چرچ پر حملہ کرنے والوں نے اسلام اور پاکستان دشمنی کا مظاہرہ کیا، ناظم اعلیٰ جماعت اہلسنت
Posted on September 25, 2013 By Geo Urdu سٹی نیوز
جماعت اہل سنت پاکستان کے مرکزی ناظم اعلیٰ علامہ سےّد ریاض حسین شاہ نے کہاہے کہ پشاور میں چرچ پر حملہ قابل مذمت ہے۔ اسلام اقلیتوں کے حقوق کا سب سے بڑا محافظ ہے۔چرچ پر حملہ کرنے والوں نے اسلام اور پاکستان دشمنی کا مظاہرہ کیا ہے۔ اقلیتوں کے تحفظ کے لیے حکومت اپنی ذمہ داریاں پوری کرے۔ ان خیالات کا اظہار انہوں نے سانحہ پشاور کے خلاف منعقدہ جماعت اہل سنت کے ہنگامی اجلاس سے خطاب کرتے ہوئے کیا۔ علامہ سےّد ریاض حسین شاہ نے کہا کہ پاکستان کا آئین اور اسلام اقلیتوں کو برابری کے حقوق، تحفظ اور عبادت کی آزادی فراہم کرتا ہے۔
اسلامیانِ پاکستان مسیحوں کے غم میں برابر کے شریک ہیں۔ سانحہ پشاور کی جتنی بھی مذمت کی جائے کم ہے۔ دہشت گردی کا پھیلتا ناسور ملکی سلامتی کے لیے خطرہ بن چکا ہے۔ اس لیے تمام سیاسی و مذہبی جماعتیں انتہا پسندی اور دہشت گردی کے خاتمے کے لیے مشترکہ لائحہ عمل تیار کریں۔ ملک کو نفرتوں کی نہیں محبتوں کی ضرور ت ہے۔ سانحہ پشاور وزیر اعظم پاکستان کے دورۂ امریکہ کو ناکام بنانے کی سازش ہے۔ پاکستان میں ہونے والی دہشت گردی کے پیچھے بھارت اور امریکہ کا ہاتھ ہے۔
