بنوں (جیوڈیسک) بنوں میں متاثرین شمالی وزیرستان کے بچوں اور خواتین کی بڑی تعداد خشک سردی کی وجہ سے موسمی بیماریوں کاشکار ہورہے ہیں۔ متاثرین شمالی وزیرستان اپنا گھر بار چھوڑ کر بنوں میں آئی ڈی پیز کی زندگی گزارنے پر مجبور ہیں موسم سرداور خشک ہونے کی وجہ سے انکی مشکلات میں مزید اضافہ ہوگیا ہے۔
اور طرح طرح کی بیماریوں کاشکار ہورہے ہیں۔ خشک سردی کی وجہ سے مختلف بیماریوں میں مبتلا ہونے والے روزانہ اوسطاً 500 سے 600 بچوں اور خواتین کو سرکاری اسپتالوں میں لایا جارہا ہے۔جن میں زیادہ تعداد سینے کے انفیکشن، گلے ، کھانسی ، نزلہ، زکام، بخاراور جلدی امراض کے مریض ہیں۔
دوسری جانب اسپتال کے انٹری گیٹ پر آئی ڈی پیز کے بچوں کو پولیو کے قطرے بھی پلائے جا رہے ہیں تاکہ پولیو کے وائرس کو روکا جاسکے اوپی ڈی پر آئی ڈی پیز کے علاوہ مقامی لوگوں کا رش بھی بڑھ گیا ہے موسم کی تبدیلی کیوجہ سے مقامی لوگ بھی مختلف بیماریوں کا شکار ہو رہے ہیں۔
