فیصل آباد (جیوڈیسک) بینک دولت پاکستان نے تمام شیڈولڈ بینکوں کو عید الفطر تک اپنے بینکوں کی اے ٹی ایم برانچز میں نصب اے ٹی ایم مشینوں میں کرنسی کا وافر اسٹاک موجود رکھنے کی ہدایت کی ہے۔
تمام بینکوں کو حکم دیا گیا ہے کہ وہ اپنی خراب اے ٹی ایم مشینیں 48 گھنٹوں کے اندر اند ر درست کروا کر انہیں چالو حالت میں لائیں ورنہ ان کے خلاف سخت ترین کارروائی عمل میں لائی جائے گی اور اس ضمن میں کوئی رعایت نہیں برتی جائے گی۔
اسٹیٹ بینک فیصل آباد کے ذرائع نے بتا یا کہ مختلف بینکوں کے کھاتے داران کی جانب سے اسٹیٹ بینک کے مجاز حکام کے علم میں یہ بات لائی گئی ہے کہ گزشتہ سال ماہ صیام کے دوران بالعموم اور عید الفطر پر بالخصوص اکثر بینکوں کی اے ٹی ایم مشینوں میں کرنسی ختم ہوگئی تھی جبکہ کئی مشینیں آؤٹ آف آرڈر بھی تھیں جس کے باعث اے ٹی ایم صارفین کو سخت پریشانی کا سامنا کرنا پڑا اور انہیں اپنے اہم معمولات کی سرانجام دہی میں بھی سخت دشواری پیش آئی۔
انہوں نے بتایا کہ تمام بینکوں کے حکام کو حکم دیا گیا ہے کہ وہ ماہ صیام کے آغاز سے لے کراختتام تک روزانہ کی بنیاد پر اے ٹی ایم مشینوں کی ورکنگ کو چیک کریں اور چھٹیوں کے دوران بھی اے ٹی ایم مشینوں میں وافر کرنسی موجود رکھی جائے۔ انہوں نے کہا کہ اس ضمن میں کسی غفلت یا کو تاہی کو برداشت نہیں کیا جائے گا۔
عدم پیشی پر مبشر لقمان کے ایک بار پھر قابل ضمانت وارنٹ جاری
عید الفطر پر 6 خصوصی ٹرینیں چلائی جائیں گی، وزارت ریلوے
