اسلام آباد (جیوڈیسک) چیئرمین سینیٹ اور ڈپٹی چیئرمین سینیٹ منتخب کرانے کے لیے سیاسی جماعتوں نے جوڑ توڑ اور رابطے شروع کر دیئے ۔ نون لیگ نے قاف لیگ سے رابطہ کرلیا ، حاصل بزنجو چیئرمین سینیٹ کیلئے متوقع حکومتی امیدوار ہیں۔
چاروں صوبوں میں سینیٹ ممبران کا انتخاب مکمل ہونے کے بعد چیئرمین اور ڈپٹی چیئرمین کیلئے جوڑ توڑ عروج پر ہے ۔ مسلم لیگ نون نے سینیٹر حاصل بزنجو کو چیئرمین سینیٹ لانے کے لیے لابنگ شروع کر دی ہے ، بلوچ رہنما کو قوم پرست جماعتوں کی حمایت حاصل کرنے کا ٹاسک دے دیا گیا۔ حاصل بزنجو کا کہنا ہے کہ اتحادیوں کا جو فیصلہ ہوا ساتھ دیں گے۔
سیاسی جماعتیں مسلسل ایک دوسرے کے ساتھ رابطے میں ہیں ، نون لیگ نے اپنا چیئرمین سینیٹ لانے کے لیے بالآخر قاف لیگ سے بھی رابطہ کرلیا ، پرویز رشید نے مشاہد حسین سے ملاقات کی ، اسحاق ڈار اور پرویز رشید نے امیر جماعت اسلامی سراج الحق سے رابطہ کیا ، سراج الحق کہتے ہیں جماعت اسلامی سینیٹ کا حلف اٹھانے کے بعد چیئرمین سینیٹ کے حوالے سے فیصلہ کرے گی ۔ خواجہ سعد رفیق نے اے این پی کے رہنما امیر حیدر ہوتی کو فون کیا ، امیر حیدر ہوتی نے کہا کہ وفاقی وزیر نے اسفند یار ولی کیلئے وزیر اعظم کا پیغام دیا ہے۔
آصف زرداری نے بھی اسفند یار ولی سے رابطہ کیا ہے ، پیپلز پارٹی اور اے این پی کے وفود پیر کو اسلام آباد میں مشاورت کریں گے ۔ جبکہ چودھری شجاعت کی مصروفیات کے باعث آصف زرداری سے آج کی ملاقات ملتوی کر دی گئی ، دونوں رہنما اب پیر کو اسلام آباد میں ملیں گے ، آصف زرداری نے منظور وٹو سے ملاقات میں کہا کہ ہمیشہ اتحادیوں سے مل کر سیاست کی ہے ، چیئرمین سینیٹ کے معاملے پر بھی اتحادیوں سے مل کر فیصلے کریں گے ۔ وفاقی وزیر پرویز رشید کہتے ہیں کہ سینیٹ میں فاٹا کی موثر نمائندگی کے لیے حکومت نے تمام سیاسی جماعتوں سے مشاورت کا فیصلہ کیا ہے۔
6 کروڑ 62 لاکھ سموں کی تصدیق، 78 لاکھ 17 ہزار بند
سرکاری ملازمتوں میں خواتین کے کوٹے میں اضافہ کر دیا ہے: شہباز شریف
