اضلاع کی خبریں 10.07.2013
Posted on July 11, 2013 By Geo Urdu سٹی نیوز
تاجر کسی بھی ملک میں ریڑھ کی ہڈی کی حیثیت رکھتے ہیں : میاں فضل الرحمن
گوجرانوالہ (جی پی آئی) چیئرمین آل تاجر ایسوسی ایشن میاں فضل الرحمن نے کہا ہے کہ تاجر کسی بھی ملک میں ریڑھ کی ہڈی کی حیثیت رکھتے ہیں سابقہ حکومت کی وجہ سے ملک لوڈ شیڈنگ، بدامنی، مہنگائی کا شکار ہونے کی وجہ سے غریب عوام کے ساتھ ساتھ تاجر طبقہ بھی مشکلات کا شکار ہو چکا ہے۔ ان خیالات کا اظہار انہوں نے مسلم لیگ (ن) کے راہنما کامران خالد بٹ کو وائس چیئرمین آل تاجر ایسوسی ایشن کا نوٹیفکیشن دینے کی تقریب سے خطاب کرتے ہوئے کیا، اس موقع پر کامران خالد بٹ نے اپنے خطاب میں کہا کہ میں تاجروں کو درپیش مسائل کے حل کیلئے ہر فورم پر آواز بلند کروں گا، حاجی نذیر جموں والے نے اپنے خطاب میں کہا کہ تاجر خوشحال ہوں گے معیشت بحال ہوگی اور ملک میں ترقی کا پہیہ رواں دواں ہو سکے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رمضان المبارک کی آمد کیساتھ ہی اشیائے خوردونوش کی قیمتوں میں ہوشربا اضافہ ہو گیا : چوہدری شاہد منیر گوندل
گوجرانوالہ (جی پی آئی) جماعت اسلامی کے راہنما چودھری شاہد منیر گوندل نے کہا ہے کہ رمضان المبارک کی آمد کیساتھ ہی اشیائے خوردونوش کی قیمتوں میں ہوشربا اضافہ ہو گیا ہے، ناجائز منافع خوروں اور ذخیرہ اندوزوں نے عوام کو ابھی سے لوٹناشروع کردیا ہے۔ وہ گرجاکھ میں کارکنوں کی میٹنگ سے خطاب کر رہے تھے، انہوں نے کہا کہ پاکستان کے علاوہ تمام دنیا میں مقدس ایام اور قومی تہواروں پر عوام کو زیادہ سے زیادہ ریلیف فراہم کیا جاتا ہے مگرہمارے ہاں معاملہ الٹ ہے۔ ایک طرف تاجر 17 کی بجائے 19 فیصد جنرل سیلز ٹیکس وصول کررہے ہیں جبکہ دوسری جانب حکومت اور پرائس کنٹرول کمیٹیاں خاموش تماشائی بنی ہوئی ہیں۔ انہوں نے کہاکہ ملک میں مہنگائی کا طوفان آچکا ہے، غریب عوام کو دووقت کی باعزت طور پرروٹی بھی میسر نہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صنعتوں اور کمرشل صارفین کو مہنگی بجلی کی فراہمی کا نیا پروگرام خطرناک ہے : خواجہ وقار حسن
گوجرانوالہ (جی پی آئی) سٹی جنرل سیکرٹری مسلم لیگ (ق) خواجہ وقار حسن نے کہا ہے کہ صنعتوں اور کمرشل صارفین کو مہنگی بجلی کی فراہمی کا نیا پروگرام خطرناک ہے، کمرشل صارفین بھی مہنگی بجلی کا بوجھ عوام پر ڈالیں گے، (ن) لیگ کی لیڈر شپ کوئی بھی فیصلہ کرنے سے قبل عوام کی مشکلات اور اپنے پارٹی منشور کو ذہن میں رکھے۔ وہ گزشتہ روز سٹی سیکرٹریٹ میں پارٹی راہنمائوں و کارکنوں سے گفتگو کررہے تھے۔ خواجہ وقار حسن کا کہنا تھا کہ وزیر پانی و بجلی خواجہ محمد آصف بجلی مہنگی کرنے کا روز “ڈراوا” دیکر عوام کا خون خشک نہ کریں۔عوام میں مہنگائی برداشت کرنے کی مزید سکت نہیں ہے۔بجلی مہنگی ہوئی تو ایک بار پھر ہر چیز مہنگی ہوگی،انہوں نے کہا کہ رمضان المبارک سے قبل مہنگائی کا طوفان تشویشناک ہے، بجٹ کے بعد سے مہنگائی کا جن پوری طرح بوتل سے باہر نکل آیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ (ن) کی حکومت پاکستان کو دوبارہ ترقی کی راہ پر گامزن کرنے کیلئے پر عزم ہے : خالد پرویز ڈار
گوجرانوالہ (جی پی آئی) سٹی نائب صدر مسلم لیگ (ن) یوتھ ونگ خالد پرویز ڈار نے کہا ہے کہ مسلم لیگ (ن) کی حکومت پاکستان کو دوبارہ ترقی کی راہ پر گامزن کرنے کیلئے پر عزم ہے، میاں نوازشریف کا چین کی طرف قدم بڑھانا عوام کے مسائل حل کرنے پر سنجیدگی کا مظہر ہے، چین نے ہمیشہ ہر مشکل وقت میں پاکستان کا ساتھ دیا، ایک بیان میں انہوں نے کہا کہ چین کے ساتھ تجارتی راہداری کے قیام سے پاکستان میں معاشی انقلاب آئے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حاجی محمد حنیف (مرحوم) کیلئے تعزیتی ریفرنس پریس کانفرنس آفس میں منعقد ہوا
گوجرانوالہ (جی پی آئی) ایڈیشینل سیکرٹری کالمسٹ فورم، سینئر ایڈیٹر روزنامہ پریس کانفرنس، کالم نگار حاجی محمد حنیف (مرحوم) کیلئے تعزیتی ریفرنس پریس کانفرنس آفس میں منعقد ہوا جس میں صحافیوں اور کالم نگاروں نے بھرپور شرکت کی۔ اس موقع پر چیف ایڈیٹر روزنامہ پریس کانفرنس عمر بٹ نے کہا کہ بزرگ اور مذہبی رہنما ہونے کی وجہ سے اپنے والد کی جگہ سمجھتا تھا اور ان کو خدا پر یقین کامل تھا، نڈر بے باک انسان تھے اور انہوں نے ساری زندگی کبھی بھی سچائی کا دامن نہیں چھوڑا۔ حاجی محمد حنیف (مرحوم) کے پراپرٹی کے معمولات تھے جن کے وہ کام آتے رہے۔ ان غدار دوستوں نے پلاننگ کے ساتھ قتل کیا۔ ڈسٹرکٹ پریس کلب کے صدر عتیق یوسف ضیاء نے کہا کہ ضلع بھر کے تمام صحافیوں کی طرف سے حاجی محمد حنیف کے قتل کی پرزور مذمت کرتے ہیں ۔پولیس ان کے قاتلوں کو فوری گرفتار کرے، اگر پولیس نے کوئی رعایت دی تو پولیس کیخلاف بھرپور احتجاج کیا جائیگا۔ سینئر صحافی شبیر بیگ نے کہا کہ حاجی محمد حنیف مرحوم پرانے صحافی ہیں ان کا قتل صحافی برادری کیلئے بہت بڑا نقصان ہے۔ روزنامہ جنگ کے نمائندہ حافظ خلیل الرحمن ضیاء نے کہا کہ حاجی محمد حنیف مرحوم 25سال روزنامہ جنگ کے نمائندہ رہے ہیں۔ بہت عظیم انسان تھے ایک دفعہ میں بیمار ہوا تو 7 روز تک ہسپتال میں میرے ساتھ ٹھہرے رہے اور ظالم باطل کے ساتھ حق کے خاطر ٹکرانے والے انسان تھے۔ چیئرمین ایگزیکٹو کالمسٹ فورم چوہدری ارشاد اﷲ سندھو نے کہا کہ ہم ایک اچھے دوست سے محروم ہوگئے ہیں۔ ہمیں چاہیے کہ سب مل کر ان کے مقدمہ کی پیروی کریں تاکہ قاتلوں کو سزا ہوسکے۔ مرکزی انجمن تاجران کے صدر حاجی عبدالرئوف مغل نے کہا کہ ہم اس واقعہ کی پرزور مذمت کرتے ہیں۔ اہل قلم کا ناحق قتل بہت بڑا سانحہ ہے اور قرآن پاک میں بھی ارشاد ہے جس نے ناحق ایک انسان کو قتل کیا اس نے ساری انسانیت کو قتل کردیا۔ اس لیے حاجی محمد حنیف کا ناحق قتل ہوا۔ قاتلوں کو سزا ہر صورت ملنی چاہیے۔ صدر کالمسٹ فورم پیر محمد اشرف شاکر نے کہا کہ حاجی محمد حنیف جیسے عظیم انسان صدیوں بعد پیدا ہوتے ہیں وہ بے لوث ہر وقت دکھی انسانوں کی دادرسی کیلئے کمربستہ رہتے تھے۔ قانون کی مدد سے انصاف کے زریعے حق مانگتے جس کی حاجی محمد حنیف کو سزا دی گئی۔ ایس پی رینج کرائم ڈی ایس پی سی آئی اے سٹاف کی اشتہاریوں، فراڈیوں کیساتھ ملی بھگت ہونے کی وجہ سے یہ سانحہ رونما ہوا ہے۔ چونکہ آر پی او نے حاجی محمد حنیف کے ملزمان اشتہاریوں کو گرفتار کرنے کا دو ماہ قبل ٹاسک دیا تھا۔ ان پولیس آفیسران کے اشتاری کیساتھ خاص تعلق ہونے کی وجہ سے گرفتاری میں تاخیری ہوئی۔ حاجی محمد حنیف روزانہ ایس پی رینج کرائم کے دروازے پر دستک دیتے مگر اُن پر کوئی اثر نہ ہوتا۔ دو ماہ گزرنے کے بعد بھی ایس پی رینج کرائم اور ڈی ایس پی سی آئی اے طاہر گجر نے آر پی او کے حکم کو ردی کی ٹوکری کی زینت بنا دیا اور اشتہاری کو گود میں بٹھا لیا۔ اشتہاری تو گرفتار نہ ہوا مگر حاجی محمد حنیف انصاف لینے حق مانگنے اﷲ کو پیار ہوگئے۔ حاجی محمد حنیف کا دنیا سے جانے کا ایس پی رینج کرائم نے اﷲ کا شکریہ ادا کیا۔ آخر میں انہوں نے کہا کہ پولیس کی سستی، نااہلی اور انصاف میں تاخیری کی وجہ سے حاجی محمد حنیف کا قتل ہوا۔ آخر میں تعزیتی ریفرنس میں تمام صحافیوں نے قرآن خوانی کی اور حاجی محمد حنیف کیلئے دعائے مغفت کی گئی اور روزنامہ پریس کانفرنس کی طرف سے لنگر کا بھی اہتمام کیا گیا تھا۔ آخر میں تمام صحافیوں نے اس واقعہ کی مذمت کرتے ہوئے قرارداد پیش کی حاجی محمد حنیف مرحوم کے قاتلوں کو فوری گرفتار کیا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تحریک منھاج القرآن کے زیر اہتمام سات روزہ سالانہ درس عرفان القرآن آج سے شروع ہو رہا ہے
گوجرانوالہ (جی پی آئی) تحریک منھاج القرآن کے زیر اہتمام سات روزہ سالانہ درس عرفان القرآن آج سے شروع ہو رہا ہے’درس قرآن کا اہتمام نماز فجر کے بعد شان میرج ہال سیالکوٹ روڈ میں کیا جائیگا جس میں شیخ السلام ڈاکٹر طاہر القادری کے شاگرد خاص اور منھاج یونیورسٹی کے سکالرز درس قرآن دیا کرینگے’تحریک منھاج القرآن کے میڈیا کواآرڈینیٹر علی رضا ملک کے مطابق درس عرفان القرآن کے تمام انتظامات مکمل کر لیے گئے ہیں گوجرانوالہ اور گردونواح سے ہزاروں مرد وخواتین درس قرآن میں شرکت کرینگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیروز بخت خان کو پی ٹی آئی لیبر ونگ کا مرکزی سینئر نائب صدر مقرر کرتے ہوئے نوٹیفیکیشن جاری کر
گوجرانوالہ(جی پی آئی) پاکستان تحریک انصاف لیبر ونگ کے مرکزی صدر زبیر خان نے گوجرانوالہ کی معروف سیاسی و سماجی شخصیت و تحریک انصاف کے راہنماء فیروز بخت خان کو پی ٹی آئی لیبر ونگ کا مرکزی سینئر نائب صدر مقرر کرتے ہوئے نوٹیفیکیشن جاری کر دیا ہے۔ اس سلسلے میں فیروز بخت خان کے اعزاز میں ایک تقریب منعقد کی گئی جس میں پاکستان تحریک انصاف کی مقامی قیادت اور لیبر و نگ کے عہدیداران نے بڑی تعداد میں شرکت کی اور نو منتخب سینئر نائب صدر لیبر ونگ زبیر بخت کو مبارک باد پیش کی۔ تقریب سے خطاب کرتے ہوئے زبیر بخت کا کہنا تھا کہ وہ مزدور بھائیوں کے مسائل حل کرنے کیلئے تمام تر توانائیاں بروئے کار لاتے ہوئے مسائل کو ترجیحٰ بنیادوں پر حل کریں گے۔ اس موقع پر رانا ارشد، ریاست علی بسرائ، پیر محمد شاہد، فدا حسین، کاشف خان، عزیز گجر، ملک اشرف، محمد سلیم،ملک لقمان،عظیم بٹ، عنائت اللہ سندھو و دیگر بھی موجود تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گیپکو نے رمضان المبارک میں سحری، افطاری اور تراویح کے اوقات میں بجلی کی مسلسل فراہمی کا پلان تیار کر لیا ہے
گوجرانوالہ (جی پی آئی)گیپکو نے رمضان المبارک میں سحری، افطاری اور تراویح کے اوقات میں بجلی کی مسلسل فراہمی کا پلان تیار کر لیا ہے۔اس پلان کے مطابق انڈیپنڈنٹ (CPI, B-3 & EPZ)انڈسٹریل فیڈروں، ٹیکسٹائل انڈیپنڈنٹ فیڈروں اور فرنس انڈیپنڈنٹ فیڈروں پر سحری، افطاری اور تراویح کے اوقات کے دوران 2,2 گھنٹے لوڈ شیڈنگ کی جائے گی جبکہ اِن اوقات کے دوران ایگری کلچر(ٹیوب ویل) ڈومینیٹد فیڈروںکو 1,1 گھنٹہ بند رکھا جائے گا۔ یہ پلان گیپکو نے ماہ رمضان کے دوران سحری، افطاری اور تراویح کے اوقات میں روزہ داروں کو بجلی مسلسل فراہمی کیلئے تیار کیا ہے۔ گیپکو نے رمضان المبارک میں شام 7 بجے سے رات 10 بجے تک صنعتوں اور کمرشل پلازوں اور مارکیٹوں کی بجلی منقطع رکھنے کا بھی اعلان کیا ہے۔ گیپکو نے ائیر کنڈیشنڈ استعمال کرنیوالے صارفین سے بھی اپیل کی ہے کہ ماہ صیام میں مذ ہبی تقدس کو ملحوظ خاطر رکھتے ہوئے صبح 2 سے 4 بجے اور شام 7 سے رات 10 بجے کے دوران اے سی قطعاََ استعمال نہ کریں تاکہ اس سے بچائی جانے والی بجلی ان کے دوسرے روزہ دار بھائیوں کے کام آ سکے۔ گیپکو انتظامیہ نے تنبیہ کی ہے کہ مذکورہ بالا ہدایات پر عمل نہ کر نیوالے صارفین کے خلاف قانونی کاروائی کی جائے گی۔ ساتھ سختی کرنے سے بھی گریز نہیں کیا جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ملک بھر میں مہنگائی میں تیزی سے اضافے ہو رہا ہے : ثمینہ خالد گھرکی
لاہور( جی پی آئی) پیپلز پارٹی لاہور کی صدر ثمینہ خالد گھرکی اور لاہور کے سیکرٹری اطلاعات عابد حسین صدیقی نے مشترکہ بیان میں کہا ہے کہ ملک بھر میں مہنگائی میں تیزی سے اضافے ہو رہا ہے، مسلم لیگ ن کی حکومت کے آتے ہی ملک میں ضروریات زندگی کی اشیاء کی قیمتوں میں انتہائی تیزی سے اضافہ ہو رہا ہے جس سے ملک کے غریب لوگ اذیت میں مبتلا ہیں۔ ماہ رمضان کی آمد آمد ہے پاکستان کی 70 فیصد عوام جو غربت کی لکیر سے نیچے ہیں ان کو کوئی ریلیف نہیں دیا جا رہا، نواز شریف کی حکومت نے عوام پر ٹیکسوں کی بھرمار کر کے مہنگائی کے تمام ریکارڈ توڑ دئیے ہیں۔ جس کی وجہ سے عام لوگ اپنے گھروں کے اخراجات پورے کرنے سے قاصر ہیں۔ ملک بھر میں بدترین لوڈشیڈنگ سے عوام بلبلا اٹھے ہیں لوگوں کی نیندیں حرام ہو گئی ہیں جبکہ حکمران اجلاس در اجلاس منعقد کر کے عوام کے ساتھ سنگین مذاق کر رہے ہیں، جبکہ حکمرانوں نے غیر ملکی دوروں میں اپنے آپ کو مشغول کر رکھا ہے، آئی ایم ایف کی شرائط کے مطابق بجلی اور پٹرولیم مصنوعات کی قیمتیں بڑھنے سے مہنگائی کا جو طوفان آئیگا اس سے شاید متوسط طبقہ صفحہ ہستی سے مٹ جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رمضان الکریم رجوع الی اللہ اورقرآن سے لو لگانے کا مہینہ ہے ڈاکٹر رخسانہ جبیں
لاہور(جی پی آئی) جماعت اسلامی پاکستان حلقہ خواتین کی سیکرٹری جنرل ڈاکٹر رخسانہ جبیں نے کہاہے کہ امت مسلمہ پر ایک بار پھر نیکیوں کا موسم بہار رمضان المبارک سایہ فگن ہورہا ہے ضرورت اس بات کی ہے کہ ہم انفرادی و اجتماعی طور پر اللہ کی طرف پلٹیں اور اللہ کی زمین پر اللہ کے نظام کے غلبے کی جدوجہد تیز تر کردیں، قوم اپنی دعاؤں میں مصر کے خوان المسلمون سمیت برما، کشمیر ،فلسطین اور پوری امت کے مظلوم مسلمانوں کو خصوصی طور پر شامل کرے، حکومت عوام کو بھرپور ریلیف دے تاکہ لوگ ماہ مبارک کی رحمتوں اور برکتوں سے فیض یاب ہو سکیں۔ان خیالات کا اظہار انہوں نے ماہ صیام کی مناسبت سے اپنے جاری ایک بیان میں کیا۔اپنے بیان میں قوم کو رمضان الکریم کی مبارکباد دیتے ہوئے انہوں نے کہاکہ روزہ بندے کو اپنے رب سے قریب کرنے کا بہترین ذریعہ ہے’قرآن مجید میں روزے کا مقصد پرہیزگاری کا حصول بیان کیا گیا ہے جبکہ احادیث مبارکہ میں بھی روزے کی اہمیت اور رحمت و برکت بہت واضح طور پر بیان کی گئی ہیں،اگر ہم اس ماہ مبارک میں رحمت ،مغفرت اور نار جہنم سے نجات حاصل کرنے میں کامیاب نہ ہوسکے تو تباہی و بربادی ہمارا مقدر بنے گی، رمضان میں کلام الٰہی سے مظبوط اور پائیدار رشتہ استوار کرنے کی ضرورت ہے۔انہوں نے کہاکہ آج امت مسلمہ سخت آزمائش میں گھری ہوئی ہے مصر شام فلسطین عراق افغانستان کشمیر برما اور بنگلہ دیش سمیت ہر جگہ خون مسلم ارزاں ہے مگر افسوس کہ مسلم حکمران امت محمد ی کی پشتیبیانی کرنے کے بجائے عیاشیوں میں مگن ہیں، قوم امت کی سربلندی کے لئے خصوصی دعاؤں کا اہتمام کرے ۔انہوں نے کہاکہ رمضان ہم سے ایثار و قربانی کا تقاضا کرتا ہے رمضان کی حقیقی رحمتیں اور خوشیاں ہمیں تب ہی حاصل ہوں گی جب ہم اپنے آس پاس بسنے والے مستحق افراد کا خیال رکھیں اور نادار افراد کیلئے سحر افطار کا اہتمام کریں رمضان میں کیے گئے انفاق فی سبیل اللہ کا اجر کئی گنا بڑھا کر ملتا ہے۔انہوں نے حکومت سے اپیل کی کہ رمضان المبارک میں مہنگائی لوڈ شیڈنگ اور بدامنی پر قابو رکھنے کیلئے ٹھوس اور سنجیدہ اقدامات کیے جائیں تاکہ قوم تالیف قلب کے ساتھ روشے اور عبادات کا اہتمام کر سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیراعلیٰ محمد شہباز شریف کی کراچی گرومندر کے قریب دھماکے کی شدید مذمت
لاہور(جی پی آئی) وزیر اعلیٰ پنجاب محمد شہباز شریف نے کراچی گرومندر کے قریب ہونے والے دھماکے کی شدید مذمت کی ہے۔ انہوں نے دھماکے میں قیمتی جانوں کے ضیاع پر گہرے رنج و غم اور افسوس کا اظہار کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انفارمیشن ٹیکنالوجی کو اپنا کر پولیس کی استعداد کار میں اضافہ کیا جاسکتا ہے: وزیر اعلیٰ شہباز شریف
لاہور(جی پی آئی) وزیر اعلی پنجاب محمد شہباز شریف نے کہا ہے کہ جدید ٹیکنالوجی کو اپنا کر پولیس کی استعداد کارمیں اضافہ کیا جاسکتا ہے۔ محکمہ پولیس کو جدید خطوط پر استوار کرنے کیلئے ترک پولیس کے نظام کو مدنظر رکھتے ہوئے سفارشات مرتب کرکے پیش کی جائیں۔ وہ آج یہاں سکیورٹی اور پولیس کو بدلتے ہوئے حالات کے تناظر میں جدید ٹیکنالوجی سے لیس کرنے کے حوالے سے اعلیٰ سطحی اجلاس کی صدارت کررہے تھے۔ جس میں صوبائی وزیر کرنل(ر) شجاع خانزادہ، چیف سیکرٹری، ہوم سیکرٹری، انسپکٹرجنرل پولیس اور متعلقہ سینئر افسران نے شرکت کی۔ وزیراعلیٰ محمد شہباز شریف نے اجلاس سے خطاب کرتے ہوئے کہاکہ امن و امان کا قیام حکومت کی اولین ترجیح ہے اور اس مقصد کے لئے پولیس کو جدید ٹیکنالوجی سے لیس کرنا ناگزیر ہے۔ ترقی یافتہ ممالک نے انفارمیشن ٹیکنالوجی کے استعمال اعلیٰ تربیت اور جدید آلات کو استعمال میں لاکر جرائم کی بیخ کنی میں خاطر خواہ کامیابی حاصل کی ہے۔ انہوں نے کہا کہ وطن عزیز میں گزشتہ 65برسوں میں کئی نظام آئے لیکن ہر شعبہ بہتری کی بجائے تنزلی کی جانب مائل رہا۔ کرپشن نے معاشرے میں اپنے پنجے گاڑے اور نظام میں اصلاح کی بجائے بگاڑ پیدا ہوتا چلاگیا۔ فرسودہ نظام کی بنا پر عام آدمی کے مسائل حل ہونے کی بجائے بڑھتے چلے گئے۔ تاہم مایوسی اور ناامیدی کی بجائے ہمیں نظام کی بہتری کے لئے ہمت اور جذبے سے آگے بڑھنا ہوگا اور فرسودہ نظام کی جگہ ایسی اصلاحات اپنانا ہوں گی جس سے نہ صرف عام آدمی کے مسائل حل ہوںبلکہ ہر ایک کو بلاتفریق انصاف ملے اور قانون کا بول بالاہو۔ انہوں نے کہاکہ ترکی سمیت بیشمار ممالک کی مثالیں ہمارے سامنے ہیں جنہوں نے درپیش چیلنجز کا جواں مردی سے مقابلہ کیا اور آج ان کا شمار ترقی یافتہ ممالک میں ہوتا ہے۔ انہوں نے کہاکہ پنجاب کے پولیس افسران کو دبئی اور ترکی کے پولیس نظام کا جائزہ لینے کیلئے خصوصی طور پر ان ممالک کے دوروں پر بھجوایا گیا تاکہ وہ خود ان ممالک کے پولیس نظام کامطالعہ کرسکیں اور ہمارے پولیس نظام میں اصلاحات کیلئے اپنی سفارشات مرتب کرسکیں۔ انہوں نے کہا کہ ترکی اور دبئی میں جرائم نہ ہونے کے برابر ہیں جس کی بڑی وجہ انفارمیشن ٹیکنالوجی کا استعمال ہے۔ ہمیں بھی ایک ایسا ہی نظام وضع کرنا ہے جہاں مظلوم کی فوری دادرسی ہو اور جرائم کی بیخ کنی کیلئے پولیس پوری طرح فعال اور متحرک ہو۔ انہوں نے وزیرقانون کی سربراہی میں خصوصی کمیٹی تشکیل دیتے ہوئے کہا کہ یہ کمیٹی ترکی کا پولیس نظام سامنے رکھتے ہوئے جلد از جلد پراسیکیوشن، انویسٹی گیشن، تربیت، کمانڈ اینڈ کنٹرول ، جدید آلات کے حصول کے حوالے سے اپنی سفارشات آئندہ 10روز میں مرتب کرے۔ انہوں نے کہا کہ کمیٹی ایک ایسا لائحہ عمل مرتب کرے جس پر تیزی سے عملدرآمد کرتے ہوئے آگے بڑھا جاسکے۔ انہوں نے انسپکٹرجنرل پولیس سے کہا کہ جدید ٹیکنالوجی کا استعمال اور حصول اپنی جگہ لیکن جو ذمہ داری پولیس کی ہے وہ اسے نبھائے اور امن و امان کی فضا بہتر بنانے اور جرائم کی بیخ کنی کیلئے کوئی کسر اٹھانہ رکھے۔ رمضان المبارک کے دوران صوبہ بھر میں سکیورٹی پلان پر عملدرآمد کو یقینی بنایاجائے اور اس ضمن میں کوئی تساہل نہ برتا جائے۔قبل ازیں صوبائی کرنل (ر) شجاع خانزادہ نے سنیئر پولیس افسران سمیت اپنے دورہ ترکی اور دبئی کی تفصیلات سے آگاہ کیا۔ انہوں نے بتایاکہ اس دورے میں انہوں نے دبئی اور ترکی کے کمانڈ اینڈ کنٹرول سینٹر، کرائسز مینجمنٹ سیل کا دورہ کیا اور وہاں زیر استعمال انفارمیشن ٹیکنالوجی کا بھی معائنہ کیا۔ انہوں نے بتایا کہ ترکی پنجاب پولیس کی کارکردگی کو بہتر بنانے کیلئے تعاون پر تیار ہے۔ اجلاس میں چیف سیکرٹری، انسپکٹرجنرل پولیس اور ہوم سیکرٹری نے بھی اپنی اپنی آرأ سے آگاہ کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چین نے پاکستانی معیشت کی بحالی کیلئے موثر کردار ادا کرنے کی یقین دہانی کرائی ہے،وزیراعلیٰ
لاہور(جی پی آئی) وزیراعلیٰ پنجاب محمدشہبازشریف نے کہا ہے کہ وزیراعظم محمد نوازشریف کی زیر قیادت پاکستانی وفد کے دورہ چین کے دورس نتائج برآمد ہوں گے۔ کامیاب دورے سے ایک مرتبہ پھر ثابت ہوا کہ پاکستان اور چین بااعتماد اور بہترین دوست ہیں۔ بلاشبہ پاکستان اور چین کی دوستی لازوال ہے۔ چین نے پاکستان کی معیشت کی بحالی کے لئے موثر کردار ادا کرنے کی یقین دہانی کرائی ہے۔وہ آج یہاں چین اور قطر کے دورے سے واپسی پر علامہ اقبال ائیرپورٹ پر میڈیا کے نمائندوں سے گفتگو کر رہے تھے۔ وزیراعلیٰ شہباز شریف نے کہا کہ چینی حکام سے مختلف منصوبوں پر مفید بات چیت ہوئی ہے۔ علاوہ ازیں مختلف منصوبوں میں تعاون کے لئے چینی کمپنیوں سے مذاکرات بھی نہایت کامیاب رہے۔ چینی کمپنیاں پاکستان میں مختلف شعبوں میں سرمایہ کاری کریں گی۔ نندی پور پاور سٹیشن کو فعال بنانے کے لئے چین نے بھر پور معاونت کی یقین دہانی کرائی ہے۔ یہ بات خوش آئند ہے کہ ڈونگ فونگ الیکٹریسٹی کمپنی نے اپنے وعدے کے مطابق چینی انجینئر وں کی ٹیم پاکستان بھجوا دی ہے جو کل (بدھ) نندی پورپاور پراجیکٹ کی سائٹ پر پہنچ جائے گی۔ وزیراعلیٰ نے کہا کہ ہمارے دورہ چین میں سب سے زیادہ فوکس پاکستان کے توانائی بحران کے حل پر رہا۔ چینی سرمایہ کار پاکستان میں توانائی کے شعبہ میں سرمایہ کاری کریںگے۔ چین کے ساتھ کوئلے اور سولر انرجی سے متعلق تبادلہ خیال ہوا ہے۔ توانائی کے علاوہ دیگر منصوبوں کا ذکر کرتے ہوئے انہوں نے کہا کہ پاکستان اور چین کے درمیان سمجھوتے کے تحت کراچی سے لاہور تک موٹر وے تعمیر کی جائے گی۔ لاہور کی طرح کراچی میںبھی میٹرو بس کا منصوبہ شروع کیاجائے گا۔ کاشغر سے گوادر تک اقتصادی راہداری کے منصوبے سے پاکستان کو زبردست فائدہ پہنچے گا۔ یہ منصوبہ پاک چین دوستی کی ایک نئی مثال بن کرابھرے گا۔ محمد شہباز شریف نے اپنے قطر کے دورے کے حوالے سے بتایا کہ انہوں نے دوحہ میں قطر کے امیر شیخ تمیم بن حمدالثانی اور وزیراعظم عبداللہ بن ناصربن خلیفہ الثانی کے ساتھ ملاقات میں ایل این جی منصوبوں کے متعلق بات چیت کی ہے۔ قطر کی قیادت نے یقین دلایاہے کہ پاکستان کو توانائی کے بحران سے نکالنے کے لئے ہر ممکن تعاون کریں گے۔ لاہور کے علاقہ پرانی انارکلی میں فوڈ سٹریٹ میں حالیہ دہشت گردی کے واقعہ کے بارے میں سوال پرانہوں نے کہاکہ انہیں اس واقعہ پر بہت افسوس ہوا۔ پولیس اور دیگر متعلقہ ادارے تحقیقات کررہے ہیں۔ بیگناہ افراد کی جانوں سے کھیلنے والوں کو کیفر کردار تک پہنچائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حکومت فنڈز کی فراہمی کے ساتھ سخت مانیٹرنگ کی پالیسی پر بھی عملدرآمد کرے گی : خلیل سندھو
لاہور(جی پی آئی) وزیر اعلی پنجاب محمد شہباز شریف کی قیادت میں حکومت صوبے کے عوام کو بہترین طبی سہولیات کی فراہمی کے لئے صحت کے شعبہ پر خطیر رقم خرچ کررہی ہے اور سرکاری ہسپتالوں میں غریب مریضوں کو ادویات کی مفت فراہمی کے لئے 7 ارب 53 کروڑ روپے سے زیادہ رقم مختص کی گئی ہے ـیہ بات صوبائی وزیر صحت خلیل طاہر سندھو نے ایک اعلی سطحی اجلاس کی صدارت کرتے ہوئے کہیـ اجلاس میں سیکرٹری صحت حسن اقبال، ایڈیشنل سیکرٹری صحت (ڈویلپمنٹ )عثمان علی خان،ایڈیشنل سیکرٹری (ٹیکنیکل)ڈاکٹر انور جنجوعہ اور دیگر افسران نے شرکت کیـ صوبائی وزیر نے کہا کہ حکومت نے صحت کے شعبہ میں خدمات کی فراہمی کیلئے گزشتہ سال کے مقابلے میں 19 فیصد بجٹ اضافی فرہم کیا ہے اور ادویات کی مفت فراہمی کے لئے گزشتہ سال کی نسبت تقریباً ایک ارب روپے سے زائد اضافی رقم فراہم کی ہے تاہم سرکاری ہسپتالوں کی انتظامیہ کی یہ ذمہ داری ہے کہ وہ ملنے والے فنڈز کے صحیح استعمال کو یقینی بنائے اور مفت علاج کی شکل میں غریبوں کا حق ان تک پہنچائےـ خلیل طاہر سندھو نے ہدایت کی کہ محکمہ صحت سرکاری ہسپتالوں میں علاج معالجہ کی سہولیات خصوصاً غریب مریضوں کو ادویات کی مفت فراہمی کے لئے سخت مانیٹرنگ کا نظام وضع کرے تا کہ ہر قسم کی pilferage کا خاتمہ کیا جا سکے ـاس موقع پر سیکرٹری صحت حسن اقبال نے صوبائی وزیر کو بتایا کہ حکومت نے پہلی مرتبہ سرکاری ہسپتالوں میں ہاؤس آفیسرز کے 2897 آسامیاں پیدا کی ہیں جو گورنمنٹ کے زیر انتظام چلنے والے میڈیکل کالجوں سے پاس ہونے والے طلباء کے برابر ہیں تا کہ کسی بھی ڈاکٹر کو اعزازی ہاؤس جاب نہ کرنا پڑےـاجلاس سے خطاب کرتے ہوئے وزیر صحت خلیل طاہر سندھو نے کہا کہ حکومت کی جانب سے صحت کے شعبہ کو اربوں روپے کی فراہمی اور ڈاکٹرز کمیونٹی کی فلاح و بہبود اور ان کی ترقی کے بہتر مواقعوں کی فراہمی کا بنیادی مقصد ہیلتھ کیئر ڈلیوری سسٹم کو بہتر بناکر صوبے کے عوام کو علاج معالجہ کی بہتر سے بہتر سہولیات کی فراہمی کو یقینی بناناہے جس کے لئے محکمہ صحت، ہسپتالوں کی انتظامیہ اور ڈاکٹرز کمیونٹی کو باہمی اشتراک سے مربوط کوششیں کرنا ہوں گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اپوزیشن لیڈر خورشید شاہ کی جانب سے چیئرمین نیب کے لیے پیش کردہ نام مناسب ہیں : لیاقت بلوچ
لاہور (جی پی آئی) جماعت اسلامی پاکستان کے سیکرٹری جنرل لیاقت بلوچ نے کہاہے کہ اپوزیشن لیڈر خورشید شاہ کی جانب سے چیئرمین نیب کے لیے پیش کردہ نام مناسب ہیں، عملاً جسٹس بھگوان داس ، خواجہ ظہیر احمد اور جسٹس سردار رضا خان کے نام موزوں ترین ہیں۔ وزیراعظم اور اپوزیشن لیڈر دیگر جماعتوں سے مشاورت بھی ضرور کریں اور دونوں ملاقات کر کے کسی ایک نام پر اتفاق کرتے ہوئے چیئرمین نیب کی تقرری کر دیں۔ متنازعہ چیئرمین نیب تو ہٹا دیئے گئے لیکن نئے چیئرمین نیب کی تقرری میں غیر ضروری تاخیر کرپشن کے پھیلائو میں مددگار بننے کے مترادف ہے۔ ان خیالات کا اظہار انہو ں نے کراچی کے دورہ کے بعد لاہور میں ذمہ داران جماعت کے ساتھ گفتگو کرتے ہوئے کیا۔لیاقت بلوچ نے کہاکہ کراچی میں حالات بہت ہی ابتر ہیں۔ کراچی کے عوام کو انتخابات میں غیر جانبدارانہ اور شفاف انتخابی عمل سے محروم کیا گیا۔ جعلی اور ٹھپہ مینڈیٹ پر مقبولیت کی مہر لگوانے کے لیے شہر بھتہ خوروں، دہشتگردوں، ٹارگٹ کلرز اور قبضہ مافیا کے حوالے کر دیا گیا ہے۔ کراچی میں قانون نافذ کرنے کے لیے ناگزیر ہے کہ کراچی اور حیدر آباد میں جعلی انتخابات منسوخ کیے جائیں، نئے انتخابات کرائے جائیں اور مجرموں کو عبرتناک سزا دی جائے۔ انہوں نے کہاکہ پی پی پی کی صوبائی حکومت حسب سابق کراچی اور حیدر آباد کے عوام سے لاتعلق اور انسانوں کی قتل و غارت گری پر مجرمانہ غفلت کا شکار ہے۔ لیاقت بلوچ نے کہاکہ پورے ملک میں ماہ رمضان کے ایک دن آغاز پر اتفاق رائے اسلامیان پاکستان کے لیے خوشگوار لمحات ہیں۔ ماہ رمضان رحمت برکت اور اللہ سے مغفرت طلب کرنے اور پوری دنیا میں مسلمان مردو خواتین کے لیے تربیت کا مہینہ ہے۔ اہل ایمان پوری توجہ سے ماہ رمضان کی برکتیں حاصل کرنے کے لیے تیار ہو جائیں۔ وفاقی اور صوبائی حکومتیں ماہ رمضان کے احترام کے قوانین کے نفاذ اور اشیائے خوردونوش کی قیمتوں میں ہوشربا اضافے کا سدباب کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پہلے دن ہی رمضان بازاروں کے ڈھول کا پول کھل گیا، سینیٹر کامل علی آغا
لاہور (جی پی آئی)ق لیگ کے مرکزی سیکرٹری اطلاعات سینیٹر کامل علی آغا نے کہا ہے کہ پھاٹک سیون اپ اور شادمان رمضان بازاروں کا جائزہ لیا پہلے دن ہی رمضان بازاروں کے ڈھول کا پول کھل گیا، پھل سبزی کے نام پر کچرا بیچا جارہا ہے، دکانداروں سے ایک نمبر چیز دینے کا کہا جائے تو وہ خفیہ خانوں سے ایک نمبر پھل سبزی سامنے رکھ کر مرضی کی قیمت طلب کرتے ہیں، انہوں نے کہا کہ رمضان بازاروں میں پولیس، سٹی ڈسٹرکٹ گورنمنٹ کی نگرانی میں عوام سے دھوکہ ہو رہاہے، حکمران عوام کو ریلیف دینے میں مخلص ہی نہیں، انہوں نے کہا کہ رمضان بازاروں کی آڑ میں اربوں روپے کی سبسڈی انتہائی صفائی کے ساتھ ہڑپ کرجانے کے انتظامات واقعی مکمل کیے گئے ہیں، انہوں نے کہا کہ اگر رمضان بازاروں کے یہی حالات رہے تو پھر حکمران عوام سے ریکارڈ گالیاں سننے کے لیے تیار رہیں، انہوں نے کہاکہ حکمرانوں نے رمضان المبارک سے قبل مہنگائی کرکے خدا کے غضب کو دعوت دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مادر ملت کی جمہوریت کے لیے جدوجہد تاریخ کا سنہری باب ہے، چوہدری ظہیر الدین
لاہور (جی پی آئی) پاکستان مسلم لیگ پنجاب کے جنرل سیکرٹری چوہدری ظہیر الدین خاں نے فاطمہ جناح کی برسی کے موقع پر کہا ہے کہ مادرملت کی جمہوریت کے فروغ اور ایوبی مارشل لاء کے خلاف جدوجہد تاریخ کا سنہری باب ہے، انہوں نے کہا کہ فاطمہ جناح ہر مسلم لیگی کے لیے رول ماڈل ہیں، محترمہ فاطمہ جناح کی جمہوریت کے لیے جدوجہد اور تحریک پاکستان میں ادا کیے گئے ان کے کردار کو نصاب کا حصہ ہونا چاہئیے، مسلم لیگ کے راہنمائوں میاں عبدالستار ایڈووکیٹ، خواجہ طاہر ضیاء، سجاد بلوچ، آصف خان، اشفاق فرزند بھٹی، شیخ نفیس نے مسلم لیگ ہائو س میں فاطمہ جناح کی برسی کے موقع پر ان کی خدمات پر انہیں زبردست خراج تحسین پیش کیا، خواجہ طاہر ضیاء نے کہا کہ فاطمہ جناح اگر بانی پاکستان قائد اعظم محمد علی جناح کی قدم قدم پر معاونت نہ کرتیں تو حصول پاکستان کی منزل اتنی جلد حاصل نہ ہو پاتی، راہنمائوں نے مادر ملت کے درجات کی بلندی کے لیے دعا کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جماعت اسلامی حلقہ خواتین کے تحت یکم تا 15 رمضان آن لائن فہم القرآن کلاس ہوگی
لاہور(جی پی آئی) جماعت اسلامی حلقہ خواتین کے تحت یکم تا 15 رمضان روزانہ صبح 8 سے 10بجے تک آن لائن فہم القرآن کلاس ہوگی۔ سیکریٹری جنرل جماعت اسلامی ڈاکٹر رخسانہ جبین سورة الانعام اور سورةنور کا ترجمہ اور تفسیر پیش کریں گی۔ کلاس میں شریک ہونے کے لئے جماعت اسلامی حلقہ خواتین کی ویب سائٹ www.jamaatwomen.org پر وزٹ کریں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بزدل مخالف چوہدری برادران کے صاف دامن پر داغ نہیں لگا سکتے، خدیجہ فاروقی
لاہور (جی پی آئی) ق لیگ پنجاب کی راہنما سابق رکن صوبائی اسمبلی خدیجہ عمر فاروقی نے کہا ہے کہ چوہدری برادران کے مخالف جتنی چاہیں ایڑھیاں رگڑ لیں مگر ان کے صاف دامن پر کوئی داغ نہیں لگا سکیں گے عوامی کی بجائے اگر موجودہ حکمران انتقامی ایجنڈے کو پہلے نمبر پر رکھنا چاہتے ہیں تو اپنا شوق پورا کر لیں، چوہدری پرویز الہٰی کے دور میں منافع بخش پنجاب بنک کو دیوالیہ اور تباہ کرنے والوں کا محاسبہ کرنے کے لیے کمیشن بنانے کی ضرورت ہے، انہوں نے کہا کہ حکمران سن لیں انتقامی ایجنڈے پر عمل کا انجام اب بھی 12 اکتوبر 1999 ء سے مختلف نہیں ہو گا ،انہوں نے کہا کہ بزدل مخالف اخباری خبروں میں چھپ کر وار کرنے کی بجائے کھل کر سامنے آئیں، انہوں نے کہا کہ چوہدری شجاعت حسین ایک سچے اور کھر ے انسان ہیں ان کے وضاحتی بیان کے بعد بھی اگر ہماری لیڈر شپ کے بارے میں کوئی مذموم مہم چلانے کی کوشش کی گئی تو پھر ہم بھی بتائیں گے کون لوگ پاکستان کے تمام بنکوں کے آج بھی نادہندہ ہیں اور کہاں کہاں ریفرنس اور کیسز سردخانوں میں پڑے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پولٹری فیڈ اور میڈیسن میں ملاوٹ کی روک تھام کے لئے متعلقہ حکام اقدامات کریں : رانا عبدالستار
لاہور(جی پی آئی) پاکستان برائلر فارمرز ایسوسی ایشن کے چیئرمین رانا عبدالستار نے کیا ہے کہ پولٹری فیڈ اور میڈیسن میں ملاوٹ کی روک تھام کے لئے متعلقہ حکام اقدامات کریں ایک بیان میں انہوں نے کہا کہ عدم توجہ کے باعث پولٹری انڈسٹری تنزلی کا شکار ہو رہی ہے اور اگر اس پر توجہ نہ دی گئی تو آنے والے دنوں میں گوشت کی قلت کا سامنا کرنا پڑے گا انہوں نے کہا کہ مرغیوں میں مسلسل وائرس کی موجودگی اور بروکرز کی طر سے رقوم کی ادائیگی نہ ہونے کی وجہ سے فارمرز دیوالیہ ہو گئے ہیں، پولٹری انڈسٹری کو بچانے کے لئے فیڈ ایکٹ کو لاگو کرنا، فیڈ کی ایس سی آر 29-30 اور فیڈ کی قیمت میں کمی کرنا، فارمرز کی مالی امداد کرناوقت کی اہم ضرورت ہے، گورنمنٹ نے اگر پولٹری انڈسٹری کی طرف توجہ نہ دی تو پولٹری انڈسٹری ختم ہو جائے گی انہوں نے حکام بالا سے درخواست کی ہے کہ انڈسٹری کو بچانے کے لئے موثر اقدامات کئے جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جماعت اسلامی فحاشی کے خلاف کیس کی مسلسل پیروی کر تی رہے گی : لیاقت بلوچ
لاہور(جی پی آئی) جماعت اسلامی پاکستان کے سیکریٹری جنرل لیاقت بلوچ نے گزشتہ روز اخبارات میںشائع ہونے والے اس بیان کہ جماعت اسلامی پاکستان فحاشی کے خلاف قاضی حسین احمدکی درخواست کو واپس لینا چاہتی ہے کی سختی سے تردید کی ہے اور کہا ہے کہ جماعت اسلامی سپریم کورٹ میں جماعت اسلامی پاکستا ن کے سابق امیروصدر ملی یکجہتی کونسل قاضی حسین احمدمرحوم کی درخواست کی اپنے وکیل کے ذریعے مسلسل پیروی کررہی ہے۔ مئورخہ 08 جولائی کو سپریم کورٹ میں فحاشی کے خلاف درخواست کی سماعت کے موقع پر ایک دوسرے درخواست گزار نے غلط بیانی سے کام لیتے ہوئے جماعت اسلامی سے منسوب شر انگیز، خود ساختہ بیان، عدالت کے سامنے بیان کیاجس کا حقیقت سے کوئی تعلق نہیں۔اس نے یہ حرکت کرکے فحاشی پھیلانے والوں کے ہاتھ مضبوط کیے ہیں، جس کو عدالت نے یکسر مسترد کیا ہے۔لیاقت بلوچ نے کہا کہ جماعت اسلامی پاکستان اس درخواست کو کسی صورت واپس نہیں لے گی اوراس درخواست کی سماعت پر ہم عدالت عظمی کے شکر گزار ہیں۔عدالت عظمی نے مفاد عامہ کو سامنے رکھتے ہوئے آئین کی بالادستی کے لیے قاضی حسین احمد کی درخواست پر از خود نوٹس لیا تھا جس کے بعد عدالت نے اس درخواست پر متعددآرڈرز جاری کیے، جن میں نبی مہربانۖکے حوالہ سے جب یو ٹیوب پر خاکے شائع کرنے کی ناپاک حرکت کی گئی، تو سپریم کورٹ نے آرڈر کے ذریعے یو ٹیوب کو بند کرایا۔جماعت اسلامی پاکستان وکیل کے ذریعے اس درخواست میں عدالت عظمیٰ کی بھر پور معاونت کرے گی۔لیاقت بلوچ نے کہا کہ جماعت اسلامی نے ہمیشہ فحاشی وعریانی کے خلاف جہاد کیا ہے، مہمات اور عوامی آگاہی پروگرامات کیے ہیں اور جماعت اسلامی عدالت سے استدعا کرتی ہے کہ عوام کو فحاشی وعریانی کے سیلاب سے بچایا جائے۔انہوںنے کہا کہ جماعت اسلامی اس میںفریق رہے گی اور ملی یکجہتی کونسل کی طرف سے فحاشی کے خلاف درخواست میں فریق بننے کے بیان کا خیبر مقدم کرتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میاں برادران کا دورہ چین ترقی کیلئے سنگ میل ثابت ہو گا :خواجہ احمد احسان
لاہور(جی پی آئی) وزیراعظم پاکستان محمد نوازشریف اور وزیراعلیٰ محمد شہبازشریف کا دورہ چین توانائی اور سماجی شعبوں میں پاکستان کی ترقی کے لئے سنگ میل ثابت ہو گا۔ نندی پورپاور پراجیکٹ کی بحالی وزیراعلیٰ محمد شہبازشریف کا شاندار کارنامہ ہے۔چین کی سرکاری تعمیراتی کمپنی سے صوبے کے 5 شہروں یعنی لاہور ملتان فیصل آباد راولپنڈی اور گوجرانوالہ میں میٹروبس سسٹم اور انڈرگرائونڈ بس سروس کی تعمیر کا ابتدائی معاہدہ کیا گیا ہے۔یہ بات پاکستان مسلم لیگ (ن) کے سینئر رہنما خواجہ احمد حسان نے پارٹی ورکرز کے اجلاس سے خطاب کرتے ہوئے کہی۔ انہوں نے کہا کہ وزیراعظم پاکستان اور وزیراعلیٰ پنجاب کا کامیاب دورہ چین نہ صرف چین اور پاکستان کے باہمی تعلقات کو مزید مضبوط بنائے گا بلکہ پاکستان میں ترقی کی نئی راہیں کھلیں گی۔انہوں نے کہا کہ پنجاب حکومت اور چینی کمپنیوں کے مابین ہونے والے معاہدوں پر فوری طور پرعملدرآمد ہونا خوش آئند ہے۔ وزیراعلیٰ پنجاب نے برسراقتدار آ کر پنجاب کے عوام کو لوڈشیڈنگ سے نجات دلانے کے لئے نندی پور پاور پراجیکٹ میں غیر معمولی دلچسپی لی اور چین کی معروف کمپنی کے حکام سے طویل ملاقات کے بعد بالآخر انہیں آمادہ کیا اور چینی انجینئرز نے نندی پور پاور پراجیکٹ پر نئے سرے سے کام کا آغاز کر دیا ہے۔ خواجہ احمد حسان نے کہا کہ وزیراعلیٰ پنجاب محمد شہبازشریف نے صوبے کے عوام کو لوڈ شیڈنگ کی اذیت سے نجات دلانے کا تہیہ کررکھا ہے۔ یہی وجہ ہے کہ انہوں نے نہ صرف ملک میں بجلی پیدا کرنے والے پرائیویٹ اداروں، سرمایہ کاروں اور کمپنیوں کے سربراہان سے ملاقاتیں کی اور انہیں بجلی کے بحران کے خاتمے کے لیے حکومت سے تعاون پر آمادہ کیا بلکہ اپنے دورہ چین میں بھی چینی رہنمائوں اور حکام کے ساتھ اس حوالے سے ملاقاتیں کیں جس کے مثبت نتائج سامنے آنا شروع ہوگئے ہیں۔ وزیراعلیٰ پنجاب محمد شہباز شریف ،وزیراعظم نوازشریف کے ساتھ اپنے دورہ چین میں معاہدوں کی فضا کو ہموار کررہے ہیں اور انہوں نے چینی سرمایہ کاروں کو پاکستان میں تجارت اور دیگر شعبوں میں سرمایہ کاری کے لیے تمام سہولتیں اور تحفظ فراہم کرنے کا یقین دلایا ہے یہی وجہ ہے کہ اب چینی ماہرین پنجاب میں کوئلے اور شمسی توانائی سے بجلی پیدا کرنے کے منصوبوں سمیت مختلف شعبوں میں بھرپور تعاون فراہم کریں گے۔ انہوں نے کہا کہ پنجاب حکومت اور چین کے درمیان انفراسٹرکچر اور انرجی کے شعبوں میں مختلف معاہدے طے پاگئے ہیں جو ایک اہم پیش رفت ہے۔چینی حکام اور ماہرین کا پنجاب کے بڑے شہروں میں جدید ٹرانسپورٹ سسٹم چلانے کے لئے ہرطرح کا تعاون لائق تحسین ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ای اوبی آئی اسکینڈل میں ملوث تمام افراد کو گرفتار کیاجائے : جماعت اسلامی پنجاب
لاہور(جی پی آئی) ممبر صوبائی اسمبلی وپارلیمانی لیڈر اور امیر جماعت اسلامی پنجاب ڈاکٹر سید وسیم اختر نے کہا ہے کہ ایف بی آر کے لا محدود اختیارات ٹیکس محصولات میں اضافہ کی بجائے کرپشن کے فروغ کا سبب بنیں گے۔ اکائونٹس تک رسائی سے لوگوں کا بنکوں پر سے اعتماد اٹھ جائے گا۔ ضرورت اس امر کی ہے کہ ایسی پالیسیاں بنائی جائیں جن سے ٹیکس گزاروں کو ریلیف فراہم کیا جائے۔ پیپلزپارٹی اور اس کے اتحادیوں نے قومی خزانے کو دونوں ہاتھوں سے لوٹا ہے۔ گزشتہ پانچ برس ملک و قوم پر انتہائی بھاری تھے۔آئے روز ایک نیا کرپشن اسکینڈل منظرعام پر آیا۔توقیر صادق کیس میں 80 ارب سے زائد کی کرپشن لمحہ فکریہ ہے۔ایفی ڈرین کوٹے سے لے کر حج جیسے مقدس فریضے کے انتظامات تک میں بڑے ناموں نے کرپشن کی۔انہوں نے کہاکہ عدالتی فیصلوں کا مذاق اڑایا جاتا رہا۔ نیب کے سابق چیئرمین ملک میں روزانہ 10 سے 12 ارب روپے کی کرپشن کی نشاندہی کرچکے ہیں مگر بدقسمتی سے نئی آنے والی حکومت نے کرپٹ عناصر کے خاتمے کے لئے کچھ نہیں کیا۔حکومت اس کے خاتمے کے لئے سنجیدہ اقدامات کرے۔ٹرانسپیریسی انٹرنیشنل کی رپورٹ کے مطابق پاکستان کرپشن میں 34 ویں نمبر آگیا ہے۔ 2 برسوں کے دوران کرپشن میں لینڈ سروسز پولیس دوسرے اور عدلیہ تیسرے نمبر ہے۔ انہوں نے کہا کہ ای او بی آئی اسکینڈل میں ملوث افراد کو گرفتار کرکے غریب عوام کا پیسہ نکلوایا جائے۔ خزانہ خالی کارونا رونے والے اگر مخلص ہیں تو کھربوں روپے کے قرضے معاف کروانے اور خزانے کو لوٹنے والوں کے خلاف ہنگامی بنیادوں پر کاروائی کریں۔ ملکی معیشت دن بدن کمزور ہورہی ہے۔حکمران قرضوں پرلگنے والے سود کو اداکرنے کے لئے آئی ایم ایف سے سود پر مزید قرضے لے رہے ہیں۔انہوں نے کہا کہ اداروں کی نجکاری کی باتیں کرنے والے نااہل ہیں۔ پاکستان وسائل سے مالا مال ملک ہے اس سے فائدہ اٹھانا چاہئے۔ حکومت اپنی ناکامی چھپانے کے لئے اداروں کی نجکاری سے اجتناب کرے۔ کرپٹ افسران کو گھر بھیج دیاجائے اور آئندہ میرٹ پر بھرتیاں کی جائیں تبھی ادارے پھر سے منافع بخش ہوسکتے ہیں۔ یوں محسوس ہوتا ہے کہ جیسے موجودہ حکمرانوں کے پاس کوئی وژن ہی نہیں۔ ڈاکٹر سید وسیم اختر نے مزید کہاکہ کرپشن کا ناسور ایوان صدر سے لے کر نیچے تک تیزی سے اپنی جڑیں مضبوط کررہا ہے۔پاکستان کی ترقی، خوشحالی اورمعاشی استحکام کے لئے کرپشن کا قلع قمع ناگزیر ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سید منورحسن کا رمضان المبارک کی آمد پر قوم کے نام پیغام
لاہور(جی پی آئی) امیر جماعت اسلامی پاکستان سید منور حسن نے قوم کواللہ تعالیٰ کے خاص مہمان ماہ رمضان کی مبارک باد دیتے ہوئے اپنے پیغام میں کہا ہے کہ رمضان المبارک میں اللہ تعالیٰ کی رحمتوں کی گھٹائیں چاروں طرف برستی نظر آتی ہیں جن سے ہر مسلمان کو جی بھر کر استفادہ کرنا چاہئے اور خود کو اللہ تعالیٰ کی بخششوں اور مغفرتوں کا حقدار بنانا چاہئے ۔انہوں نے کہا کہ اس بار بھی رمضان المبارک ایسے حالات میں سایہ فگن ہوا ہے کہ امت مسلمہ جگہ جگہ عالمی استعمار کے خونی پنجے سے رہائی حاصل کرنے کیلئے قربانیوں کی تاریخ رقم کر رہی ہے اور کشمیر ،فلسطین ،برما،عراق اورافغانستان سمیت کئی مسلمان ممالک اپنی آزادی اور خود مختاری کے حصول کے لئے جارح قوتوںکے ساتھ برسر پیکار ہیں، عالم اسلام کو محکوم اور مصیبت زدہ بھائیوں کی ہر ممکن مدد کرنی چاہیے۔ انہوں نے کہاکہ مصر اور ترکی میں امریکہ اور اس کے حواری وہاں کی منتخب حکومتوں کے خلاف عرصے سے سازشوں میں مصروف تھے، مصر میں عوامی حکومت پرفوجی ڈاکے کے بعد وہاں کے عوام سراپا احتجاج ہیں ہر روز پورے مصر میں لاکھوں کی تعداد میں عوام فوجی بغاوت کے خلاف احتجاجی مظاہرے کرتے ہیں لیکن عالمی ادارے اور نام نہاد جمہوریت پسند ممالک آنکھیں اور کان بند کئے ہوئے ہیں، مصری عوام روزانہ اپنی ہی فوج کے ہاتھوںشہید ہونے والوںکے لاشے اٹھانے پر مجبور ہے ۔سید منور حسن نے کہا کہ رمضان ہمدردی اور غم خواری کا مہینہ ہے ،اس ماہ مبارک میں ہمیں اپنے ارد گرد موجود حاجت مندوں کی حاجت روائی اور غربت اور مہنگائی کے ہاتھوں پریشان لوگوں کی پریشانیوں کو بانٹنے کیلئے ایک دوسرے پر سبقت لینے کی کوشش کرنی چاہئے ۔حضور ۖ نے فرمایا کہ وہ شخص ہر گز مسلمان نہیں ہو سکتا جو خود تو پیٹ بھر کر کھائے اور اس کا ہمسایہ بھوکا رہے ،انہوں نے کہا کہ ملک میں بڑھتی ہوئی بے روز گاری ،مہنگائی اور غربت کے ہاتھوں ہر فرد تنگ ہے لوگوں کیلئے دووقت کے کھانے کا انتظام کرنا ممکن نہیں رہا اور لاکھوں لوگوں کو فاقہ کشی کا سامنا ہے لیکن جن لوگوں نے عوام کو ان پریشانیوں اور مصیبتوں میں مبتلا کیا ہے وہ اپنی ذمہ داریوں کو پورا کرنے کیلئے تیار نہیں ہیں۔ سید منور حسن نے کہا کہ عوامی فلاح اور خدمت کے تمام امور پرائیویٹ ادارے اور انجمنیں سرانجام دے رہی ہیں۔تعلیم، صحت اور روزگار مہیا کرنے کے کیلئے غیر سرکاری این جی اوز توخدمت کے میدان میں نظر آتی ہیں لیکن سرکاری سطح پر عوام کی ان ضرورتوں اور محرومیوں کا کوئی احساس نہیں اور نہ ہی لوگوں کو ریلیف دینے کیلئے کوئی موثر حکمت عملی اپنائی گئی ہے ۔سید منور حسن نے کہا کہ حکومت نے رمضان المبارک میں مستحق لوگوں کو ریلیف دینے کیلئے دو ارب روپے کی سبسڈی کا اعلان کیا ہے جو اونٹ کے منہ میں زیرے کے مترادف ہے ۔حکومت کو چاہئے تھاکہ غربت، مہنگائی اور بے روز گاری کو سامنے رکھتے ہوئے ریلیف پیکیج کا اعلان کرتی۔ انہوں نے کہا ملک میں غربت کی شرح اور غریبوں کی تعداد میں بے تحاشا اضافہ ہورہا ہے جبکہ حکمران دوارب روپے کی سبسڈی دیکر اپنے تمام فرائض سے عہدہ براء ہوچکے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیراعلیٰ پنجاب محمد شہباز شریف کی رمضان المبارک کی آمد پر قوم کو مبارکباد
لاہور(جی پی آئی) وزیراعلیٰ پنجاب محمد شہباز شریف نے رمضان المبارک کی آمد پر قوم کو مبارکباد دیتے ہوئے کہا ہے کہ ماہ مقدس ہمیں اللہ تعالی کی خوشنودی اور رحمتیں سمیٹنے کا نادر موقع فراہم کرتا ہے۔ مسلمان رمضان المبارک میں خشوع و خضوع کے ساتھ عبادات کے ذریعے اپنی جھولیاں رحمتوں سے بھر سکتے ہیں۔ اپنے خصوصی پیغام میں انہوں نے کہا کہ ماہ رمضان ہمیں ایثار و قربانی کا درس دیتا ہے اور ہمیں چاہیئے کہ ہم اس ماہ کے دوران ان بہن بھائیوں کا زیادہ سے زیادہ خیال رکھیں جو ہماری توجہ کے مستحق ہیں۔ انہوںنے کہا کہ وطن عزیز تاریخ کے نازک ترین دور سے گزر رہا ہے اور قوم کودہشت گردی کے سنگین چیلنج کا سامنا ہے۔ ماہ مقدس میں پوری قوم خدا کے حضور سجدہ ریز ہو کر اور گڑگڑا کر ملک میں امن اور اس کی ترقی و خوشحالی کے لئے خصوصی دعائیں مانگے۔ وزیراعلیٰ محمد شہباز شریف نے کہا کہ حکومت پنجاب رمضان المبارک کے دوران عوام کو معیاری اشیا کی سستے داموں فراہمی کیلئے 4ارب روپے کا خصوصی پیکیج دے رہی ہے اور معیاری اشیائے ضروریہ کی مقررہ نرخوں پر فراہمی کیلئے خصوصی مانیٹرنگ ٹیمیں بھی تشکیل دی ہیں۔ انہوں نے تاجر برادری سے اپیل کی کہ وہ ماہ مقدس میں روزہ داروں کو سستے داموں روزمرہ اشیا کی فراہمی کیلئے حکومت سے تعاون کرے۔ انہوں نے کہا کہ انتظامیہ کے ساتھ ساتھ عوامی نمائندوں کا بھی عوام کو رمضان المبارک میں معیاری اشیا کی مقررہ نرخوں پر فراہمی کے حوالے سے کردار نہایت اہمیت کا حامل ہے، اسی لئے منتخب نمائندوں کو بھی رمضان بازاروں، دسترخوانوں اور فئیرپرائس شاپس پر عوام کی سہولت کیلئے کئے گئے اقدامات کی ذاتی طور پر نگرانی کی ذمہ داری سونپی گئی ہے۔وزیراعلیٰ نے کہا کہ مسلم لیگ کی حکومت عوام کو زیادہ سے زیادہ ریلیف فراہم کرنے کے لئے تمام ضروری اقدامات کررہی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حکومت سحر و افطار ، نماز تراویح کے اوقات میں لوڈشیڈنگ نہ کرنے کے پلان پر عملدرآمد کو یقینی بنائے : لیاقت بلوچ
لاہور(جی پی آئی) جماعت اسلامی پاکستان کے سیکرٹری جنرل لیاقت بلوچ نے کہاہے کہ حکومت رمضان المبارک میں سحر و افطار ، نماز تراویح کے اوقات میں لوڈشیڈنگ نہ کرنے کے پلان پر عملدرآمد کو یقینی بنائے اور اس کے ساتھ ساتھ اشیائے خوردو نوش کی قیمتوں میں استحکام کے لیے ضلعی انتظامیہ، پرائس کنٹرول مجسٹریٹس کو موبائلز رکھے۔ انہوں نے کہاکہ صوبائی حکومتوں کے افسران رمضان پیکیج پر عملدرآمد کے لیے یوٹیلٹی سٹورز، رمضان بازاروں، بڑے ڈیپارٹمنٹل سٹورز پر جا کر اشیائے خوردونوش کی قیمتوں کو مانیٹر کریں تاکہ عوام کو صحیح معنوں میں ریلیف میسر آ سکے۔ انہوں نے کہاکہ رحمتوں، برکتوں اور سعادتوں کے ماہ مبارک میں تاجر حضرات منافع میں کمی کر کے اللہ کی خوشنودی حاصل کریں۔ پوری دنیا میں بزنس کمیونٹی اپنے مذہبی تہواروں پر اشیائے ضروریہ کی قیمتوں میں کمی کر کے اپنے متوسط اور غریب بھائیوں کو خوشیوں میں شریک کرتی ہیں، پاکستان کو بھی اس کی اعلیٰ مثال دنیا میں پیش کرنی چاہیے۔ انہوں نے اہل ثروت سے بھی اپیل کی کہ وہ غریب مساکین کے لیے سحر و افطار کے انتظامات ترتیب دیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جماعت اسلامی فحاشی کے خلاف کیس کی مسلسل پیروی کر تی رہے گی : لیاقت بلوچ
لاہور (جی پی آئی) جماعت اسلامی پاکستان کے سیکریٹری جنرل لیاقت بلوچ نے اخبارات میںشائع ہونے والے اس بیان کہ جماعت اسلامی پاکستان فحاشی کے خلاف قاضی حسین احمدکی درخواست کو واپس لینا چاہتی ہے کی سختی سے تردید کی ہے اور کہا ہے کہ جماعت اسلامی سپریم کورٹ میں جماعت اسلامی پاکستا ن کے سابق امیروصدر ملی یکجہتی کونسل قاضی حسین احمدمرحوم کی درخواست کی اپنے وکیل کے ذریعے مسلسل پیروی کررہی ہے۔مئورخہ08جولائی کو سپریم کورٹ میں فحاشی کے خلاف درخواست کی سماعت کے موقع پر ایک دوسرے درخواست گزار نے غلط بیانی سے کام لیتے ہوئے جماعت اسلامی سے منسوب شر انگیز ،خود ساختہ بیان، عدالت کے سامنے بیان کیاجس کا حقیقت سے کوئی تعلق نہیں۔اس نے یہ حرکت کرکے فحاشی پھیلانے والوں کے ہاتھ مضبوط کیے ہیں،جس کو عدالت نے یکسر مسترد کیا ہے۔لیاقت بلوچ نے کہا کہ جماعت اسلامی پاکستان اس درخواست کو کسی صورت واپس نہیں لے گی اوراس درخواست کی سماعت پر ہم عدالت عظمی کے شکر گزار ہیں۔ عدالت عظمی نے مفاد عامہ کو سامنے رکھتے ہوئے آئین کی بالادستی کے لیے قاضی حسین احمد کی درخواست پر از خود نوٹس لیا تھا جسکے بعد عدالت نے اس درخواست پر متعدد آرڈرز جاری کیے، جن میں نبی مہربان صلی اللہ علیہ وآلہ وسلم کے حوالہ سے جب یو ٹیوب پر خاکے شائع کرنے کی ناپاک حرکت کی گئی، تو سپریم کورٹ نے آرڈر کے ذریعے یو ٹیوب کو بند کرایا۔ جماعت اسلامی پاکستان وکیل کے ذریعے اس درخواست میں عدالت عظمی کی بھر پور معاونت کرے گی۔لیاقت بلوچ نے کہا کہ جماعت اسلامی نے ہمیشہ فحاشی وعریانی کے خلاف جہاد کیا ہے، مہمات اور عوامی آگاہی پروگرامات کیے ہیں اور جماعت اسلامی عدالت سے استدعا کرتی ہے کہ عوام کو فحاشی وعریانی کے سیلاب سے بچایا جائے۔ انہوںنے کہا کہ جماعت اسلامی اس میںفریق رہے گی اور ملی یکجہتی کونسل کی طرف سے فحاشی کے خلاف درخواست میں فریق بننے کے بیان کا خیبر مقدم کرتے ہیں۔
واپڈا کی قاتل تاروں سے ھلاک ہونے والی فائزہ کی والدہ تفصیلات بتا رہی ہیں جبکہ دوسری جانب فائزہ کی تصویر
