چکوال کی خبریں 13.07.2013
Posted on July 14, 2013 By Tahir Webmaster سٹی نیوز
ڈی سی او چکوال یاور حسین نے کہا ہے کہ کلرکہار جھیل کی چار دیواری کی حفاظت کے لیے اقدامات کیے جائیں
چکوال (اعجاز بٹ) ڈی سی او چکوال یاور حسین نے کہا ہے کہ کلرکہار جھیل کی چاردیواری کی حفاظت کے لیے اقدامات کیے جائیں۔ اور جھیل کے گردونواح میں پانچ سومیٹر تک ناجائز تجاوزات ختم کیے جائیں۔ یہ بات انہوں نے آج کلرکہارجھیل کی ناجائز تجاوزات اور میوزیم بلڈنگ کے حوالے سے اجلاس کی صدارت کرتے ہوئے کہی اجلاس میں اسسٹنٹ کمشنر کلرکہار سبطین عابد کاظمی، ٹی ایم او دیگر متعلقہ محکموں کے سربراہان نے شرکت کی۔ اس موقع پر ڈی سی او چکوال نے کہا کہ جھیل کنارے سے لے کرپانچ سو میٹر تک جو بھی تجاوزات ہیں ان کو ختم کیا جائے اور حفاظتی دیوار کی مرمت کی جائے۔ انہوں نے اسسٹنٹ کمشنر کو ہدایت کی کہ جھیل کی حفاظتی دیوار کے اندر ہر قسم کے مویشیوں کا داخلہ بندکیاجائے۔ انہوں نے محکمہ بلڈنگ کو بھی ہدایت کی کہ میوزیم بلڈنگ کو جلد از جلد محکمہ آثار قدیمہ کے حوالے کیا جائے۔ تاکہ محکمہ آثار قدیمہ عوام الناس کے لیے میوزیم کو جلد از جلد ڈسپلے کر سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرید میں بیلوں کا جلسہ دیکھنے کے لیے آنے والے دو افراد قیمتی گاڑیوں سے ہاتھ دھو بیٹھے
چکوال(ڈسٹرکٹ رپورٹر) مرید میں بیلوں کا جلسہ دیکھنے کے لیے آنے والے دو افراد قیمتی گاڑیوں سے ہاتھ دھو بیٹھے محمد خان ساکن ڈھرنال اور خالد محمود ساکن محلہ غربی چکوال مرید میں بیلوں کا جلسہ دیکھنے کے لیے گئے اور کاریں پارکنگ میں کھڑی کیںدونوں کاریں نامعلوم چور لے کر فرار ہو گئے۔پولیس نے مقدمات درج کر کے تفتیش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈسٹرکٹ پولیس آفیسر چکوال نے نجی ٹی وی چینل کے بورڈز اتارنے والے کانسٹیبل کو معطل کر کے لائن حاضر کرنے کے احکامات جاری کیے ہیں
چکوال(ڈسٹرکٹ رپورٹر) ڈسٹرکٹ پولیس آفیسر چکوال نے نجی ٹی وی چینل کے بورڈز اتارنے والے کانسٹیبل کو معطل کر کے لائن حاضر کرنے کے احکامات جاری کیے ہیں۔ جبکہ محکمانہ انکوائری کیے جانے کا بھی حکم دیا ہے۔ڈسٹرکٹ الیکٹرانک میڈیا ایسوسی ایشن کے وفد جس میں چیئرمین شفیق ملک ،جنرل سیکرٹری عبدالغفور منہاس، وائس چیئرمین فہیم ملک، سیکرٹری اطلاعات ثاقب عباس، ایگزیکٹو ممبران ڈاکٹر ساجد اقبال اور راجہ ذوالفقار شامل تھے نے ڈی پی او سے ملاقات کی، چینل ٥ کے بیوروچیف فہیم ملک نے ڈی پی او کو بتایا کہ چینل ٥ کے بورڈ ڈسٹرکٹ کورٹس میں تعینات اہلکار وسیم نے پرائیویٹ افراد کے ہمراہ مل کر اتار لیے ہیں۔ جس پر ڈی پی او نے فوری طور پر وسیم کو معطل کر کے لائن حاضر کر دیا جبکہ محکمانہ انکوائری کرنے کے احکامات جاری کر دئیے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈی سی او چکوال اور دیگر افسران اگر رمضان المبارک میں واقعی عوام کو ریلیف دینا چاہتے ہیں
چکوال(ڈسٹرکٹ رپورٹر) ڈی سی او چکوال اور دیگر افسران اگر رمضان المبارک میں واقعی عوام کو ریلیف دینا چاہتے ہیں تو پروٹوکول کے بغیر اجنبی بن کر بازاروں کادورہ کریں۔ لوڈ شیڈنگ کی صحیح صورتحال سے آگاہی کے لیے واپڈا حکمران سے سب اچھا سننے کی بجائے عوام میں آ کر رائے لیں جبکہ اشیائے خوردونوش کے ریٹ چیک کرنے کے لیے گاہک بن کر بازار کا دورہ کریں۔ چکوال سٹیزن فورم کے چیئرمین عامر نوید قاضی نے کہا کہ وی آئی پی پروٹوکول سے سوائے افسران کی اپنی نمائش کے عوام کو کبھی ریلیف نہیں مل سکتا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
متعدد مقدمات میں ملوث ملزم نوید انجم عرف نویدا اشتہاری ڈرامائی انداز میں پکڑا گیا
چکوال(ڈسٹرکٹ رپورٹر) متعدد مقدمات میں ملوث ملزم نوید انجم عرف نویدا اشتہاری ڈرامائی انداز میں پکڑا گیا۔ سب انسپکٹر محمد اشرف گوندل نے ملزم کو انتہائی ڈرامائی انداز میں گرفتار کرکے اس کا جسمانی ریمانڈ حاصل کرلیا۔ جنوال ٹائون کے رہائشی نوید انجم نے ایک عرصہ سے دہشت پھیلا رکھی تھی ایک مقدمہ میں عدالت سے ضمانت منسوخ ہو چکی ہے۔تھانہ سٹی میں ایک شخص سے موٹر سائیکل چھیننے اور تشدد کرنے پر مقدمہ درج کیاگیا تو ملزم مفرور ہو گیا۔ بعد ازاں تترال میں اپنے سسر اورسالے سے مل کر راجہ عبدالرشید پر قاتلانہ حملہ کیا۔ پولیس نے مقدمہ درج کر لیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مقامی انتظامیہ عوام کو ریلیف دینے میں ناکام ہو گئی
چکوال(ڈسٹرکٹ رپورٹر) مقامی انتظامیہ عوام کو ریلیف دینے میں ناکام ہو گئی اور عوام کو ناجائز منافع خوروں کے رحم وکرم پر چھوڑ دیا گیا ۔ا شیائے خوردونوش عوام کی پہنچ سے باہر ہو چکے ہیں۔ رمضان المبارک سے چند دن قبل اشیاء کے جو ریٹ مقرر تھے آج وہ ڈبل ہو چکے ہیں۔ کسی انتظامی افسر نے بازار میں ریٹ چیک کرنے کی زحمت نہیں کی۔ دکاندار من مانے ریٹ وصول کر رہے ہیں۔
