تحریر : انجینئر افتخار چودھری پچھلے دیہاڑیاں بچ مناں ڈسکہ ماں آل پاکستان گجرز ایسوسی ایشن گی تقریب ماں شرکت گئو موقع ملیو۔ارشد ضیاء گجر ہک مدت ہوئی اے برادری گی خدمت کریا پر لگا ایں۔ گجرگھٹھا نہ وی ویں تیں کوئی انوکھی گل نیں ماری قوم اللہ کا فضل نال اتفاق اتحاد ناں خوب سمجھے۔مناں اس تنظیم کا سرپرست بنایو تو آکھیو تمنے آنا ضرور ائے۔سٹھاں کولوں اوپر پونچیا بندا گی صحت موسم گا حال کی طرح ائے کسے دیہاڑے ٹھیک تئے کسے دن خراب۔اللہ نے کیئو ڈسکہ جان کا بہانو نکل آیو گھروں نکیاں کی ماں گا دل گا ڈاکٹر وی لہور ائے سوچیا مریدکے گا پلاٹ بیگم گی ڈاکٹر یاترا بڈھا بھائیا امتیاز گی زیارت تئے ڈسکہ کی برادری ناں ملتا چلوں تئے نال دیوی گئو درشن بھی ہو جئے گئو میری مراد پوتریاں نال ملاقات اللہ نے کئیو سارا کج ای ہو گئیو۔میں انہاں ساریاں سنگیاں دوستاں گا شکر گزار اوں جنہاں نے اتنی خوبصورت تقریب کا بند و بست کیتو۔خاص طور پر بھائی جمیل چشتی مختار پائیو اور کج او لوک ایں جنہاں گا نام یاد نیں۔میرا خاص موضوع تحریک پاکستان تھو۔ڈسکہ گا سنگیاں نے چودھری رحمت علی ٹیلینٹ ایوارڈ گی بڑی سوہنی سوچ نال محفل گئو بندوبست کیتو۔نکا نکا بچہ تئے بچیاں ناں تک کے دلوں خوشی ہوئی کہ جیہڑی قوم گئے ہتھ وچ گنڈاسہ تئے ڈنڈہ تھو ایہ قوم اپنی سنگت کتاب نال کر چکی ائے۔چودھری شفیق چیچی وقاص گجر محسن آزاد بھولی گجر چودھری اسمعیل چودھری اسلم گجر رفاقت گجر انس غازی رضا سبحانی تئے ہور وی ڈیر سارا مضمان تھا۔
سچی گل ایئے محفل یا کوئی وی مجلس اگر تریئاں گھنٹیاں کولوں زیادہ وئے تئے سنیا آلا بولیا آلا سارا تنگ آ جیں ۔ہت وی کوئی ایہا جیو ہال تھو۔سٹیج گا سیکریٹری مختار گجر بڑا جوش اور جذبہ نال مضماناں ناں بلاتا ریاں اونہاں گی کوشش رئی کہ لوگ موم گا نک بنیاں ریں تئے اووا کج آکھیں بولیں جو انہاں کی اپنی سوچ ائے سیکریٹری گا کم ساریاں ناں راضی رکھنو وا۔ایہ نئیں جیڑا پسند نئیں اس جایا گئے بعد اپنی مرضی کرتا رئے۔ہک گل اتفاق اور اتحاد گی کیتی تئے جائے پر ایہ ہو نہیں سکتو۔برادری کا بارا میں آکھیں کہ ہم چار کروڑ آں مناں ایہ دسو ایناں چار کروڈ لوکا ں گی ایک تنظیم کیویں ہو ہکا؟میں کوٹ تئے نئیں ماریو کہ گجراں گی مثال ٹھوویاں کی قطار جئی ائے کسے نے پوچھیو تھارا لیڈر کون ائے تے تھارا وچوں ڈنگ کون مارے تو اونہاں نے گھٹھیوں جواب دتو جس ناں ہتھ لاوے گئو اووا ئی لیڈر ائے اور ڈنگ گا بندوبست وی اووا ائی کرے گئو۔
جڑیاں قوماں مارشل رئیاں نیں اونہاں گو اتحاد گھٹ ای وئے گئو۔ہاں ہس گل گا فیدو اگر لینو وئے تئے تنظیماں گئو مقابلہ وئے۔ ہس جامیں مثال دتی کہ تم نے ہس سال اگر پنجی بچیاں ناں ایوارڈ دتو ائے تو دوئی تنظیم گئو کم ائے کہ او تریہاں ناں انعام دئے۔خیر گا کماں وچ مقابلے بازی تو اسلام وچ وی جیز ائے۔ہک ہور گل جس گا زکر کیتیوں بغیر گوجری کالم نامکمل وئے گئو او تھا چودھری رحمت علی اور دو قومی نظریہ۔ ہس گی ضرورت محسوس تاں کیتی کہ مارا گجر بھراء دوستی محبت گا ماریا ہس گل گا خیال نئیں کرتا کہ مسلمان گئو رشتو دواء بندہ نال اسلام گئو رشتو ائے۔ایہ کدے نئیں ہو ہکتو کہ ہم اپنا بڈھا بڈھیرا ہندو گجراں یا سکھ گجراں میں جا لوڑاں۔مارو تعلق حبشہ گا بلال تئے منظور ائے پر کسی ہندو سکھ نال بھرا بندی ناممکن ایئے۔
١٩١٥ ماں بزم شبلی اندر اٹھاراں سالاں گا چودھری رحمت علی نے ایہاء تعلیم دتی اسے گی گل علامہ اقبال نے کیتی تئے گجراں ناں اپنیاں بھڈیاں گی اس گل ناں پلے بنناں پئے گو۔دوئی گل اسلام گی تاریخ گئے حوالے نال کیتی کہ جنگ بدر ماں ہک صحابی ناں اونہاں گا پتر نیں آکھیو ابا اج لڑتیوں تم میری تلوار گا ہٹھ آیو پیو سمجھ کے چھوڑ دتو اونہاں نے فٹ جواب دتو پتر توں آویں آں تے تیر گردن مارو آں۔ سنگھیو! رشتو دین گا وئے برادری گا نئیں ہوتو ہاں مسلمان گجر آپس وچ مل بویں مناں خوشی وئے گی۔پائیا مختارجنوں ڈھاڈو وئے انس غازی صاحب گئو سجن کدی مارا مضمان بنے تئے ہم وی دساں کہ ہم باروں آیاں ناں کس طرح پیار کراں اللہ اونہاں ناں اونہاں گی ساری ٹیم ناں خوش رکھے۔کدے میری جا ہوتا تئے سوچتا کہ سٹھاں سالاں گئو گجر اپنی گڈی خود چلا کے ڈسکے پونچیا تئے اوس گئے پچھے کیہ جذبو تھو۔
میں اللہ سوہناں گئو شکر مند اوں جس نے میریاں لفظاں وچ تاثیر رکھی ہے جلسو گا بعد لوگ میرا نال فوٹو چھکاتا ریا تئے میں نیلی چھت آلا گی مہربانیاں تئے کرم نوازیاں گئو مشکور دھرتی ہٹھ لیتو ریو بھائیا شفیق جیہڑہ آل پاکستان ایسوسی ایشن گا صدر ایں گئو خیال ائے کہ میں اونہاں نال ملتان جائوں صحت اجازت دئے تو سر اکھیاں گا بھار پور اللہ گا ولیوں گی دھرتی پر جئوں گو نہ گیو تئے دعا تئے کروں گا ساری گل بھل جئوں گو پر پائیا ارشد ضیاء گجر نے جو سیفالملوک پڑھی ائے چس آ گئی ائے اللہ سوہنو اونہاں تئے ادیب جاودانی ناں خوش رکھے آمین۔ سچ تئے ایے اے کیہ مدینہ آلا گا منن آلیاں گا رشتہ کلمہ پاک گا ایں خون گا نئیں ۔پاکستان اسے سوچ نال بنیو۔
ریلو کٹا اور کی تعریف
پختون دہشتگرد ہیں ایک ردعمل
