اسلام آباد (جیوڈیسک) انسداد دہشتگردی کی خصوصی عدالت نے جج نظر بندی کیس میں پرویز مشرف کو حاضری سے ایک روز کا استشنٰی دے دیا، پرویز مشرف کا میڈیکل سرٹیفکیٹ بھی منظور کر لیا گیا، پراسیکوٹر نے مشرف کو حاضری سے استشنٰی دینے کی بھرپور مخالفت کی ۔
ججز نظر بندی کیس کی سماعت انسداد دہشتگردی کی عدالت کے جج عتیق الرحمان نے کی۔ پرویز مشرف کے وکیل ایڈوکیٹ الیاس صدیقی سپریم کورٹ میں مصروفیت کے باعث عدالت میں پیش نہ ہو سکے۔
عدالت نے مشرف کی وکلاء کی جانب سے سابقہ تاریخ پر جمع کرایا گیا میڈیکل سرٹیفکیٹ منظور کرلیا جبکہ پرویز مشرف کو حاضری سے ایک روز کا استشنٰی بھی دے دیا گیا۔ پراسیکوٹر عامر ندیم تابش نے سابق صدر کو حاضری سے استشنٰی دینے کی بھرپور مخالفت کی۔
ان کا کہنا تھا کہ مقدمے کی 17 سماعتیں بغیر کارروائی کے ہی ملتوی کی جا چکی ہیں ۔ پرویز مشرف ہر سماعت پر بیماری کا جواز بنا کر پیش نہیں ہو رہے۔
انہوں نے عدالت سے پرویز مشرف ان کے ضمانتیوں کی مسلسل عدم حاضری پر ان کے خلاف کارروائی کی استدعا کی۔ عدالت نے آئندہ سماعت پر پرویز مشرف کی صحت سے متعلق میڈیکل سرٹیفکیٹ طلب کرتے ہوئے کیس کی سماعت 11 جولائی تک ملتوی کر دی ہے۔
رمضان المبارک پر وزیراعظم کا تمام آئی ڈی پیز کو اضافی 20 ہزار روپے دینے کا اعلان
ہنگو اور لنڈی کوتل میں دہشتگردی کی کوشش ناکام، اسلحہ، بارود برآمد، ملزم گرفتار
