اسلام آباد (جیوڈیسک) وزیر پیٹرولیم شاہد خاقان عباسی نے توہین عدالت کے نوٹس پر اسلام آباد ہائیکورٹ سے غیرمشروط معافی مانگ لی جس پر نوٹس کو خارج کردیا گیا۔
اسلام آباد ہائیکورٹ کے جسٹس شوکت عزیز صدیقی نے وفاقی وزیر پیٹرولیم کے خلاف توہین عدالت کیس کی سماعت کی۔
دوران سماعت شاہد خاقان عباسی نے کہا کہ وہ عدلیہ کی توہین کا سوچ بھی نہیں سکتے جس پر عدالت نے وفاقی وزیر کے خلاف نوٹس خارج کر دیا۔
شاہد خاقان عباسی نے سی این جی سٹیشنز کھولنے سے متعلق عدالتی فیصلے پر پریس کانفرنس کے دوران تنقید کی تھی جس کی پاداش میں اسلام آباد ہائیکورٹ نے ان کے خلاف توہین عدالت کا نوٹس جاری کیا تھا۔
عدالت کے باہر گفتگو کرتے ہوئے وفاقی وزیر پٹرولیم کا کہنا تھا کہ بجلی اور گیس کے بحران کا فوری حل ممکن نہیں، عوام حکومت کو وقت دے۔
ان کا کہنا تھا کہ جب تک اضافی گیس نہیں آئے گی، مسئلہ حل نہیں ہو گا تاہم آئندہ موسم سرما میں گیس بحران میں کمی آئے گی۔
مشرف پاکستان میں انجیوگرافی کرانے پر تیار نہیں، میڈیکل رپورٹ
عدالتی مداخلت کا تعین ضروری ہے، سپریم کورٹ بادشاہ نہیں، جسٹس جواد ایس خواجہ
