کچہری کے اطراف میں تجاوزات کی بھرمار بڑے سیکیورٹی رسک کی صورت اختیار کرگئی
وزیرآباد(تحصیل رپورٹر)کچہری کے اطراف میں تجاوزات کی بھرمار بڑے سیکیورٹی رسک کی صورت اختیار کرگئی ، ٹی ایم اے انتظامیہ عوامی مسائل سے چشم پوشی اختیار کرنے لگی ۔ مین سیالکوٹ روڈ کی جانب پارکنگ اسٹینڈ ٹریفک کیلئے مسائل پیدا کرتا ہے ۔ کچہریوں کے شمالی دروازہ کی طرف جہاں سے جج صاحبان کی گاڑیاں بھی اندر داخل ہوتی ہیں کے سامنے ہتھ ریڑھیوں، چنگ چی رکشائوں کے غیر قانونی اسٹینڈ اور دیگر تجاوزات کی وجہ سے ناصرف ٹریفک کا نظام بری طرح متاثر ہوتا ہے بلکہ جگہ جگہ تجاوزات کی وجہ سے پیدا ہونے والا رش شرپسند عناصر کیلئے اہم مواقع پیدا کرتا نظر آتا ہے۔ متعدد مرتبہ کچہریوں میںاور باہر اسی بازار میں مخالفین پر قاتلانہ حملے بھی ہوچکے ہیں جن میں ملزمان رش کا فائدہ اٹھا کر بھاگ جاتے ہیں ۔ ٹی ایم او آفس قریب ہونے کے باوجود انتظامیہ آج تک تجاوزات کا مستقل اور دیرپا حل نہیں نکال سکی۔ شہریوں نے ڈی سی او گوجرانوالہ سے فوری اصلاح احوال کا مطالبہ کیا ہے۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ میرٹ کے نام پر حکمرانوں نے غریبوں کو مایوسیوں کے اندھیروں میں دھکیل دیا ہے وزیرآباد(تحصیل رپورٹر)میرٹ کے نام پر حکمرانوں نے غریبوں کو مایوسیوں کے اندھیروں میں دھکیل دیا ہے۔ غریب کا بچہ روزگار کی تلاش میں بھیک مانگنے پر مجبور ہو چکا ہے جیلیں غریبوں سے بھری پڑی ہیں جبکہ مختلف طریقوں سے خزانہ سرکار کو بے دردی سے لوٹنے والے ملک کے معززین شمار ہوتے ہیں ۔ ظلم کا یہ نظام زیادہ دیر تک نہیں چل سکتا۔ ان خیالات کا اظہار ینگ لائرز احمد فراز خان لودھی ایڈدوکیٹ، میاں بلال منظور،عاصم جاوید جنجوعہ، میاں نعمان اور دیگر نے اپنے بیانات میں کیا۔ انہوں نے کہا کہ لاالہ الا اﷲ کی بنیاد پر حاصل ہونے والے ملک کے حکمرانوں نے انسانیت کی پامالی کا جوعمل شروع کررکھا ہے اس سے واقعی یہود وہنود بھی شرمارہے ہیں۔ اقربا پروری، لاقانونیت کی بدترین مثالیں حکمرانوں سے شروع ہو کر ان کے چیلوں پر ختم ہوجاتی ہیں ۔ قانون کی نظر میں سب برابر کا فارمولہ پاکستان میں مکمل طور پر ناکام ہوچکا ہے ۔ پولیس اور دیگر اداروں کی ڈوریاںاثر ورسوخ رکھنے والے افراد کے ہاتھوں میں نظر آتی ہیں بڑے سے بڑے جرائم کرنے والے بااثر افراد کو نظر انداز کرکے غربت اور بے روزگاری سے تنگ چھوٹے موٹے جرائم کرنے والے افراد سے جیلوں کو بھر دیا گیا ہے جہاں ملزمان کی اصلاح کی بجائے انہیں مزید بگاڑا جارہا ہے۔ ملک میں پولیس گردی اپنی انتہا کو پہنچ چکی ہے مہنگائی کے مارے غریب اور شریف آدمی کا جینا اس قدر حرام ہوچکا ہے کہ وہ آزادی سے اپنے وطن کی سڑکوں پر سفر بھی نہیں کرسکتا ۔ شریف شہریوں کو جگہ جگہ روک کرتلاشیوں کے علاوہ مختلف فورسز کی طرف سے چالان کی پرچیاں تھما دی جاتی ہیں۔ وکلاء نے کہا کہ جب تک ریاستی ادارے چند خاندانوں، برسراقتدار افراد کے تسلط سے آزاد نہیں ہوتے میرٹ پر اداروں میں لوگوں کو بھرتی اور تعینات نہیں کیا جاتا تب تک ملک میں لاقانونیت،کرپشن اور بددیانتی پر قابو نہیں پایا جاسکتا۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سہولتوں کے فقدان کی وجہ سے غلام محمد کالونی کے مکین پریشان، ٹائون میونسپل ایڈمنسٹریٹر سے فوری اصلاح وزیرآباد(تحصیل رپورٹر)سہولتوں کے فقدان کی وجہ سے غلام محمد کالونی کے مکین پریشان، ٹائون میونسپل ایڈمنسٹریٹر سے فوری اصلاح احوال کا مطالبہ۔علاقہ مکینوں عمر شہزاد،خرم ،عثمان چیمہ اور دیگر نے بتایا کہ ان محلہ میں عرصہ دراز سے گلی کی تعمیر ومرمت نہ ہونے کی وجہ سے انہیں سخت پریشانی کا سامنا ہے ۔بارش کے دوران قریبی احاطہ میں کئی کئی فٹ پانی کھڑا ہوجاتا ہے جس کی وجہ سے ا ن کے مکانوں کی بنیادیں بری طرح متاثر ہورہی ہیں۔ انہوں نے بتایا کہ شہر کے وسط میں واقع اس کالونی کے مکین بنیادی سہولتوں سے محروم ہیں۔ تمام شہر میں واٹر سپلائی کی سہولت میسر ہے جبکہ غلام محمد کالونی کے مکین اس سہولت سے بھی ابھی تک محروم ہیں اسی طرح ڈبل پھاٹک روڈ بھی عرصہ دراز سے ٹوٹ پھوٹ کا شکار ہے ۔ شہریوں نے ٹائون میونسپل ایڈمنسٹریٹر رائو سہیل اختر سے مطالبہ کیا ہے کہ ان کی شکایات کا فوری ازالہ کیا جائے۔
