چکوال کی خبریں 7.09.2013
Posted on September 7, 2013 By Geo Urdu سٹی نیوز
چکوال کی ایمرجنسی میں تعینات ڈاکٹروں نے ایک نجی کمپنی کے ساتھ ملی بھگت کر کے عوام کی کھال ادھیڑنا شروع کر دی
چکوال (ڈسٹرکٹ رپورٹر) ڈسٹرکٹ ہیڈ کوارٹر ہسپتال چکوال کی ایمرجنسی میں تعینات ڈاکٹروں نے ایک نجی کمپنی کے ساتھ ملی بھگت کر کے عوام کی کھال ادھیڑنا شروع کر دی۔ ایمرجنسی میں تعینات چار میڈیکل افسران نے نیازی برادران کے ساتھ گٹھ جوڑ کر کے عوام کی چمڑی ادھیڑنا شروع کر رکھی ہے۔ گزشتہ کئی ماہ سے ایمرجنسی پر مکمل طور پر نیازی برادران کا راج ہے اور ڈاکٹر تمام ادویات نیازی برادران کی تجویز کرتے ہیں۔بدلے میں انہیں لاکھوں روپے ماہانہ کمیشن دیا جاتا ہے۔ GXOL،ZINTOXIN،TRIPIN، LEVOGREEN، اور دیگر اس طرح کے انجکشن روزانہ سینکڑوں کی تعدادمیں لکھے جاتے ہیںَ نوے فیصد پرچیوں پر یہ انجکشن درج ملتا ہے معلوم ہوا ہے کہ معمولی مرض کے لیے بھی ایمرجنسی آنے والے مریض کو مذکورہ انجکشن لازمی لگایا جاتا ہے تاکہ اپنا کمیشن کھرا کیا جا سکے۔ مذکورہ انجکشن کی قیمت تین سو روپے کے قریب ہے جبکہ اس انجکشن کی تیاری پر صرف پینتیس روپے خرچ ہوتے ہیں۔ ملٹی نیشنل کمپنیوں کے اسی سالٹ (CEFTRIXONE) میں انجکشن کی تیاری پر 180 روپے خرچ ہوتے ہیں۔ جبکہ وہ 200 روپے کے لگ بھگ فروخت ہوتا ہے جبکہ نیازی برادران کی کمپنی کی طرف سے جو انجکشن تیار ہوتا ہے اس پر 265 روپے کے لگ بھگ اضافی رقم وصول کی جاتی ہے۔ روزانہ سو سے زائد انجکشن لکھے جاتے ہیں اور اس میں ملوث ڈاکٹروں کو دس لاکھ روپے فی کس کے حساب سے ماہانہ کمیشن ملتا ہے یہی وجہ ہے کہ وہ اس انجکشن کو ترجیح دے رہے ہیں۔ ذمہ دار ذرائع کے مطابق ای ڈی او ہیلتھ اور ایم ایس ڈسٹرکٹ ہیڈ کوارٹر ہسپتال چکوال تمام صورتحال سے آگاہ ہونے کے باوجود کوئی کاروائی نہیں کر رہے کیونکہ وہ بھی باقاعدہ نیازی برادران سے حصہ وصول کرتے ہیں۔ عوام کی کھال ادھیڑنے میں ڈرگ ٹیسٹنگ لیبارٹری بھی شریک ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نیازی میڈیسن کمپنی کے امجد نیازی نے موقف اختیار کرتے ہوئے کہا کہ ہمارا کام آرڈر سپلائی کرنا ہے
چکوال (ڈسٹرکٹ رپورٹر) نیازی میڈیسن کمپنی کے امجد نیازی نے موقف اختیار کرتے ہوئے کہا کہ ہمارا کام آرڈر سپلائی کرنا ہے اور ہم صرف اپنا آرڈر سپلائی کرتے ہیں ہمارا کسی بھی ڈاکٹر یا ہسپتال سے کوئی گٹھ جوڑ نہیں ہے۔ امجد نیازی نے کہا کہ کوئی کتنا منافع کماتا ہے ہمیں اس سے کوئی غرض نہیں ہمیں جو آرڈر ملتا ہے ہم وہ مال سپلائی کر دیتے ہیں۔ انہوں نے تمام الزامات کو رد کر دیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تھانہ لاوہ کے علاقے دندہ شاہ بلاول میں انیس سالہ درزی کا کام کرنے والے نوجوان کو قتل کر کے لاش گھمبیر پل پر پھینک دی گئی
چکوال (ڈسٹرکٹ رپورٹر) تھانہ لاوہ کے علاقے دندہ شاہ بلاول میں انیس سالہ درزی کا کام کرنے والے نوجوان کو قتل کر کے لاش گھمبیر پل پر پھینک دی گئی۔ انیس سالہ امیر حسین ساکن چکڑالہ میانوالی صبح سات بجے گھر سے کام کے لیے نکلا جسے نامعلوم ملزمان نے قتل کر کے لاش نالہ گھمبیر پل پر پھینک دی۔لاوہ پولیس نے لاش کا پوسٹمارٹم کرنے کے بعد مقدمہ درج کر کے قاتل کی تلاش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ملت چوک چکوال سے موبائل شاپ میں لاکھوں روپے کی چوری کرنے والے تین چوروں کو گرفتار کر لیاگیا
چکوال (ڈسٹرکٹ رپورٹر) ملت چوک چکوال سے موبائل شاپ میں لاکھوں روپے کی چوری کرنے والے تین چوروں کو گرفتار کر لیاگیا۔ مال مسروقہ بھی برآمد، سٹی پولیس نے ملزمان ثاقب ،حسیب اور حامد پٹھان کو گرفتار کر کے عدالت سے تین روزہ جسمانی ریمانڈ بھی حاصل کرلیا ہے۔تینوں ملزمان نے ایم ایم موبائل ملت چوک سے لاکھوں روپے مالیت کے قیمتی موبائل اور موبائل کارڈز و دیگر سامان چوری کرلیاتھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
معروف ہومیو ڈاکٹر ڈاکٹر عرفان شوکت کا صاحبزادہ دو تیز رفتار رکشوں کے درمیان پھنس کر شدید زخمی ہو گیا
چکوال (ڈسٹرکٹ رپورٹر) معروف ہومیو ڈاکٹر ڈاکٹر عرفان شوکت کا صاحبزادہ دو تیز رفتار رکشوں کے درمیان پھنس کر شدید زخمی ہو گیا۔ ڈاکٹر عرفان شوکت کاصاحبزادہ حمزہ عرفان تحصیل چوک کے قریب جا رہا تھا کہ دو رکشے ریس لگاتے ہوئے آ گئے اور حمزہ عرفان دونوں رکشوں کے درمیان پھنس گیا۔ جس سے شدید زخمی ہو گیا۔حمزہ عرفان کو ہسپتال داخل کر دیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہسپتال روڈ چکوال پر میٹر کی باڈی توڑ کر آہستہ کرنے والے صارف کے خلاف مقدمہ درج کر لیاگیا
چکوال (ڈسٹرکٹ رپورٹر) ہسپتال روڈ چکوال پر میٹر کی باڈی توڑ کر آہستہ کرنے والے صارف کے خلاف مقدمہ درج کر لیاگیا۔نور حسین ولد نذر حسین نے میٹر کی باڈی توڑ کر اسے آہستہ کر دیا۔ اور ستر ہزار سے زائد کی بجلی چوری کی۔سٹی پولیس نے ایس ڈی او سٹی کی تحریری درخواست پر مقدمہ درج کر کے تفتیش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تھانہ صدر کے علاقے چک ملوک میں شہید کی قبر پر لگے کتبے کو توڑ کر ٹکڑے ٹکڑے کر دیا گیا
چکوال (ڈسٹرکٹ رپورٹر) تھانہ صدر کے علاقے چک ملوک میں شہید کی قبر پر لگے کتبے کو توڑ کر ٹکڑے ٹکڑے کر دیاگیا۔ ملزمان طاہر انتظار، تسنیم حیدر اور نسیم اشرف وغیرہ نے سات نامعلوم افراد کے ساتھ مل کر محمد الطاف شہید نامی شخص کی قبر پر لگے کتبے کو توڑ ڈالا۔ کتبے پر مقدس تحریریں درج تھیں۔ پولیس نے گل اصغر کی تحریری
درخواست پر مقدمہ درج کر کے تفتیش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جنگا سے موٹر سائیکل چھیننے والے ملزمان کا سراغ مل گیا۔ مرکزی ملزم تھانہ صدر میں ایک اور مقدمہ میں شامل تفتیش پایا گیا
چکوال(ڈسٹرکٹ رپورٹر) جنگا سے موٹر سائیکل چھیننے والے ملزمان کا سراغ مل گیا۔ مرکزی ملزم تھانہ صدر میں ایک اور مقدمہ میں شامل تفتیش پایا گیا۔ ملزمان ہمایوں، طالب نے 18 اگست کو موہڑہ تھنیل کے رہائشی عبدالقیوم سے بیوی بچوں کو یرغمال بنا کر موٹر سائیکل چھین لیا تھا۔ گزشتہ روز ایک اور مقدمہ میں مذکورہ ملزم گرفتار ہو گیا۔
