعرے بازی کی۔
عالمی خبر رساں ادارے کے مطابق آسٹریلیا میں کورونا کی بھارتی قسم کے تیزی سے پھیلاؤ کو روکنے کے لیے لاک ڈاؤن میں مزید توسیع کا اعلان کیا ہے اور ایس او پیز کو بھی سخت کیا گیا ہے تاہم حکومتی فیصلے پر شہریوں میں شدید غصہ پایا جاتا ہے اور احتجاج کے لیے سڑکوں پر نکل آئے۔
آسٹریلیا کے شہروں سڈنی اور میلبورن میں مظاہرین اور پولیس کے درمیان جھڑپیں بھی ہوئیں۔ مظاہرین نے پولیس پر پودوں کے گملوں کے علاوہ بوتلیں بھی پھینکیں جب کہ پولیس نے آنسو گیس کی شیلنگ اور ہوائی فائرنگ کی۔
ادھر حکومتی ترجمان نے کہا کہ پولیس نے جھڑپوں میں کئی افراد کو حراست میں لے لیا۔ جھڑپوں میں 5 پولیس اہلکار زخمی بھی ہوئے تاہم ان کی حالت خطرے سے باہر ہے۔
خیال رہے کہ آسٹریلیا کے شہر سڈنی میں گزشتہ ایک ماہ سے گھر میں رہنے کی ہدایات نافذ کی ہیں جب کہ کورونا کی بھارتی قسم کے پھیلاؤ کو روکنے کے لیے لاک ڈاؤن میں توسیع کی جا رہی ہے۔
واضح رہے کہ کورونا تیزی سے اپنی شکل تبدیل کر رہا ہے اور اب تک تین خطرناک ویرینٹ سامنے آچکے ہیں جن میں سے ایک بھارت میں سامنے آنے والی کورونا کی قسم ہے جسے ڈیلٹا وائرس کا نام دیا گیا ہے۔
عراق میں امریکی فوجی اڈے پر راکٹ حملہ
ایران میں مظاہرین پر مظالم کا معاملہ سلامتی کونسل میں اٹھایا جائے: مریم رجوی
