چکوال کی خبریں 28/11/2013

Posted on November 28, 2013 By Majid Khan سٹی نیوز

چکوال(ڈسٹرکٹ رپورٹر)چکوال شہر کی یونین کونسل نمبر1کے دفتر میں تعینات انچارج سیکرٹری نے قواعد و ضوابط کی دھجیاں اڑانا شروع کر دیں۔ سیکرٹری نے دفتر سے اکثر غیر حاضررہنا معمول بنا لیا۔ ماہانہ ہزاروں کی کرپشن اور شہریوں کو ذلیل و خوار کرنا انچارج سیکرٹری کا پسندیدہ مشغلہ بن گیا اہلیان یونین کونسل نمبر1کا سیکرٹری کے رویہ پر شدید احتجاج۔ تفصیلات کے مطابق دفتر یونین کونسل نمبر1میں تعینات انچارج سیکرٹری طارق دفتر سے آئے روز غیر حاضر رہتا ہے اور یہ سیکرٹری اس قدر منہ زور اور بااثر ہے کہ روزانہ اپنی مرضی سے دن گیارہ بجے ڈیوٹی پر آتا ہے اور دو بجے چھٹی کرکے واپس چلا جاتا ہے سیکرٹری کی لوٹ مار کا یہ عالم ہے کہ دفتر میں اندراج پیدائش و اموات اور نکاح و طلاق کے سلسلہ میں آنے والے لوگوں سے مقررہ سرکاری فیس کی بجائے ہزاروں روپے کی رشوت بٹور لیتا ہے جبکہ سرٹیفکیٹ لینے کیلئے آنے والوں کو بھی دفتر کے دس سے پندرہ چکر لگانا پڑے ہیں تب کہیں جاکر ان کو پیدائش یا اموات کا سرٹیفکیٹ ملتا ہے اور اگر کوئی طلاق کا معاملہ ہوتو سیکرٹری طارق متعلقہ پارٹی سے دس سے پندرہ ہزار روپے فی کیس بھی وصول کرتا ہے یہ بھی معلوم ہوا ہے کہ سیکرٹری طارق تحصیل تلہ گنگ کے موضع ٹمن کا رہنے والا ہے اور وہ روزانہ اپنے گاؤں سے چکوال آتا ہے اہلیان علاقہ نے انچارج سیکرٹری یونین کونسل نمبر1طارق کی لوٹ مار، مسلسل غیر حاضریوںاور بے قاعدگیوں پر شدید احتجاج کرتے ہوئے اس کے خلاف کارروائی کا مطالبہ کیا ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)سیکرٹری یونین کونسل نمبر1چکوال طارق کے بارے میں معلوم ہوا ہے کہ اس کی ماہانہ تنخواہ 22سے 23ہزار روپے ہے اور اس کے روزانہ ٹمن سے چکوال آنے اور جانے پر کرایہ کے اخراجات سمیت 4سے 5سو روپے روز خرچ ہوجاتا ہے جس کا حساب لگایا جائے تو اس کا ماہانہ ٹرانسپورٹ کا خرچہ 15ہزار روپے بنتا ہے اب سوچنے کی بات یہ ہے کہ 22ہزار روپے ماہانہ تنخواہ لینے والا سیکرٹری 15ہزار روپے ماہانہ کرایوں کی مد میں ادا کرکے اپنے دیگر گھریلو معاملات و اخراجات کس طرح چلا رہا ہے ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)سیکرٹری یونین کونسل نمبر1چکوال شہر طارق سکنہ ٹمن اپنی مسلسل غیر حاضریوں کرپشن اور عوام کو ذلیل و خوار کرنے کے واقعات کو بے نقاب ہونے سے بچانے کیلئے ہاتھ پاؤں مارنے لگا اس سلسلہ میں سیکرٹری نے مختلف ذرائع سے روزنامہ الشرق کے ڈسٹرکٹ رپورٹر کو سفارشیں بھی کروائیں کہ وہ اس کی بے قاعدگیاں منظر عام پر نہ لائیں لیکن اس کی بے قاعدگیوں کی تمام تر تفصیلات اہلیان علاقہ کے مفاد میں منظر عام پر لائی جارہی ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکوال(ڈسٹرکٹ رپورٹر)ٹی ایم اے کلرکہار میں تعینات سب انجینئر یامین کے زیر نگرانی جتنے بھی ترقیاتی کام ہوئے ہیں ان میں واٹر سپلائی سکیم کلرکہار سمیت زیادہ تر ترقیاتی منصوبے ایسے ہیں جو کاغذوں میں تو مکمل ہوچکے ہیں لیکن موقع پر کام ابھی ادھورے پڑے ہیں جبکہ ان منصوبوں کے ٹھیکیداروں نے سب انجینئر یامین کی ملی بھگت سے اپنے بل بھی پاس کروالئے ہیں اور رقم ہضم کرگئے ہیں سب انجینئر یامین 11ویں سکیل کا ملازم ہے لیکن 17سکیل کی پوسٹ کا اضافی چارج بھی اس کے پاس ہے حالانکہ سکیل 17کی پوسٹ گزٹڈ آفیسر کی ہوتی ہے جبکہ سب انجینئر یامین 11ویں سکیل کا ملازم اور نان گزٹڈ ہے اور ٹھیکیداروں سے ڈبل کمیشن وصول کررہا ہے عوامی حلقوں نے ڈی سی او چکوال سے مطالبہ کیا ہے کہ تمام ترقیاتی منصوبوں کا ریکارڈ طلب کرکے موقع پر معائنہ کیا جائے کہ کون سے منصوبے ادھورے ہیں اور کتنی کرپشن کی گئی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)سب انجینئر یامین 11ویں سکیل کا ملازم ہے کیا اس نے فنانس کے بلوں اور دیگر اہم کاغذات پر دستخط کئے ہیں کیا وہ محکمانہ اور قانونی طور پر صحیح مانے جائیں گے یا غلط کیونکہ سب انجینئر ایک نان گزٹڈ آفیسر ہے ۔
چکوال(ڈسٹرکٹ رپورٹر)ٹی ایم اے کلرکہار کے سب انجینئر یامین کا ڈپلومہ چیک کیا جائے کہ وہ تین سالہ سول ایسوسی ایٹس انجینئر ڈپلومہ ہولڈر ہے یا کہ مکینکل ڈپلومہ ہولڈر ہے کیونکہ سب انجینئر کے لئے ضروری ہے کہ وہ سول ایسوسی ایٹس انجینئرنگ کا ڈپلومہ ہولڈر ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر) موضع سمن آباد اور جبیرپور کے عوام پی ٹی سی ایل کی ناقص کارکردگی اور غیر معیاری سروس پر سراپا احتجاج بن گئے ۔ تفصیلات کے مطابق علاقہ میں 50سالہ پرانی لائن کے ذریعے دی جانیوالی سروس انتہائی غیر معیاری ہے اور سمن آباد، جبیرپور اور دیگر ملحقہ علاقوں میں ڈی ایس ایل کی سہولت بھی برائے نام دستیاب ہے لیکن ڈی ایس ایل کے کنکشن اور پیکجز کے من مانے بل وصول کئے جارہے ہیں اہلیان علاقہ نے محکمہ پی ٹی سی ایل کے اعلی حکام سے مطالبہ کیا ہے کہ علاقہ میں نئی کیبل بچھا کر صارفین کو معیاری سہولت فراہم کی جائے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)زکوة و عشر کمیٹی جبیرپور کے عہدیداران کا چناؤ مکمل کرلیا گیا گزشتہ روز مقامی مسجد میں زکوة و عشر کمیٹی کے عہدیداروں کے انتخاب کیلئے منعقدہ اجتماع میں متفقہ طور پر نیئر عباس چوہان آف جبیرپور کو چیئرمین جبکہ عبدالوحید کھوکھر آف جبیرپور کو وائس چیئرمین منتخب کیا گیا ممبران میں حاجی محمد اشرف ڈھوک بودلے شاہ، ڈاکٹر منیر حسین ڈھوک گوندل، لیاقت علی انجم سمن آباد، راجہ نوید انیس جبیرپور اور شمیم اعجاز کھوکھر جبیرپور کو منتخب کیا گیاہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)چکوال شہر کی وارڈ نمبر35سے امیدوار برائے جنرل کونسلر چوہدری نوید اختر کہوٹ نے بھرپور انداز میں عوامی رابطہ مہم کا آغاز کرتے ہوئے شہری سطح پر سب سے پہلے باضابطہ طورپر الیکشن آفس قائم کردیا۔ چوہدری نوید اختر کہوٹ نے اپنا الیکشن آفس محلہ غربی میں قائم کیا ہے جہاں اہلیان وارڈ کی ایک بڑی تعداد ہمہ وقت موجود رہتی ہے مذکورہ وارڈ میں چوہدری نوید اختر کہوٹ کے مد مقابل کسی بھی امیدوار نے تاحال اپنا الیکشن آفس قائم کرنا تو درکنار صحیح انداز میں عوامی رابطہ مہم بھی شروع نہیں کی ہے ۔ سیاسی حلقے مذکورہ وارڈ سے چوہدری نوید اختر کہوٹ کو مضبوط امیدوار قرار دے رہے ہیں ۔
چکوال(ڈسٹرکٹ رپورٹر)وارڈ نمبر11سے مسلم لیگ ن کے امیدوار برائے جنرل کونسلر چوہدری سجاد احمد خان نے کہا ہے کہ مسلم لیگ ن اپنی کارکردگی پر میدان عمل میں ہے اور آئندہ بلدیاتی انتخابات میں چکوال شہر سمیت ضلع بھر میں مسلم لیگ ن کے نامزد کردہ امیدوار عوام کے تعاون سے واضح اکثریت میں کامیابی حاصل کریں گے گزشتہ روز اپنے ایک بیان میں انہوں نے کہا کہ مسلم لیگ ن کے پلیٹ فارم سے بھرپور انداز میں عوامی رابطہ مہم شروع کررکھی ہے اور مسلم لیگ ن کے امیدواروں کو ضلع چکوال میں مختلف سیاسی و سماجی گروپوں ، شخصیات اور جماعتوں کی حمایت بھی حاصل ہے اور ان کی عوامی حمایت میں بھی آئے روز اضافہ ہوتا جارہا ہے انہوں نے کہا کہ مسلم لیگ ن کا مقابلہ کرنے کیلئے معرض وجود میں آنے والے غیر فطری اتحادیوں کو بلدیاتی انتخابات میں عبرتناک شکست کا سامنا کرنا پڑے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)چکوال شہر کو فراہمی آب کیلئے 2007میں شروع کئے جانے والے PMDFC کے تعاون سے ٹی ایم اے چکوال کے ساڑھے سات کروڑ روپے کے منصوبہ جوکہ بڑھ کر 11کروڑ تک پہنچ چکا ہے میں کروڑوں روپے کی کرپشن اور منصوبہ کی تاحال تکمیل نہ ہونے کے خلاف ریجنل ڈائریکٹر اینٹی کرپشن راولپنڈی کو تحریری درخواست ارسال کردی گئی ہے مذکورہ درخواست میں چکوال کے رہائشیملک نیاز حسین اعوان نے موقف اختیار کیا ہے کہ 2007میں مڈ ٹیکنالوجی فرم کے چیف ایگزیکٹو ٹھیکیدار عاطف نے کوٹ راجہ ڈیم سے چکوال شہر کو فراہمی آب کے ساڑھے سات کروڑ روپے کے منصوبے کا ٹھیکہ حاصل کیا جس کا ٹینڈر اوپن ہونے کے ساتھ ہی ٹی ایم اے کے افسران ، ٹی ایم او افتخار ایلی ، ٹی او آئی اینڈ ایس قاسم نیازی اور سب انجینئر صدیقی کی ملی بھگت سے موبلائزیشن ایڈوانس کی مد میں ٹھیکیدار عاطف کو ایک کروڑ 55لاکھ روپے کی رقم جاری کردی گئی جوکہ اس نے اپنے ذاتی استعمال میں رکھی بعدازاں ٹھیکیدار عاطف کا بھائی کاشف ٹی ایم او چکوال تعینات ہوگیا مذکورہ منصوبے پر دو سال بعد 2009میں ٹھیکیدار عاطف نے کام شروع کیا اور کوٹ راجہ ڈیم سے تین کلومیٹر کے فاصلے پر موضع کوٹ راجہ میں واٹر بیڈ، واٹر فلٹریشن پلانٹ، واٹر ٹینک اور الیکٹرک موٹرز کیلئے ایک کمرہ کی تعمیر شروع کی جس کے لئے ٹی ایم اے چکوال نے 56کنال کے لگ بھگ اراضی خرید کی لیکن کوٹ راجہ ڈیم سے واٹر بیڈز تک پانی پہنچانے اور وہاں سے تترال روڈ پر واقع مرکزی ٹینکوں تک پانی پہنچانے کیلئے کوئی انتظام نہیں کیا گیا 2007سے اب تک ٹھیکیدار عاطف ساڑھے 9کروڑ کے لگ بھگ رقم وصول کرچکا ہے اور اس کے اب بھی ڈیڑھ کروڑ روپے کے بلز قابل ادا ہیں اور یہ منصوبہ کاغذی کارروائی میں ہینڈ اوور بھی کردیا گیا ہے لیکن حقیقت میں یہ نامکمل ہے ۔درخواست میں کہا گیا ہے کہ مذکورہ منصوبہ کی دیکھ بھال کیلئے 2011میں ٹی ایم اے چکوال نے کنٹریکٹ پر چار ٹیوب ویل آپریٹرز اور دو چوکیدار بھرتی کرکے کوٹ راجہ واٹر بیڈز پر تعینات کررکھے ہیں جن کی موجودگی میں یہاں نصب ٹرانسفارمر بھی چوری ہوا جس کا مقدمہ تھانہ ڈوہمن میں درج ہے او ر نئے ٹرانسفارمر کی تنصیب کیلئے ٹی ایم اے نے تین لاکھ روپے سے زائد رقم بھی ادا کی اور2011سے اب تک واٹر بیڈز پر تعینات 6ملازمین کو اب تک ہر ماہ باقاعدگی سے تنخواہیں بھی دی جارہی ہیں ۔درخواست میں ریجنل ڈائریکٹر محکمہ اینٹی کرپشن راولپنڈی سے مطالبہ کیا گیا ہے کہ عوامی مفاد کے مذکورہ منصوبہ میں کرپشن کرنے پر سابق ٹی ایم او چکوال افتخار ایلی(حال تعینات ٹی ایم اے آفس جنڈ) ، سابق ٹی ایم او کاشف (حال تعینات ٹی ایم اے آفس گوجرخان)، سابق ٹی ایم او قمر ذیشان (حال تعینات ٹی ایم اے آفس ٹیکسلا) اور موجود ٹی ایم او چکوال طارق محمود پرویا کے ساتھ ساتھ سابق ٹی او آئی اینڈ ایس چکوال قاسم نیازی(حال تعینات کمشنر آفس راولپنڈی)، سابق ٹی او آئی اینڈ ایس فرحت رانجھا(حال تعینات پوٹھوہار ٹاؤن راولپنڈی)، سابق سب انجینئر صدیقی، سابق سب انجینئر افتخار فاضل(حال تعینات پوٹھوہار ٹاؤن ٹی ایم اے آفس راولپنڈی) سمیت ٹھیکیدار عاطف کے خلاف غبن کا مقدمہ درج کیا جائے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکوال(ڈسٹرکٹ رپورٹر)وارڈ نمبر10چکوال شہر سے امیدوار برائے جنرل کونسلر میاں نصیر نے کہا ہے کہ ہم مخالفین کے پروپیگنڈے کا منہ توڑ جواب دیں گے اور ہم نے اپنی عوامی رابطہ مہم بھرپور انداز میں جاری رکھی ہوئی ہے گزشتہ روز اپنے ایک بیان میں انہوں نے کہا کہ اہلیان وارڈ مخالفین کے بے بنیاد پروپیگنڈہ پر توجہ نہیں دے رہے اور اپنی یقینی شکست سے گھبرا کر ہمارے مخالفین اوچھے ہتھکنڈوں پر اتر آئے ہیں لیکن ہم عوام کی حمایت سے مسلم لیگ ن کے پلیٹ فارم سے آئندہ بلدیاتی انتخابات میں بھرپور کامیابی حاصل کریں گے۔

by Majid Khan

Nasir Mehmood - Chief Editor at GeoURDU.com