امریکہ کے نائب صدر جو بائیڈن نے کولمبین حکومت اور کولمبیا کی انقلابی مسلح افواج کے درمیان صلح اور امن معاہدے کا خیر مقدم کیا ہے۔ جوبائیڈن نے دونوں طرفین میں پائیدار امن اور اعتماد سازی کے لئے لاطینی امریکہ کی ریاست کولمبیا کے سرکاری دورے کا بھی اعلان کیا ہے۔
کولمبین صدر جان مینیول سانٹوس نے اس معاہدے کو حکومت کی اہم کامیابی قرار دیتے ہوئے کہا کہ امن معاہدے پر حقیقی روح کے ساتھ عمل کرکے خطے میں ترقی کی نئی راہیں کھلیں گی اور عوام کی فلاح وبہبود کے کاموں کو تقویت ملے گی جبکہ حکومت سے بد اعتمادی کی فضا ختم ہوگی۔ کولمبین صدر کا کہنا تھا کہ لاطینی امریکہ کی سب سے طویل خانہ جنگی اور سیاہ ترین دور کا اب خاتمہ ہوجانا چاہیئے۔