کیف (جیوڈیسک) نائیجیریا کے شدت پسند گروہ بوکوحرام کے جنگجوؤں نے چاڈ کی سرزمین پر اپنا پہلا حملہ کیا جس میں 10 افراد ہلاک ہو گئے۔ یہ حملہ جمعرات اور جمعے کی درمیانی شب کو کیا گیا۔
چاڈ کے سکیورٹی حکام کے مطابق جنگجو موٹر والی کشتیوں پر سوار تھے اور انھوں نے نائیجیریا اور چاڈ کی سرحد پر واقع ’جھیل چاڈ‘ کو عبور کرنے کے بعد جھیل کے کنارے واقع ایک دیہات پر حملہ کیا۔ چاڈ کے فوجیوں کی جوابی کارروائی پر حملہ آور فرار ہو گئے، لیکن اس سے پہلے وہ 10 افراد کو ہلاک کر چکے تھے۔
حال ہی میں چاڈ نے نائیجیریا، نائیجر اور کیمیرون کے ساتھ فوجی اتحاد میں شامل ہو کر بوکوحرام کے خلاف کارروائیوں کا اعلان کیا تھا۔ نگوبؤا نامی گاؤں پر حملہ کرنے والے لوگوں کی تعداد 30 کے لگ بھگ تھی اور انھوں نے گاؤں کے تقریباً دو تہائی گھروں کو آگ لگا دی۔
ایک مقامی شخص نے خبررساں ادارے رائٹرز کو بتایا کہ حملہ آور تین چھوٹی کشتیوں میں آئے تھے اور فوج کی جوابی کارروائی سے پہلے ہی وہ دس افراد کو موت کے گھاٹ اتار چکے تھے۔ چاڈ کے سرکاری حکام نے بتایا ہے کہ حملہ آوروں نے ایک مقامی سردار کو بھی مار دیا ہے۔ حکام نے خبررساں ادارے اے ایف پی کو بتایا کہ چاڈ کے فوج نے عسکریت پسندوں کی کشتیوں پر فضائی حملے کیے جس میں یہ کشتیاں تباہ کر دی گئیں۔
نائیجیریا کے قصبے بگاہ پر حملے کے بعد سے تقریباً سات ہزار افراد نے وہاں سے فرار ہو کر نگوبؤا کے گاؤں میں پناہ لے لی تھی۔ ماہرین کہتے ہیں کہ بوکو حرام کے جنگجوؤں نے نائیجیریا میں ہونے والے صدارتی انتخابات سے قبل اپنے حملوں میں اضافہ کر دیا ہے۔ بوکوحرام نے نائیجیریا میں اسلامی ریاست قائم کرنے کی غرض سے 2009 سے مسلح بغاوت شروع کر رکھی ہے۔ اس دوران ہزاروں لوگ مارے جا چکے ہیں۔
مقبوضہ کشمیر: 2 نوجوانوں کی شہادت کے خلاف چوتھے روز بھی مظاہرے
جنوبی افریقہ کی پارلیمان میں صدر کے سالانہ خطاب کے دوران ہنگامہ آرائی
